ཨ་མཱན་སྡེ་ཚན་དང་ པེ་ཤི་ཡེནཛ་ ཀེ་པི་ཊལ་སྡེ་ཚན་ ཇི་ཌི་ཨེལ་རེ་བེན་ཚུ་གིས་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ མ་འོངས་དྲན་ཤེས་ཅན་ འཚོ་རྟེན་གྱི་དོན་ལུ་ མཉམ་འབྲེལ་ཆིངས་ཡིག།

པདྨ་དབང་འདུས།
སྤྱི་ཟླ་ ༡༡ པའི་ཚེས་ ༡ ལུ་ ཨ་མཱན་སྡེ་ཚན་དང་ པེ་ཤི་ཡེནཛ་ ཀེ་པི་ཊལ་སྡེ་ཚན་ དེ་ལས་ གི་རིན་ཌི་ཇི་ཊལ་ཚད་འཛིན་གྱི་ཡན་ལག་ ཇི་ཌི་ཨེལ་རེ་བེན་ཚུ་གིས་ མི་དབང་མངའ་བདག་རིན་པོ་ཆོ་མཆོག་གི་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་ དགོངས་བཞེད་སྒྲུབ་ཐབས་ལུ་ ཐབས་བྱུས་ཅན་གྱི་ རྒྱབ་སྐྱོར་ཕུལ་ནིའི་དོན་ལས་ གོ་དོན་ཆིངས་ཡིག་ཅིག་ བཟོ་ཡོདཔ་ཨིན་པས།
མཉམ་འབྲེལ་དེ་གིས་ རྒྱལ་སྤྱིའི་གནས་ཚད་ཁར་ དལ་ཉམས་མགྲོན་སྐྱོང་དང་ རྒྱལ་སྤྱིའི་མ་རྩ་གཞི་བཙུགས་ དེ་ལས་ ཡུན་བརྟན་དང་ དྲན་ཤེས་ཅན་གྱི་ མ་འོངས་པའི་དོན་ལུ་ འབྲུག་གི་རེ་འདུན་ཚུ་ གཅིག་ཁར་བསྡུཝ་ཨིནམ་སྦེ་བཀོད་ནུག།
དེ་ཡང་ ཨ་མཱན་སྡེ་ཚན་གྱིས་ རྒྱལ་སྤྱིའི་གནས་ཚད་ཁར་ མགྲོན་སྐྱོང་དང་ འཚོ་རྟེན་གྱི་ མཁས་རིག་དང་སྦྲགས་ཏེ་ ལོ་ངོ་བཅུ་ཕྲག་ལས་ལྷག་པའི་ དུས་ཡུན་ནང་ དལ་ཉམས་མགྲོན་སྐྱོང་ ལག་ལེན་འཐབ་མི་་ཨིན་པའི་ ངོ་རྟགས་ཅན་གྱི་ ལཱ་ཤུལ་གྱི་སྒོ་ལས་ ཁེ་ཕན་འབད་ནི་ཨིན་པས།
དེ་བཟུམ་སྦེ་ པེ་ཤི་ཡེནཛ་ ཀེ་པི་ཊལ་སྡེ་ཚན་གྱི་ ཁ་ཐུག་ལས་ མ་དངུལ་དང་ གཞི་ཁྱིམ་འཛིན་སྐྱོང་གི་ ཉམས་མྱོང་ཚུ་གི་སྒོ་ལས་ ཕན་ཐབས་འབད་ནི་དང་ ཇི་ཌི་ཨེལ་རེ་བེན་གྱིས་ དགེ་ལེགས་ཕུག་ དྲན་ཤེས་ཁྲོམ་ཚོགས་གོང་འཕེལ་ལུ་ རྒྱབ་སྐྱོར་གྱི་ འགན་ཁུར་འབག་ནི་ཨིནམ་སྦེ་བཀོད་ནུག།
ཁོང་ཆ་ཁྱབ་ མཉམ་རུབ་ཐོག་ལས་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་ རེ་འདུན་ཚུ་ སྒྲུབ་ནི་ལུ་ རྒྱབ་སྐྱོར་གྱི་ འགན་ཁུར་ཚུ་ཡང་ རང་བཞིན་གནས་སྟངས་དང་ ལམ་སྲོལ་ མཉམ་བསྡོམས་ཀྱི་ ཕན་བདེ་ཚུ་ལུ་ བརྩི་མཐོང་བསྐྱེད་དེ་ འབག་ནི་ཨིནམ་ལས་ མི་དབང་མངའ་ཞབས་མཆོག་གི་ དགོངས་འཆར་དང་བསྟུན་ཏེ་ དྲན་ཤེས་ཁྲོམ་ཚོགས་དེ་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ ལྟ་བ་གིས་ ལམ་སྟོན་ཐོག་ལས་ གོང་འཕེལ་གཏང་ནི་དང་ ཚུལ་མཐུན་ཨིནམ་སྦེ་ བཤདཔ་ཨིན་པས།
གོ་དོན་ཆིངས་ཡིག་གུ་ མཚན་རྟགས་ཚུ་ཡང་ དགེ་ལེགས་ཕུག་གི་ མཆོད་རྟེན་ ༡༠༨ ཀྱི་ ལས་འགུལ་གྱི་ ས་ཁོངས་ནང་སྦེ་ བཀོད་ཡོདཔ་ཨིན་པའི་གནས་ཚུལ།