དགེ་ལེགས་ཕུག་ དྲན་ཤེས་ཁྲོམ་ཚོགས་དབང་འཛིན་གྱིས་ པ་ཏེལ་གི་རིན་ཊེག་དང་གཅིག་ཁར་ འབྲུག་གི་འཕྲུལ་ལྟོ་བསྡུ་སྒྲིག་དང་ བཟོ་བཏོན་མཐུན་རྐྱེན་དང་པའི་དོན་ལུ་ ཀུན་སློང་ཡིག་ཆ་གུ་ མཚན་རྟགས་བཀོད་ཡོདཔ།

སྤྱི་ཟླ་ ༡༡ པའི་ཚེས་ ༢ ལུ་ དགེ་ལེགས་ཕུག་ དྲན་ཤེས་ཁྲོམ་ཚོགས་དབང་འཛིན་གྱིས་ རྒྱ་གར་གྱི་མངའ་སྡེ་ གུ་ཇ་རཱཏ་ལུ་ གཞི་གནས་འབད་དེ་ཡོད་མི་ གཙང་དག་ནུས་ཤུགས་ལས་སྡེ་ པ་ཏེལ་གི་རིན་ཊེག་དང་གཅིག་ཁར་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ བཟོ་བཏོན་དང་ བསྡུ་སྒྲིག་མཐུན་རྐྱེན་ གཞི་བཙུགས་ཀྱི་དོན་ལུ་ ཀུན་སློང་ཡིག་ཅིག་གུ་ མཚན་རྟགས་བཀོད་ནུག།
མཐུན་རྐྱེན་དེ་ནང་ལས་ འཕྲུལ་ལྟོའི་ནུས་ཤུགས་ སྲུང་མཛོད་རིམ་ལུགས་ཚུ་ བཟོ་བཏོན་འབད་ནི་དང་ དེ་ཚུ་ཡང་ ཉིན་དྲོད་དང་ རླུང་ཤུགས་ ཆུར་བརྟེན་ནུས་ཤུགས་ཚུ་གི་ འཛིན་ཆས་ཚུ་གི་ཐོག་ལས་ བཟོ་བཏོན་འབད་ནི་ཨིན་པས།
མཐུན་རྐྱེན་དེ་ཡང་ གོ་རིམ་གཉིས་སྦེ་ གཞི་བཙུགས་འབད་ནི་གི་ འཆར་གཞི་ཡོདཔ་ད་ མཐུན་རྐྱེན་དེ་གི་ བཟོ་བསྐྲུན་ལྕོགས་གྲུབ་དེ་ གི་ག་ཝཱཊ་ཨ་ཝར་ ༡༠ ཚུན་འོང་ནི་ཨིནམ་སྦེ་བཀོད་ནུག།
དེ་ཡང་ འབྲུག་ལུ་ འཕྲུལ་ལྟོའི་ནུས་ཤུགས་སྲུང་མཛོད་རིམ་ལུགས་ དང་པ་སྦེ་ གནས་ནི་ཨིནམ་ད་ མཐུན་རྐྱེན་དེ་གིས་ ཆུར་བརྟེན་ནུས་ཤུགས་སྤྱོད་ཐོག་ལས་ འཕྲུལ་ལྟོ་སྡེ་ཚན་དང་ ནུས་ཤུགས་འཛིན་ཆས་ཚུ་ བཟོ་བཏོན་འབད་དེ་ འབྲུག་གི་ཚོང་མགྲོན་པ་དང་ ལུང་ཕྱོགས་ནང་གི་ ཚོང་མགྲོན་པ་ཚུ་ལུ་ མ་སྤེལ་བའི་ཧེ་མར་ བསྡུ་སྒྲིག་དང་ བརྟག་དཔྱད་ཀྱི་ ལམ་ལུགས་ཚུ་ མཇུག་བསྡུ་དགོཔ་ཨིན་པས།
དགེ་ལེགས་ཕུག་ དྲན་ཤེས་ཁྲོམ་ཚོགས་དབང་འཛིན་གྱི་ མཉམ་འབྲེལ་བཀོད་ཁྱབ་གཙོ་འཛིན་འགོ་དཔོན་ སིའུ་ཧི་ཨང་ལི་གིས་ ད་རེས་ ཀུན་སློན་ཡིག་ཆ་གུ་ མཚན་རྟགས་བཀོད་མི་དེ་གིས་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ གཙང་དག་འཕྲུལ་རིག་བཟོ་བཏོན་གྱི་ གཞི་རྟེན་གྱི་དོན་ལུ་ གལ་ཆེ་བའི་ གོམ་པ་མདུན་སྤོའི་ བརྡ་མཚོན་ཨིན་ཟེར་བཤད་ནུག།
