མ་ཡཱན་མར་གྱི་ གཡུས་ཚན་ཅིག་ནང་ གནོད་འཚུབ་བཀལ་མི་ལུ་བརྟེན་ཏེ་ མི་གྲངས་ ༡༥ ལུ་ཤི་རྐྱེན།
ཨེ་བི་སི། མ་ཡཱན་མར་ དྲག་པོའི་སྲིད་གཞུང་གིས་ རྒྱལ་ཁབ་ཀྱི་ དབུས་ཕྱོགས་ལུ་ དལ་བ་མེད་པའི་ གཡུས་ཚན་ཅིག་ནང་ མེ་སྒྱོགས་ལག་ལེན་འཐབ་སྟེ་ མི་གྲངས་ ༡༥ དམར་བསད་འབད་མི་དེ་ དམངས་གཙོའི་རིང་ལུགས་ལུ་ རྒྱབ་སྐྱོར་འབད་མི་ཚུ་ཨིནམ་སྦེ་ ཁ་ཉེས་བཀལ་ཡོད་རུང་ དྲག་ཐོག་ངོ་རྒོལ་འབད་མི་ གཡིབ་དམག་ཚུ་གིས་ ཁ་བཟེད་མ་བཏུབ་ཨིན་པས།དེ་ཡང་ ས་གེང་ཟེར་མི་ ལུང་ཕྱོགས་ཀྱི་ ལྷོ་ཁ་ཐུག་ལུ་ཡོད་མི་ གཡུས་ཚན་ངེ་ཊུན་ཟེར་སར་ མི་སེར་སྲུང་སྐྱོབ་དམག་སྡེ་གིས་ གནོད་འཚུབ་བཀལ་ཏེ་ ལག་པ་གིས་བཟོ་བསྐྲུན་འབད་མི་ མེ་སྒྱོགས་ཚུ་ ལག་ལེན་འཐབ་ནི་དེ་གིས་ མི་གྲངས་ ༡༥ ལུ་ ཤི་རྐྱེན་བྱུང་ཡོདཔ་མ་ཚད་ དགེ་སློང་ ༣ བརྩིས་ཏེ་ མི་གྲངས་ ༧ ལུ་ཡང་ རྨ་སྐྱོན་བྱུང་ཡོདཔ་སྦེ་བཀོད་ནུག།མི་སེར་སྲུང་སྐྱོབ་དམག་སྡེ་ཟེར་མི་ སྡེ་ཚན་དེ་ཡང་ སྤྱི་ལོ་ ༢༠༢༡ སྤྱི་ཟླ་ ༢ པའི་ཚེས་ ༡ ལུ་ དམངས་གཙོའི་རིང་ལུགས་སྒོ་ལས་ བཙག་འཐུ་གྲུབ་མི་ ཨམ་ཨང་སཱན་སུ་ཀི་ལས་ དྲག་པོའི་དམག་སྡེ་གིས་ དབང་ཚད་བཙན་འཕྲོག་འབད་བའི་ཤུལ་ལུ་ རྒྱལ་ཁབ་མཐའ་དབུས་མེད་པར་ ཐོན་ཡོདཔ་ཨིན་པས།སྡེ་ཚན་དེ་ཚུ་གིས་ དྲག་པོའི་སྲིད་གཞུང་ལུ་ ངོ་རྒོལ་འབད་མི་ རྒྱལ་ཡོངས་གཅིག་མཐུན་གྱི་གཞུང་ཟེར་ […]