རང་ཟླ་ ༧ པའི་ཚེས་ ༢༥ སྤྱི་ཟླ་ ༩ པའི་ཚེས་ ༦ ལུ་ རྩི་རང་གི་ བླམ་གནས་བརྟན་སྐུ་བགྲེས་ ངག་དབང་དཔལ་བཟང་མཆོག་ དགུང་ལོ་ ༨༦ གི་ཐོག་ལུ་ བླམ་རང་གི་གཟིམ་ཅུང་ནང་སྦེ་ གཤགས་ཡོདཔ་ཨིན་པས།དེ་ཚེ་ གཞུང་གྲྭ་ཚང་གི་ རྡོ་རྗེ་སློབ་དཔོན་མཆོག་ དབུ་བཞུགས་ཐོག་ལུ་ འཕགས་པའི་དགེ་འདུནམ་ཚུ་གིས་ ཐིམ་ཕུ་བཀྲ་ཤིས་ཆོས་རྫོང་གི་ ཀུན་ར་ནང་སྦེ་ མཆོད་མེ་སྟོང་མཆོད་ཕུལ་ཏེ་ སྨོན་ལམ་ཚུ་གནང་ནུག།
རང་ཟླ་ ༧ པའི་ཚེས་ ༢༣ སྤྱི་ཟླ་ ༩ པའི་ཚེས་ ༤ ལུ་ ཐིམ་ཕུ་བཀྲ་ཤིས་ཆོས་རྫོང་ནང་ ལོ་བསྟར་གྱི་ ལྷ་དབང་སྒྲུབ་ཆེན་དངོས་གཞི་ དབུ་འཛུགས་གནང་ནིའི་དོན་ལས་ གཞུང་གྲྭ་ཚང་གི་ རྡོ་རྗེ་སློབ་དཔོན་རིན་པོ་ཆེ་མཆོག་ དབུ་བཞུགས་ཐོག་ལུ་ སློབ་དཔོན་ལྷན་རྒྱས་ཚུ་དང་ འཕགས་པའི་དགེ་འདུནམ་ཚུ་གིས་ བྱིན་རླབས་ཀྱི་ཟེར་མངར་འཕྲོ་བའི་ གཏོར་རྫས་དང་ རྟེན་རྫས་རྩ་ཆེན་ཚུ་ དཀྱིལ་འཁོར་ཆེན་པོའི་དབྱིངས་ལུ་ གཟི་བརྗིད་དང་བཅས་པ་ བཞུགས་སུ་གསོལ་ཏེ་ བུམ་པ་བཀྲ་ཤིས་པའི་ གསུང་ཆོག་རྒྱས་པ་ གནང་ཡོདཔ་ཨིན་པས། དེ་ཡང་ རྒྱལ་ཁབ་ནང་ ག་ནི་བ་ བྱིན་རླབས་ཆེ་བའི་ ལྷ་དབང་སྒྲུབ་ཆེན་འདི་ མཐུ་ཆེན་ཆོས་ཀྱི་རྒྱལ་པོ་ ཞབས་དྲུང་ངག་དབང་རྣམ་རྒྱལ་མཆོག་གི་སྲས་ འཇམ་དཔལ་རྡོ་རྗེའི་སྤྲུལ་སྐུ་ རྒྱལ་སྲས་ཀུན་དགའ་རྒྱལ་མཚན་ནམ་ རྒྱལ་སྲས་གྷ་ཎ་པ་ཏི་མཆོག་གིས་ རབ་བྱུང་ ༡༢ པའི་ གནམ་ལོ་ལྕགས་སྟག་ཟླཝ་ ༨ པའི་ནང་དང་ སྤྱི་ལོ་ ༡༧༡༠ ལུ་ གཞི་བཙུགས་གནང་ནུག། དེ་སྦེ་ གཞི་བཙུགས་གནང་དགོ་པའི་ རྒྱུ་མཚན་ཡང་ རྒྱལ་སྲས་རིན་པོ་ཆེ་མཆོག་ གདན་ས་ལྕགས་རི་ལུ་ དཔལ་ལྡན་ལྷ་མོའི་ བསྙེན་སྒྲུབ་གནང་སྟེ་ བཞུགས་པའི་སྐབས་ལུ་ […]
