National News
འབྲུག་དང་ སའུ་དི་ཨ་ར་བི་ཡའི་བར་ན་ དོན་གཅོད་མཐུན་ལམ་གཞི་བཙུགས།
ནིའུ་ཡོག་ལུ་ཡོད་མི་ སའུ་དི་ཨ་ར་བི་ཡའི་ གཏན་འཇགས་སྐུ་ཚབ་ཀྱི་ ཡིག་ཚང་ནང་སྦེ་ འབྲུག་དང་ སའུ་དི་ཨ་ར་བི་ཡའི་ རྒྱལ་ཁབ་ ༢ ཀྱི་བར་ན་ དོན་གཅོད་མཐུན་ལམ་ཚུ་ གཞུང་འབྲེལ་དུ་ གཞི་བཙུགས་འབད་ཡོདཔ་ཨིན་པས།དེ་ཡང་ སྤྱི་ཟླ་ ༩ པའི་ཚེས་ ༡༨ ལུ་ འཛམ་གླིང་སྤྱི་ཚོགས་ནང་ འབྲུག་གི་གཏན་འཇགས་སྐུ་ཚབ་ པདྨ་ལེགས་གྲུབ་རྡོ་རྗེ་དང་ སའུ་དི་ཨ་ར་བི་ཡའི་ གཏན་འཇགས་སྐུ་ཚབ་ ཨབ་ཌུ་ལ་ཛིཛ་ ཨཱལ་ཝ་སིལ་ ༢ ཀྱིས་ དོན་གཅོད་མཐུན་ལམ་གཞི་བཙུགས་ཀྱི་ ཆིངས་ཡིག་གུ་ མཚན་རྟགས་བཀོད་ཐོག་ལས་ གཞི་བཙུགས་འབད་ནུག།དེ་སྦེ་ ཆིངས་ཡིག་གུ་ མཚན་རྟགས་བཀོད་པའི་སྐབས་ལུ་ སྐུ་ཚབ་ ༢ ཀྱིས་ རྒྱལ་ཁབ་ ༢ ཀྱི་བར་ན་ མཉམ་འབྲེལ་སྒྲིང་སྒྲིང་ བཟོ་ནི་གི་ ཁས་བླངས་འབད་ཡོདཔ་མ་ཚད་ མཉམ་འབྲེལ་གནད་དོན་གྱི་ ས་ཁོངས་ཚུ་ནང་ དབྱེ་ཞིབ་དང་ རྒྱ་སྐྱེད་འབད་ནི་གི་ དང་འདོད་ཡོད་ལུགས་ཚུ་ཡང་ བཤད་ཡོདཔ་ཨིན་པའི་གནས་ཚུལ།