དགེ་ལེགས་ཕུག་ དྲན་ཤེས་ཁྲོམ་ཚོགས་དང་ ཧ་ཐི་སར་ སློབ་གྲྭ་གིས་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ གཞི་རིམ་སློབ་གྲྭ་གསརཔ་ གོང་འཕེལ་གྱི་ གོ་དོན་ཆིངས་ཡིག་བཟོ་ཡོདཔ།

པདྨ་དབང་འདུས།
སྤྱི་ཟླ་ ༡༡ པའི་ཚེས་ ༢ ལུ་ དགེ་ལེགས་ཕུག་ དྲན་ཤེས་ཁྲོམ་ཚོགས་དབང་འཛིན་དང་ ཧ་ཐི་སར་ སློབ་གྲྭ་སྒེར་སྡེ་ཚད་འཛིན་གྱི་ས་ ཧ་ཐི་སར་ སློབ་གྲྭའི་མདུན་བསྐྱོད་ཀྱི་དོན་ལུ་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ གཞི་རིམ་སློབ་གྲྭ་གསརཔ་ཅིག་ གཞི་བཙུགས་འབད་ནི་སྦེ་ གོ་དོན་ཆིངས་ཡིག་ཅིག་ བཟོ་ཡོདཔ་ཨིན་པས།
དེ་ཡང་ གོ་དོན་ཆིངས་ཡིག་དང་འཁྲིལ་ཏེ་ རྩ་ཕན་ ༢ ཀྱི་ཁ་ཐུག་ལས་ ཨ་ལོའི་གཅེས་སྐྱོང་ལྟེ་བ་ གཞི་བཙུགས་ཐོག་ལས་ སློབ་རིམ་ ༦ པ་ཚུན་ལུ་ གོང་འཕེལ་གཏང་ནི་གི་ ལཱ་ཚུ་འབད་ནི་ཨིནམ་སྦེ་བཀོད་ནུག།
ཧ་ཐི་སར་ སློབ་གྲྭ་གིས་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ སྡོད་མི་ཚུ་གི་དོན་ལུ་ འབྲུག་བཱ་ཀ་ལོ་རི་ཡེཊ་ རྩ་གཞུང་ཐོག་ལས་ ཀླདཔ་དང་ སེམས་ཁམས་ གཟུགས་ཁམས་ མི་སྡེ་དང་འབྲེལ་བ་ དེ་ལས་ ཆོས་དང་འབྲེལ་བའི་ ཀུན་ཚང་གོང་འཕེལ་གྱི་ གནད་དོན་ཁག་ ༥ གི་ནང་ ཤེས་ཡོན་གྱི་ ཞབས་ཏོག་ཚུ་ བསྒྲུབ་ནི་ཨིན་པས།
སློབ་གྲྭ་དེ་ཡང་ སྤྱི་ལོ་ ༢༠༢༨ ལུ་ འགོ་འབྱེད་འབད་ནི་དང་ སློབ་གྲྭ་དེ་ནང་ འབྲུག་དང་ རྒྱལ་སྤྱིའི་སློབ་དཔོན་ཚུ་ བཙུགས་ནི་ཨིནམ་སྦེ་ གནས་ཚུལ་གསར་བཏོན་ནང་བཀོད་ནུག།
དགེ་ལེགས་ཕུག་ དྲན་ཤེས་ཁྲོམ་ཚོགས་དབང་འཛིན་གྱི་ མཉམ་འབྲེལ་བཀོད་ཁྱབ་གཙོ་འཛིན་འགོ་དཔོན་ སིའུ་ཧི་ཨང་ལི་གིས་ དགེ་ལེགས་ཕུག་ དྲན་ཤེས་ཁྲོམ་ཚོགས་ གོང་འཕེལ་གཏང་པའི་སྐབས་ལུ་ བཟའ་ཚང་དང་ མ་འོངས་མི་རབས་ཀྱི་དོན་ལས་ དགོས་མཁོ་ཡོད་པའི་ འཆར་གཞི་ཚུ་ བརྩམ་དགོཔ་དང་ ཤེས་ཡོན་དེ་ འཚོ་རྟེན་རུང་བའི་ ཁྲོམ་ཚོགས་བཟོ་བསྐྲུན་གྱི་ དགོས་དོན་ཅན་གྱི་ ཆ་ཤས་ཅིག་ཨིནམ་ལས་ ད་རེས་ཀྱི་ སློབ་གྲྭ་གསར་བཙུགས་ཀྱི་ འཆར་གཞི་དེ་ གནད་འགག་ཅན་གྱི་ གཞི་འགྱམ་ཅིག་ཨིན་ཟེར་ བཤདཔ་ཨིན་པས།
