སྤྱི་ཟླ་ ༡༢ པའི་ཚེས་ ༢༣ ལུ་ མི་དབང་མངའ་བདག་རིན་པོ་ཆེ་མཆོག་དང་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ དགེ་ལེགས་ཕུག་ལུ་ འབྱུང་རབས་ཅན་གྱི་ འཐུང་ཆུའི་ལས་འགུལ་ཅིག་ འགོ་འབྱེད་རྟེན་འབྲེལ་ མཛད་གནང་ནུག།
སྤྱི་ལོ་ ༢༠༢༢ སྤྱི་ཟླ་ ༤ པའི་ནང་ལས་ འགོ་བཙུགས་མི་ ལས་འགུལ་དེ་ བདེ་སྲུང་དང་ བདེ་སྲུང་རྒྱལ་ཡོངས་ཞབས་ཏོག་ལས་འགུལ་གྱིས་ རྒྱལ་ཁབ་མཐའ་དབུས་མེད་པར་ ལག་ལེན་འཐབ་མི་ ལས་འགུལ་ ༤༠ གི་ནང་ལས་ ག་ནི་བ་ སྦོམ་ཤོས་ཨིན་པས།
དེ་བཟུམ་མའི་ རྒྱལ་རབས་ཅན་གྱི་ ལས་འགུལ་དེ་གིས་ དགེ་ལེགས་ཕུག་གི་ ཁྲོམ་ཡོངས་རྫོགས་དང་ ཉེ་འདབས་ཀྱི་ རྒེད་འོག་ལ་ལོ་ཅིག་ལུ་ ཁྱབ་སྟེ་ཡོདཔ་ད་ དེ་ཡང་ དགེ་ལེགས་ཕུག་ ཁྲོམ་སྡེ་དང་ གཞི་རྟེན་མཁོ་ཆས་དང་ སྐྱེལ་འདྲེན་ལྷན་ཁག་ ༢ མཉམ་འབྲེལ་ཐོག་ལས་ ལག་ལེན་འཐབ་ནུག།
ལས་འགུལ་དེ་ དཔེ་སྟོན་བཏུབ་པའི་ འཛིན་སྐྱོང་ཐོག་ལུ་ དངུལ་ཀྲམ་ས་ཡ་ ༣༧༥ དེ་ཅིག་ ཟད་འགྲོ་བཏང་སྟེ་ ཟླ་ངོ་ ༡༩ གི་ ནང་འཁོད་ལུ་ བསྒྲུབས་ཡོདཔ་ད་ འགོ་ཐོག་ཚད་རྩིས་འཆར་དངུལ་ དངུལ་ཀྲམ་ས་ཡ་ ༤༧༧ བགོ་བཀྲམ་འབད་ཡོདཔ་ཨིན་པས།
བདེ་སྲུང་རྒྱལ་ཡོངས་ཞབས་ཏོག་གི་ འཐུང་ཆུའི་ལས་འགུལ་ཚུ་ དེང་དུས་ཀྱི་ འཕྲུལ་རིག་གསརཔ་དང་ གནས་ཚད་ཅན་སྦེ་ ལག་ལེན་འཐབ་མི་ཚུ་གི་གྲས་ལས་ དགེ་ལེགས་ཕུག་གི་ ལས་འགུལ་དེ་ ག་ནི་བ་ཡང་ དྲག་ཤོས་ཅིག་སྦེ་ཐོན་ནུག།
