འབྲུག་སླར་བྱུང་གློག་མེ་ལས་འཛིན་དང་ ཧི་ར་པ་ཝར་དང་ སི་ཊིལ་ཚད་འཛིན་གྱི་བར་ན་ ཉི་དྲོད་གློག་མེ་ གོང་འཕེལ་གྱི་དོན་ལུ་ གོ་དོན་ཆིངས་ཡིག།
སྤྱི་ཟླ་ ༨ པའི་ཚེས་ ༡༩ ལུ་ འབྲུག་སླར་བྱུང་གློག་མེ་ལས་འཛིན་དང་ རྒྱ་གར་ལུ་ཡོད་མི་ ཧི་ར་པ་ཝར་དང་ སི་ཊིལ་ཚད་འཛིན་གྱི་བར་ན་ འབྲུག་རྒྱལ་ཁབ་ནང་ ཉི་དྲོད་གློག་མེ་ གོང་འཕེལ་གྱི་དོན་ལུ་ མཉམ་འབྲེལ་གོ་སྐབས་ཚུ་ འཚོལ་ཞིབ་འབད་ནི་གི་ གོ་དོན་ཆིངས་ཡིག་ཅིག་བཟོ་ནུག། དེ་ཡང་ ཧི་ར་པ་ཝར་དང་ སི་ཊིལ་ཚད་འཛིན་གྱིས་ འབྲུག་ལུ་ མེ་ག་ཝཱཊ་ ༥༠༠ འབད་མི་ ཉི་དྲོད་གློག་མེ་ གོང་འཕེལ་གཏང་ནི་ལུ་ དང་འདོད་ཡོད་ལུགས་ཀྱི་ བརྗོད་དོན་ལྟར་དུ་ འབྲུག་སླར་བྱུང་གློག་མེ་ལས་འཛིན་དང་ ཧི་ར་པ་ཝར་དང་ སི་ཊིལ་ཚད་འཛིན་གཉིས་ཆ་རའི་དོན་ལུ་ སྒྲིག་བཀོད་གཞི་བཙུགས་འབད་ཡོདཔ་ཨིན་པས། འབྲུག་སླར་བྱུང་གློག་མེ་ལས་འཛིན་དང་ ཧི་ར་པ་ཝར་དང་ སི་ཊིལ་ཚད་འཛིན་གྱིས་ ལས་འགུལ་གཞན་གྱི་ གོ་སྐབས་ཚུ་རྩིས་ཏེ་ ཉི་དྲོད་གློག་མེ་ གོང་འཕེལ་གྱི་དོན་ལུ་ ལས་འགུལ་ཚུ་གི་ འོས་འབབ་བརྟག་ཞིབ་ཚུ་ མཉམ་འབྲེལ་ཐོག་ལས་འབད་ནི་ཨིནམ་ད་ མཉམ་འབྲེལ་དེ་གིས་ འབྲུག་སླར་བྱུང་གློག་མེ་ལས་འཛིན་གྱིས་ རྒྱལ་ཁབ་ནང་ སླར་བྱུང་གློག་མེ་ རྒྱ་སྐྱེད་གཏང་ནི་ལུ་ བརྩོན་ཤུགས་བསྐྱེད་མི་དང་གཅིག་ཁར་ ཧི་ར་པ་ཝར་དང་ སི་ཊིལ་ཚད་འཛིན་གྱི་ ཁ་ཐུག་ལས་ཡང་ འབྲུག་ལུ་ སླར་བྱུང་ནུས་ཤུགས་ གོང་འཕེལ་གཏང་ནི་ལུ་ དང་འདོད་སྦོམ་ཡོད་པའི་ རྟགས་མཚན་སྟོན་ནུག།