དྲག་ཤོས་ཨ་རུན་ཀུ་མར་གྱིས་ ཧ་ཐི་སར་སློབ་གྲྭ་དེ་ མི་དབང་མངའ་བདག་རིན་པོ་མཆོག་གི་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་ གཟིགས་སྣང་ལས་ སེམས་སྐུལ་བྱུང་ཡོད་པའི་ སློབ་གྲྭ་ཅིག་ཨིནམ་ད་ དེ་ཡང་ དགེ་ལེགས་ཕུག་གི་ ལམ་སྲོལ་ལུ་ གཞི་བརྟེན་ཏེ་ ཨ་ལོ་དང་ མི་སྡེ་ཡོངས་ཀྱིས་ འབྲུག་གི་ངོ་རྟགས་དང་ ལམ་སྲོལ་ཚུ་ལུ་ བརྩི་བཀུར་ཡོདཔ་ བཟོ་ནི་གི་དོན་ལུ་ཨིན་པའི་ གསལ་བཤད་འབད་ནུག།
གྲོས་འཆར་ཐོག་གི་ སློབ་གྲྭ་དེ་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ སྡོད་མི་ཚུ་གི་དོན་ལུ་ ཤེས་ཡོན་དང་ མི་སྡེའི་འཚོ་བ་ དེ་ལས་ ཞབས་ཏོག་ཚུ་ཡོད་པའི་ འཚོ་རྟེན་རུང་བའི་ ཁྲོམ་ཚོགས་བཟོ་བསྐྲུན་འབད་ནི་ལུ་ ཁྱབ་ཆེ་བའི་ བརྩོན་ཤུགས་ཀྱི་ ཆ་ཤས་ཅིག་ཨིན་པས།
གོ་དོན་ཆིངས་ཡིག་དེ་ཡང་ རྩ་ཕན་ ༢ ཀྱི་བར་ན་ མཉམ་འབྲེལ་འགོ་བཙུགས་ཀྱི་ བརྡ་མཚོན་ཅིག་ཨིནམ་ལས་ མཉམ་འབྲེལ་ཐོག་གི་ འཆར་གཞི་ཁ་གསལ་ཚུ་ ཡར་འཕེལ་དང་འཁྲིལ་ཏེ་ ཁྱབ་སྤེལ་འབད་ནི་ཨིནམ་སྦེ་བཀོད་ནུག།
དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་ དཔལ་འབྱོར་ཡར་འཕར་དང་ ཐོན་རིམ་ཅན་གྱི་ བཟོ་གྲྭ་ཚུ་ལུ་ རྒྱབ་སྐྱོར་འབད་ནི་གི་དོན་ལས་ ཤུལ་མའི་མི་རབས་ཀྱི་ རིག་རྩལ་དང་ འབྲུག་གི་ན་གཞོན་ཚུ་ལུ་ རིག་རྩལ་གྱི་ལྕོགས་གྲུབ་དང་ ཤེས་ཡོན་ དེ་ལས་ གསར་བཏོད་ཀྱི་ ལྕོགས་གྲུབ་ཚུ་ཡོདཔ་ བཟོ་ནིའི་དོན་ལུ་ ཤེས་རིག་དེ་ གནད་དོན་གཙོ་བོ་ཅིག་ཨིན་ཟེར་ བཀོད་འདུག་པའི་གནས་ཚུལ།