ལས་འགུ་དེ་གི་ གཞི་རྟེན་མཁོ་ཆས་ཚུ་ནང་ ཁྱབ་ཆེ་བའི་ འཐུང་ཆུའི་བརྒྱུད་དུང་དང་ ཆུའི་རྐ་འགོ་ལས་ སྙིགས་རོ་བསག་མཛོད་ཚུན་ ག་ནི་བ་ བཙན་ཏོག་ཏོ་གི་ ཆུ་འདྲེན་སྒྲིག་བཀོད་ཚུ་དང་ འཐུང་ཆུ་སྨན་བཅོས་འཕྲུལ་ཁང་ཚུ་ ཚུད་དེ་ཡོདཔ་ད་ འཐུང་ཆུ་དེ་ཡང་ ཀི་ལོ་མི་ཊར་ ༩.༧ ལྷགཔ་ཅིག་ལས་ འཐེན་ཡོདཔ་ཨིན་པས།
ལས་འགུལ་དེ་ནང་ སྙིགས་རོ་བཙག་ནི་དང་ ཆུ་དུང་ལག་ལེན་ཚུ་དང་འབྲེལ་བའི་ ལཱ་ཚུ་ནང་ ལྷོ་ཀོ་རི་ཡ་དང་ མཐའ་ཡས་ལེན་ལས་ རྒྱལ་སྤྱིའི་འཕྲུལ་རིག་མཁས་མཆོག་ཚུ་གིས་ གྲལ་གཏོགས་འབད་ནུག།
ལས་འགུལ་དེ་ནང་ བདེ་སྲུངཔ་ ༢༣༠ ལྷགཔ་ཅིག་གིས་ གྲལ་གཏོགས་འབད་དེ་ གཙང་སྦྲ་དང་ལྡན་པའི་ ཡུན་བརྟན་ཅན་གྱི་ འཐུང་ཆུ་བཏོན་ཡོདཔ་མ་ཚད་ བདེ་སྲུངཔ་ཚུ་ལུ་ཡང་ དེ་བཟུམ་མའི་ ལས་འགུལ་ཚུ་ བཟོ་བསྐྲུན་འབད་ནི་དང་ འཛིན་སྐྱོང་འཐབ་ནི་གི་ རིག་རྩལ་དང་ ཡོན་ཏན་ཚུ་ཡང་ ཐོབ་ཡོདཔ་ཨིན་པས།
བདེ་སྲུང་རྒྱལ་ཡོངས་ཞབས་ཏོག་ལས་འགུལ་དེ་ ནད་ཡམས་ཀྱི་སྐབས་ལུ་ མི་དབང་མངའ་བདག་རིན་པོ་ཆེ་མཆོག་གི་ བཀའ་རྒྱ་དང་འཁྲིལ་ཏེ་ བདེ་སྲུངཔ་ཚུ་གིས་ གལ་གནད་ཅན་གྱི་ རྒྱལ་ཡོངས་ལས་འགུལ་ཚུ་ནང་ གྲལ་གཏོགས་འབད་ཐབས་ལུ་དང་ འབྲུག་ལུ་ སྤུས་ཚད་ཅན་གྱི་ གཞི་རྟེན་མཁོ་ཆས་དང་ མཐུན་རྐྱེན་ཚུ་ གོང་འཕེལ་གཏང་ནི་གི་ ལྕོགས་གྲུབ་འཐོབ་ཐབས་ལུ་ འགོ་བཙུགས་ཡོད་པའི་གནས་ཚུལ།
དགེ་ལེགས་ཕུག་ལུ་ འབྱུང་རབས་ཅན་གྱི་ འཐུང་ཆུའི་ལས་འགུལ་གྱི་ འགོ་འབྱེད་རྟེན་འབྲེལ།
Comments are closed.
