ཨི་ཊ་ལི་ལུ་ ཆང་བཟོ་འཕྲུལ་ཁང་ཅིག་གི་ནང་ལས་ ཡུ་རོ་ས་ཡ་ ༥ གནས་པའི་ ཆང་ཤེལ་དམ་ ༣༠,༠༠༠ ཨརཝ་ཤོར་ཡོདཔ།

བི་བི་སི།
སྤྱི་ཟླ་ ༡༠ པའི་ཚེས་ ༩ ལུ་ ཨརཝ་ཚུ་གིས་ ཨི་ཊ་ལིའི་ མིང་གཏམ་ཅན་གྱི་ ཆང་བཟོ་འཕྲུལ་ཁང་ཅིག་གི་ནང་ལས་ གོང་ཚད་ཡུ་རོ་ས་ཡ་ ༥ དེ་ཅིག་གནས་པའི་ ཝ་ཡིན་ཟེར་མི་ ཆང་རིགས་ཤེལ་དམ་ ༣༠,༠༠༠ དེ་ཅིག་ ཨརཝ་བརྐུ་ནུག།
ཨི་ཊ་ལིའི་ བཟའ་ཚང་གི་ བདག་དབང་ཐོག་ལུ་ ཆང་བཟོ་འཕྲུལ་ཁང་སྦོམ་ཤོས་ཅིག་ཨིན་མི་ མར་ཅེ་སི་ ཨེན་ཊི་ནོ་རི་ལས་སྡེ་གིས་ བཤད་དོ་བཟུམ་འབད་བ་ཅིན་ ཊཱཛ་ཀ་ནི་ལུ་ཡོད་པའི་ ཆང་བཟོ་འཕྲུལ་ཁང་གིས་ ཕྱི་རྒྱལ་གྱི་ ཚོང་མགྲོན་པ་ཚུ་ལུ་ གྲུ་གཟིངས་ཐོག་ལས་ གཏང་ནི་སྦེ་ གྲ་སྒྲིག་འབད་བའི་སྐབས་ལུ་ ཨརཝ་ཤོར་ཡི་ཟེར་ཨིན་པས།
དེ་བསྒང་ གདོང་སྤུར་མི་ ཨར་ཇག་ཕོ་སྐྱེས་ ༧ གྱིས་ ཆང་བཟོ་འཕྲུལ་ཁང་ལས་སྡེའི་ དོ་སྐྱེལ་འཕྲུལ་ཆས་ཚུ་ ལག་ལེན་འཐབ་སྟེ་ གོང་ཚད་ཅན་གྱི་ ཆང་རིགས་ཝ་ཡིན་ ཊི་ག་ནེ་ལོ་དང་ སོ་ལའི་ཡ་ གུ་ཌོ་ཨཱལ་ ཊ་སོ་ ཊཱཛ་ཀཱན་དམརཔོ་ཚུ་ སྣུམ་འཁོར་ཊག་ ༢ ནང་ བསྐྱལ་ཞིནམ་ལས་ འབག་སོང་ཡོདཔ་སྦེ་བཀོད་ནུག།
ཆང་བཟོ་འཕྲུལ་ཁང་ལས་སྡེའི་ བཀོད་ཁྱབ་གཙོ་འཛིན་ རེན་ཟོ་ཀོ་ཊ་རེ་ལ་གིས་ བཤད་དོ་བཟུམ་འབད་བ་ཅིན་ ཨི་ཊ་ལི་ལུ་ དེ་བཟུམ་མའི་ ཨརཝ་བརྐུ་མི་དེ་ སྦོམ་ཤོས་ཅིག་ཨིན་རུང་ འཚོལ་ཞིབ་འབད་ཚུགས་པའི་ རེ་བ་ཡོདཔ་ཨིན་པས།
དེ་ཡང་ ཊུཛ་ཀཱན་གྱི་ འཁོར་ལམ་བདའ་སྟེ་ དཔར་ཆས་ཚུ་ ལྟེམ་ལྟེམ་སྦེ་ བཙུགས་ཏེ་ཡོདཔ་ལས་ ཨརཝ་ཤོར་མི་ ཆང་གི་དམ་སྦྱིས་ལ་ལུ་ཅིག་ ལོག་འཐོབ་ཚུགས་པའི་ རེ་འདོད་ཡོདཔ་སྦེ་ བཀོད་ཁྱབ་གཙོ་འཛིན་གྱིས་ གསལ་བཤད་འབད་ནུག།
མར་ཅེ་སི་ ཨེན་ཊི་ནོ་རི་ ཆང་བཟོ་འཕྲུལ་ཁང་དེ་ སྤྱི་ལོ་ ༡༣༨༥ ལུ་ གཞི་བཙུགས་འབད་བའི་ཤུལ་ལས་ ད་རེས་ནངས་པ་ འཛམ་གླིང་ནང་ རྒྱལ་ཁབ་ ༡༧༠ དེ་ཅིག་ལུ་ ཕྱིར་ཚོང་འཐབ་དོ་ཡོདཔ་ད་ དུས་ཅི་ ཨི་ཊ་ལི་ལུ་ ཆང་ཨརཝ་ཤོར་མི་ མང་སུ་ཅིག་ ཐོན་ཡོདཔ་ཨིན་པས་ཟེར་ བཀོད་འདུག་པའི་གནས་ཚུལ།