ཁོ་གིས་འབད་བ་ཅིན་ རྒྱལ་སྤྱིའི་ནུས་ཤུགས་ གཞི་སྒྱུར་ནང་ལུ་ འཕྲུལ་ལྟོའི་ནུས་ཤུགས་འཛིན་ཆས་དེ་ གལ་ཅན་ཅིག་ཨིནམ་ད་ དེ་གི་ཁེ་ཕན་ཡང་ མ་འདྲཝ་ཅིག་ར་ཡོདཔ་ལས་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་ འཆར་སྣང་ལྟར་དུ་ འབྲུག་མི་ཚུ་གི་དོན་ལས་ རིག་རྩལ་ཅན་གྱི་ ལཱ་གཡོག་བཏོན་ནི་དང་ ས་གནས་ཀྱི་བཟོ་གྲྭ་གོང་འཕེལ་དོན་ལུ་ པ་ཏེལ་གི་རིན་ཊེག་དང་གཅིག་ཁར་ ལཱ་འབད་ནི་གི་ སྤྲོ་བ་ཡོད་ལུགས་ཡང་ བཤདཔ་ཨིན་པས།
དེ་བཟུམ་སྦེ་ པ་ཏེལ་གི་རིན་ཊེག་གི་ བཀོད་ཁྱབ་གཙོ་འཛིན་འགོ་དཔོན་ མ་ནི་མ་རཱན་ ཀི་རིཤ་ནཱན་གྱིས་ ད་རེས་ ཀུན་སློང་ཡིག་ཆ་གུ་ མཚན་རྟསག་བཀོད་མི་དེ་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ ཁོང་གིས་ གྲལ་གཏོགས་འགོ་བཙུགས་པའི་ དུས་སྐབས་ཅིག་ཨིནམ་ད་ ཁོང་གི་ཁ་ཐུག་ལས་ ལས་དོན་དེ་ནང་ མ་རྩ་གཞི་བཙུགས་ཀྱི་ ཁས་ལེན་འབདཝ་ཨིནམ་སྦེ་ཡང་ བཤད་ཡོདཔ་ཨིན་པས།
ད་ལས་ཕར་ རྩ་ཕན་གཉིས་ཀྱིས་ ལས་འགུལ་གྱི་ སྙན་ཞུ་རྒྱསཔ་ཅིག་ བཟོ་ཐོག་ལས་ ཆིངས་ཡིག་ངེས་གསལ་ཅན་གྱི་དོན་ལུ་ ལཱ་ཚུ་འབད་ནི་དང་ མཐུན་རྐྱེན་གོང་འཕེལ་གཏང་པའི་སྐབས་ལུ་ རིག་རྩལ་ཅན་གྱི་ བཟོ་བཏོན་གྱི་ ལཱ་གཡོག་ཚུ་ འཐོན་ནི་གིས་མ་དོ་བར་ ས་གནས་ཀྱི་ མཁོ་ཆས་བཀྲམ་སྤེལ་བ་ཚུ་གི་དོན་ལུ་ཡང་ གོ་སྐབས་གསརཔ་ཚུ་ འཐོན་ནི་གི་ རེ་བ་ཡོདཔ་སྦེ་བཤད་ནུག།
དེ་ཡང་ མི་དབང་མངའ་བདག་རིན་པོ་ཆེའི་ཞབས་ལས་ བྱང་ཆུབ་མཆོད་རྟེན་ ༡༠༨ གསར་བཞེངས་གནང་པའི་ ཉིནམ་ ༡ གི་ཤུལ་ལས་ དགེ་ལེགས་ཕུག་ལུ་སྦེ་ ཀུན་སློང་ཡིག་ཆ་གུ་ མཚན་རྟགས་བཀོད་ཡོད་པའི་གནས་ཚུལ།