སྤྱི་ཟླ་ ༩ པའི་ཚེས་ ༢ ལུ་ འབྲུག་རྒྱལ་ཡོངས་ཚོགས་འདུའི་ ཚོགས་དཔོན་བསྟན་པ་རྡོ་རྗེ་གིས་ རྒྱལ་ཡོངས་ཚོགས་ཁང་ཆེན་མོའི་ནང་སྦེ་ འབྲུག་གི་རྩ་ཁྲིམས་ཆེན་མོའི་ དགོངས་དོན་དང་འཁྲིལ་ཏེ་ གསང་བྱ་གཏན་འཁེལ་གྱི་ ཁས་བླངས་དམ་བཅའ་ ཕུལ་ཡོདཔ་ཨིན་པས།ཁས་བླངས་དམ་བཅའ་དེ་ཡང་ འབྲུག་གི་ཁྲིམས་སྤྱི་བློན་པོ་ ནོར་བུ་ཚེ་རིང་གི་ སྐུ་མདུན་ལུ་སྦེ་ ཕུལ་ཡོདཔ་ད་ དེ་གི་ཤུལ་ལས་ ཚོགས་དཔོན་འོགམ་ སངས་རྒྱས་མཁའ་འགྲོ་གིས་ཡང་ ཚོགས་དཔོན་གྱི་ འགན་ཁུར་ཚུ་ ཚོགས་དཔོན་བསྟན་པ་རྡོ་རྗེ་ལུ་ རྩིས་འབུལ་ཞུ་ནུག།
མི་རྗེ་བློན་ཆེན་གྱིས་ སྤ་རོ་ལུ་ འགོ་འདྲེན་འཐབ་མི་ འཛམ་གླིང་དྲན་ཚོར་བཟའ་ཆས་རིམ་ལུགས་ཀྱི་ དབུ་ཁྲིད་ཞལ་འཛོམས་ འགོ་འབྱེད་རྟེན་འབྲེལ་ནང་ གྲལ་གཏོགས་མཛད་ནུག། ཞལ་འཛོམས་དེ་ནང་ འབྲུག་མི་དང་ འཛམ་གླིང་རྒྱལ་ཁབ་ ༦༠ ལྷགཔ་ཅིག་ལས་ རྒྱལ་སྤྱིའི་གྲལ་གཏོགས་པ་ཚུ་རྩིས་ཏེ་ མི་གྲངས་ ༤༠༠ ལྷགཔ་ཅིག་ཡོད་མིའི་གྲས་ཁར་ ཤྲཱི་ལངྐའི་བློན་ཆེན་ ཌོག་ཊར་ཧ་རི་ནི་ ཨ་མ་ར་སུ་རི་ཡ་དང་ འཛམ་གླིང་སྤྱི་ཚོགས་ཀྱི་ ཡོངས་ཁྱབ་དྲུང་ཆེན་བགྲེསཔ་ བཱན་ཀི་མུན་ དེ་ལས་ ཨི་ཡར་ལེན་གྱི་ སྲིད་འཛིན་བགྲེསཔ་ མེ་རི་རོ་བིན་སཱན་ཚུ་ཡོདཔ་ཨིན་པས། དབུ་ཁྲིད་ཞལ་འཛོམས་དེ་ སྤྱི་ཟླ་ ༨ པའི་ཚེས་ ༣༡ ལས་ སྤྱི་ཟླ་ ༩ པའི་ཚེས་ ༤ ཚུན་ ཉིན་གྲངས་ ༥ གི་རིང་ལུ་ ཚོགས་གནང་ཡོདཔ་ད་ དེ་ཡང་ བཟའ་ཆས་རིམ་ལུགས་གཞི་སྒྱུར་གྱི་ དོན་གྱི་སྙིང་པོ་ ལག་ལེན་ཟེར་བའི་ བརྗོད་དོན་ཐོག་ལུ་ འབྲུག་གཞུང་དང་ དྲན་ཚོར་བཟའ་ཆས་རིམ་ལུགས་ཚོགས་པ་ དེ་ལས་ འཛམ་གླིང་སྤྱི་ཚོགས་ གོང་འཕེལ་ལས་རིམ་ཚུ་ མཉམ་འབྲེལ་ཐོག་ལས་ འགོ་འདྲེན་འཐབ་ནུག།