Related
སྤ་རོ་རྫོང་ཁག་གི་ ལོ་བསྟར་སྨོན་ལམ་ཆེན་མོ་ འགོ་བཙུགས་གནང་ཡོདཔ།
མེ་རྟ་ཟླཝ་ ༨ པའི་ཚེས་ ༣༠ སྤྱི་ཟླ་ ༡༠ པའི་ཚེས་ ༡༠ ལས་ ཉིན་གྲངས་ ༣ གྱི་རིང་ལུ་ སྐྱབས་རྗེ་རྗེ་མཁན་རིན་པོ་ཆེ་མཆོག་ དབུ་བཞུགས་ཐོག་ལས་ སྤ་རོ་རྫོང་ཁག་གི་ འཛམ་གླིང་ཞི་བདེའི་ ལོ་བསྟར་སྨོན་ལམ་ཆེན་མོ་ འགོ་བཙུགས་གནང་ནུག། དེ་ཡང་ རང་ཟླ་ ༨ པའི་ཚེས་ ༡༥ སྤྱི་ཟླ་ ༩ པའི་ཚེས་ ༢༦ ལས་ བདུན་ཕྲག་ ༢ ཀྱི་རིང་ལུ་ དཔལ་ལྡན་འབྲུག་པའི་ བཀའ་ཁྲིད་གནང་མི་དེ་ རང་ཟླ་ ༨ པའི་ཚེས་ ༢༩ སྤྱི་ཟླ་ ༡༠ པའི་ཚེས་ ༩ ལུ་ བླ་མ་དགོངས་པ་འདུས་པའི་ བཀའ་དབང་ཡོངས་རྫོགས་གནང་སྟེ་ གྲོལ་གནང་མི་དང་ འཕྲོ་མཐུད་དེ་ར་ སྨོན་ལམ་ཆེན་མོ་ ཐེངས་ ༡༢ པ་དེ་ གནང་དོ་ཡོདཔ་ཨིན་པས། དེ་བསྒང་ སྤ་རོ་ལུ་ སྐྱབས་རྗེ་རིན་པོ་ཆེའི་ཞབས་ལས་ བཀའ་ཁྲིད་ཟབ་མོ་དང་ […]
མི་དབང་མངའ་ཞབས་མཆོག་གིས་ འཛམ་གླིང་སྤྱི་ཚོགས་ཀྱི་ ཞི་བདེ་ཉེན་སྲུང་སྡེ་ཚན་དང་གཅིག་ཁར་ མཇལ་ཕྲད་མཛད་གནང་ཡོདཔ།
པདྨ་དབང་འདུས། སྤྱི་ཟླ་ ༡༠ པའི་ཚེས་ ༧ ལུ་ མི་དབང་མངའ་བདག་རིན་པོ་ཆེ་མཆོག་གིས་ སྤ་རོ་ལུ་སྦེ་ འཛམ་གླིང་སྤྱི་ཚོགས་ཀྱི་ ཞི་བདེ་ཉེན་སྲུང་སྡེ་ཚན་དང་གཅིག་ཁར་ མཇལ་ཕྲད་མཛད་གནང་ཡོདཔ་ད་ སྡེ་ཚན་དེ་གིས་ མགྱོགས་པ་ར་ སེན་ཊྲཱལ་ཨཕ་རི་ཀཱན་ རི་པབ་ལིག་ནང་ ཞི་བདེའི་ལཱ་ཚུ་འབད་ནི་ཨིན་པས། འཐུས་མི་ ༡༨༠ འབད་མི་ སྡེ་ཚན་དེ་ནང་ ཨམ་སྲུ་ ༡༣ ཡོདཔ་ད་ སྡེ་ཚན་དེ་ཡང་ ནང་གསེས་སྡེ་ཚན་ཁག་ ༢ ལས་ སྡེ་ཚན་དང་པ་དེ་ སྤྱི་ཟླ་ ༡༠ པའི་ཚེས་ ༨ ལུ་ འཕུར་འགྲུལ་འབད་ཡོདཔ་ད་ སྡེ་ཚན་ ༢ པ་དེ་ སྤྱི་ཟླ་ ༡༠ པའི་ཚེས་ ༡༩ ལུ་ འཕུར་འགྲུལ་འབད་ནི་ཨིན་པས། འབྲུག་གིས་ འཛམ་གླིང་སྤྱི་ཚོགས་ཀྱི་ ཞི་བདེ་ཉེན་སྲུང་ནང་ སྤྱི་ལོ་ ༢༠༡༤ ལས་ཚུར་ གྲལ་གཏོགས་འབད་དེ་ཡོདཔ་ད་ སྡེ་ཚན་དེ་ནང་ དམག་མིའི་འགོ་དཔོན་དང་ ལས་བྱེདཔ་ དེ་ལས་ ཁྲིམས་སྲུང་འགག་སྡེའི་ […]