པདྨ་དབང་འདུས། སྤྱི་ཟླ་ ༨ པའི་ཚེས་ ༢༦ ལུ་ ནེ་པཱལ་ལུ་ ཆུ་རུད་ཀྱི་ རྐྱེན་ངན་ཚབས་ཆེན་བྱུང་སྟེ་ མི་ལེ་ཤ་ཅིག་ལུ་ ཤི་རྐྱེན་དང་ གནོད་སྐྱོན་སྦོམ་སྦེ་ར་ བྱུང་ཡོདཔ་ལས་ མི་དབང་མངའ་བདག་རིན་པོ་ཆེ་མཆོག་གི་ བཀའ་རྒྱ་ལྟར་དུ་ འབྲུག་གི་ཁ་ཐུག་ལས་ ནེ་པཱལ་བློན་ཆེན་གྱི་ རྒུད་གསོའི་མ་དངུལ་དོན་ལུ་ རྒྱ་གར་གྱི་ རུ་པི་ས་ཡ་ ༡༠༠ ཞལ་འདེབས་སྦེ་ གནང་ཡོདཔ་ཨིན་པས། དེ་ཡང་ ནེ་པཱལ་གྱི་ དཀའ་སྡུག་ཅན་གྱི་ དུས་སྐབས་འདི་ཁར་ ནེ་པཱལ་གྱི་གཞུང་དང་ མི་སེར་ཚུ་ལུ་ གཅིག་སྒྲིལ་དང་ མཛའ་བཤེས་ཀྱི་ཚུལ་ལུ་ རྒྱལ་ཁབ་ ༢ ཀྱི་བར་ན་ ཡུན་རིང་གི་བར་ན་གནསམི་ མཐུན་ལམ་ཟབ་མོའི་ བརྡ་མཚོན་སྟོན་ནུག།
སྤྱི་ཟླ་ ༨ པའི་ཚེས་ ༢༧ ལུ་ མི་དབང་མངའ་བདག་རིན་པོ་ཆེའི་ཞབས་ལས་ རྒྱལ་ཡོངས་ཚོགས་འདུའི་ ཚོགས་དཔོན་དང་ ནང་སྲིད་བློན་པོ་ དེ་ལས་ ནུས་ཤུགས་དང་ རང་བཞིན་ཐོན་སྐྱེད་བློན་པོ་ཚུ་ བསྐོ་བཞག་ཐོག་ལུ་ བཀྲིས་ལེགས་དར་ཚུ་ གནང་ཡོདཔ་མ་ཚད་ ལྡོག་ཕྱོགས་འགོ་ཁྲིདཔ་ལུ་ཡང་ བཀབ་ནེ་ལི་ཝང་ གནང་ཡོདཔ་ཨིན་པས། རྒྱལ་ཡོངས་ཚོགས་འདུའི་ ཚོགས་དཔོན་གསརཔ་ བསྟན་པ་རྡོ་རྗེ་དེ་ ཧེ་མའི་ཚོགས་དཔོན་ དགོངས་ཞུ་འབད་བའི་ཤུལ་ལས་ སྤྱི་ཟླ་ ༨ པའི་ཚེས་ ༡༩ ལུ་ རྒྱལ་ཡོངས་ཚོགས་འདུའི་ དམིགས་བསལ་ལྷན་བཞུགས་ནང་ལས་ བཙག་འཐུ་གྲུབ་ནུག། ལྷན་རྒྱས་གཞུང་ཚོགས་ནང་ ནང་སྲིད་བློན་པོ་གསརཔ་ ལུང་བསྟན་རྡོ་རྗེ་ བསྐོ་བཞག་གནང་ཡོདཔ་དང་ ནུས་ཤུགས་དང་ རང་བཞིན་ཐོན་སྐྱེད་བློན་པོ་གསརཔ་དེ་ བསོད་ནམས་བཀྲིས་ བསྐོ་བཞག་གནང་ཡོདཔ་ཨིན་པས། དེ་ལས་ ལྡོག་ཕྱོགས་འགོ་ཁྲིདཔ་ དྲག་ཤོས་པདྨ་ཚེ་དབང་ལུ་ཡང་ བཀབ་ནེ་ལི་ཝང་ གནང་ཡོད་པའི་གནས་ཚུལ།
པདྨ་དབང་འདུས། སྤྱི་ཟླ་ ༨ པའི་ཚེས་ ༡༧ ལུ་ གཙུག་ལག་གཙོ་འཛིན་འོག་མའི་ ཡིག་ཚང་ནང་སྦེ་ མཐོ་རིམ་སློབ་གྲྭ་གསུམ་གྱི་ གཙོ་འཛིན་གསརཔ་ཚུ་ བསྐོ་བཞག་གི་ རྟེན་འབྲེལ་བརྩིས་ཡོདཔ་ཨིན་པས། དེ་ཡང་ མཁས་དབང་བསོད་ནམས་བཀྲིས་དེ་ རང་བཞིན་ཐོན་སྐྱེད་མཐོ་རིམ་སློབ་གྲྭའི་ གཙོ་འཛིན་དང་ མཁས་དབང་ཕུན་ཚོགས་དབང་འདུས་དེ་ སྤ་རོ་ཤེས་རིག་མཐོ་རིམ་སློབ་གྲྭའི་གཙོ་འཛིན་ དེ་ལས་ ཀུན་བཟང་རྒྱལ་མཚན་དེ་ ཤེས་རབ་རྩེ་མཐོ་རིམ་སློབ་གྲྭའི་ གཙོ་འཛིན་སྦེ་ བསྐོ་བཞག་འབད་ནུག།
པདྨ་དབང་འདུས། སྤྱི་ཟླ་ ༨ པའི་ཚེས་ ༢༥ ལུ་ རྒྱ་པཱན་རྒྱལ་ཁབ་ཀྱི་དོན་ལུ་ འབྲུག་གི་སྐུ་ཚབ་ ཝི་རྣམ་རྒྱལ་དང་ འབྲུག་གི་དོན་ལུ་ རྒྱ་པཱན་གྱི་སྐུ་ཚབ་ ཀེ་ཨི་ཅི་ཨོ་ནོ་གིས་ ནིའུ་དིལླི་ལུ་སྦེ་ མི་སྟོབས་གོང་འཕེལ་ལས་འགུལ་གྱི་དོན་ལས་ དྲན་ཐོ་བརྗེ་སོར་གུ་ མཚན་རྟགས་བཀོད་ནུག། ཆིངས་ཡིག་དེ་གི་འོག་ལུ་ རྒྱ་པཱན་གཞུང་གིས་ འབྲུག་གཞུང་ལུ་ གཞུང་གཡོག་ནང་གི་ ན་གཞོན་འགོ་དཔོན་བདུན་གྱིས་ རྒྱ་པཱན་གྱི་ གཙུག་ལག་སློབ་སྡེ་ཚུ་ནང་ མཐོ་རིམ་གོང་མའི་ ཤེས་ཡོན་སྦྱང་ནིའི་དོན་ལས་ རྒྱ་པཱན་གྱི་ཏི་རུ་ ཡེན་ས་ཡ་ ༡༧༡ དེ་ཅིག་ རྒྱབ་སྐྱོར་སྦེ་ བྱིན་ནི་ཨིན་པས། དེ་ཡང་ མི་སྟོབས་གོང་འཕེལ་གྱི་ སློབ་གཉེར་གྲོགས་རམ་ལས་འགུལ་ གོ་རིམ་གསུམ་པའི་འོག་ལུ་ དྲན་ཐོ་བརྗེ་སོར་དང་པ་ཨིནམ་ད་ དྲན་ཐོ་བརྗེ་སོར་དང་པ་དེ་ སྤྱི་ལོ་ ༢༠༡༨ ལོར་ ཐིམ་ཕུ་ལུ་སྦེ་ རྒྱ་པཱན་གྱི་ ཕྱི་འབྲེལ་བློན་པོ་ ཏཱ་རོ་ཀོ་ནོ་གི་ གཟིགས་སྐོར་སྐབས་ལུ་ མཚན་རྟགས་བཀོད་ནུག།