འཇིགས་མེད་རྡོ་རྗེ་དབང་ཕྱུག་ རྒྱལ་ཡོངས་གཙོ་བསྟེན་སྨན་ཁང་ནང་ ཨོམ་གྱི་སྨན་བཅོས་ཁང་གི་ ལོ་འཁོར་དུས་སྟོན་དང་པ་བརྩི་སྲུང་།
སྤྱི་ཟླ་ ༩ པའི་ཚེས་ ༡༣ ལུ་ རྒྱལ་ཡུམ་དགེ་དོན་བློ་གཏད་ཀྱི་སྐྱབས་འཛིན་ མི་དབང་རྒྱལ་ཡུམ་ སངས་རྒྱས་ཆོས་སྒྲོན་དབང་ཕྱུག་མཆོག་གིས་ ཐིམ་ཕུ་འཇིགས་མེད་རྡོ་རྗེ་དབང་ཕྱུག་ རྒྱལ་ཡོངས་གཙོ་བསྟེན་སྨན་ཁང་ནང་ རྒྱལ་བཙུན་རྗེ་བཙུན་པདྨ་སྐྱེས་མ་དང་ ཨ་ལོའི་སྨན་ཁང་ནང་ འབྲུག་གི་ཨོམ་གྱི་སྣ་མང་སྨན་བཅོས་ཁང་དང་པའི་ ལོ་འཁོར་དུས་སྟོན་ཐེངས་དང་པ་ བརྩི་སྲུང་ཞུ་སར་ དབུ་བཞུགས་མཛད་གནང་ནུག། དུས་སྟོན་དེ་ཁར་ གཞན་ཡང་ མཐའ་ཡས་ལེན་གྱི་ རྒྱལ་ཡུམ་སི་རི་ཀིཏ་ ཨོམ་གྱི་ཀེན་སར་གཞི་ཚོགས་ཀྱི་ ཆེད་བསྟོད་མདོ་ཆེན་ ལེགས་སྦྱར་བ་ཌོག་ཊར་ཀི་རིཤ་ན་ཅ་ཏམ་ར་དང་ གསོ་བའི་སྐྱོང་བཞག་གི་ ཁྱད་ལཱ་འབད་མི་དང་ ཆེ་མཐོའི་སྐུ་མགྲོན་ཚུ་གིས་ཡང་ གྲལ་གཏོགས་འབད་ཡོདཔ་ཨིན་པས། ཨོམ་གྱི་སྨན་བཅོས་ཁང་དེ་ གསོ་བ་ལྷན་ཁག་དང་ འཇིགས་མེད་རྡོ་རྗེ་དབང་ཕྱུག་ རྒྱལ་ཡོངས་གཙོ་བསྟེན་སྨན་ཁང་ དེ་ལས་ རྒྱལ་ཡུམ་དགེ་དོན་བློ་གཏད་དང་ རྒྱལ་ཡུམ་སི་རི་ཀིཏ་ ཨོམ་གྱི་ཀེན་སར་གཞི་ཚོགས་བཅས་ཀྱི་ མཉམ་འབྲེལ་ལས་སྣ་ཅིག་ཨིནམ་ད་ སྨན་བཅོས་ཁང་དེ་ གཞི་བཙུགས་དང་ གོང་ཕེལ་ལུ་ ལེགས་སྦྱར་བ་ ཌོག་ཊར་ཀི་རིཤ་ན་ཅ་ཏམ་ར་གིས་ གཏོང་ཕོད་ཅན་གྱི་ ཞལ་འདེབས་དང་ ཁས་ལེན་ སློབ་སྟོན་ཚུ་གི་སྒོ་ལས་ རྒྱབ་སྐྱོར་འབད་ཡོདཔ་མ་ཚད་ ཁོ་གིས་ འབྲུག་དང་གཅིག་ཁར་ འཕྲོ་མཐུད་དེ་ར་ མཉམ་འབྲེལ་འབད་དེ་ ཨོམ་གྱི་སྐྱོང་བཞག་ནང་ དམིགས་བསལ་གྱི་ བཙན་ཐབས་དང་ ས་གནས་ཀྱི་ལྕོགས་གྲུབ་ […]