འབྲུག་རྒྱལ་གཞུང་འགན་ལེན་བདོག་གཏད་བརྗེ་སོར་ཁང་གིས་ དགེ་ལེགས་ཕུག་ལུ་ མའོ་ཆུ་གཙང་ཆུ་བདའ་སྟེ་ བྱང་ཆུབ་མཆོད་རྟེན་ ༡༠༨ བཞེངས་ནི་ཨིན་མིའི་དོན་ལུ་ མ་དངུལ་བསྡུ་ལེན་ བརྩོན་ཤུགས་ཀྱི་ཆ་ཤས་སྦེ་ མི་མང་ལས་ མ་དངུལ་བསྡུ་བླང་གི་ གསལ་བསྒྲགས་ཐོག་ལུ་ རྒྱལ་ཁབ་ནང་འཁོད་ལས་ དངུལ་ཀྲམ་ས་ཡ་ ༢༨.༣༤ དེ་ཅིག་ བསྡུ་བླངས་འབད་ནུག། དེ་ཡང་ མཆོད་རྟེན་ ༡༠༨ ཀྱི་ ལས་འགུལ་སྡེ་ཚན་གྱིས་ མི་མང་ལས་ མ་དངུལ་བསྡུ་བླངས་དེ་ སྤྱི་ཟླ་ ༨ པའི་ཚེས་ ༢༡ ལུ་ ཕྱི་རུའི་ཆུ་ཚོད་ ༥ ལས་ མཚམས་འཇོག་འབད་ནི་གི་ གསལ་བསྒྲགས་འབད་བའི་ཤུལ་ལས་ ཉིན་གྲངས་དག་པ་ཅིག་ནང་ར་ མ་དངུལ་ཞལ་འདེབས་ཕུལ་མི་ ལེ་ཤ་གིས་ ཡར་སེང་སོང་ཡོདཔ་ཨིན་པས། སྤྱི་ཟླ་ ༨ པའི་ཚེས་ ༡༧ ཚུན་འབད་བ་ཅིན་ བསྡུ་བླང་གི་ གསལ་བསྒྲགས་ཐོག་ལས་ དངུལ་ཀྲམ་ས་ཡ་ ༡༧.༡ དེ་ཅིག་ལས་ མ་ཐོབ་རུང་ ཉིན་གྲངས་ ༤ གི་ ནང་འཁོད་ལུ་ དངུལ་ཀྲམ་ས་ཡ་ ༡༡.༢ དེ་ཅིག་ཐོབ་ནུག། […]
པདྨ་དབང་འདུས། རྒྱ་པཱན་གྱི་ མེ་ལོ་ཌི་ ཨིན་ཊར་ནེ་ཤ་ནཱལ་ཚད་འཛིན་གྱིས་ འབྲུག་གཞུང་གསོ་བའི་ལྷན་ཁག་ལུ་ དངུལ་ཀྲམ་ས་ཡ་ ༡༠.༨ གནས་པའི་ སྐྱེས་མ་དང་ མངལ་སྦྲུམ་གྱི་ འཕྲོད་བསྟེན་བཙན་ཐབས་ལུ་ མངལ་སྒོའི་རྒྱུས་སྐུམ་དང་ ཨ་ལོའི་དོན་ཧིང་སྤར་ཚད་ཚུ་ བལྟ་རྟོག་གི་ སྒུལ་ཅན་འཕྲུལ་ཆས་ ༢༠ གྲོགས་རམ་སྦེ་ རྩིས་སྤྲོད་འབད་ཡོདཔ་ཨིན་པས། འཕྲུལ་ཆས་དེ་ཚུ་ འགོ་ཐོག་ལུ་ རྒྱ་པཱན་གཞུང་གི་ དཔལ་འབྱོར་ཚོང་འབྲེལ་དང་ བཟོ་གྲྭ་ལྷན་ཁག་གིས་ མེ་ལོ་ཌི་ ཨིན་ཊར་ནེ་ཤ་ནཱལ་ཚད་འཛིན་བརྒྱུད་དེ་ འབྲུག་གི་གསོ་བའི་ལྷན་ཁག་འོག་གི་ གསོ་བའི་བརྡ་དོན་དང་ ཞིབ་འཚོལ་ལས་ཚན་ལུ་ ཨང་ཅན་རིག་རྩལ་ལུ་ གཞི་བརྟེན་པའི་ ཞིབ་འཚོལ་ཐོག་ལས་ སྐྱེས་མ་དང་ མངལ་སྦྲུམ་གྱི་ གནད་སྡུད་ཚུ་ གོ་དོན་འགྲེལ་བཤད་འབད་ནིའི་ ལས་འགུལ་གྱི་དོན་ལུ་ བྱིན་ཡོདཔ་ད་ ཞིབ་འཚོལ་གྱི་ལས་འགུལ་ མཇུག་བསྡུ་བའི་ཤུལ་ འབྲུག་གཞུང་གསོ་བའི་ལྷན་ཁག་ལུ་ རྩིས་སྤྲོད་འབད་ནུག།