མི་དབང་མངའ་ཞབས་མཆོག་གིས་ ཐིམ་ཕུ་དཀར་སྦིས་ས་ལུ་ རྒྱལ་པོའི་ཞིང་ བརྡ་དོན་འཕྲུལ་རིག་ མཐོ་རིམ་སློབ་གྲྭའི་ ས་ཁོངས་གསར་པའི་ནང་གཟིགས་སྐོར།

སྤྱི་ཟླ་ ༡༠ པའི་ཚེས་ ༢༠ ལུ་ འབཕྲུག་གི་སྤྱི་ནོར་དམ་པ་ མི་དབང་མངའ་བདག་རིན་པོ་ཆེ་མཆོག་གིས་ ཐིམ་ཕུ་དཀར་སྦིས་ས་ལུ་ སྤོ་བཤུད་འབད་དེ་ཡོད་མི་ རྒྱལ་པོའི་ཞིང་ བརྡ་དོན་འཕྲུལ་རིག་ མཐོ་རིམ་སློབ་གྲྭའི་ ས་ཁོངས་ནང་ གློག་རིག་ཐོག་ལས་ ཕན་ཚུན་འབྲེལ་བ་འཐབ་ནི་གི་ རིམ་ལུགས་ཨཱན་བོག་སིང་མེ་ཊ་བརཛ་ ༢༠༢༣ ཟེར་མི་ འཕྲུལ་རིག་འགྲེམ་སྟོན་ནང་ ཆིབས་བསྐྱོད་གནང་ཡོདཔ་མ་ཚད་ སློབ་ཕྲུག་ཚུ་དང་ སློབ་ཚོགས་དང་གཅིག་ཁར་ཡང་ མཇལ་ཕྲད་མཛད་གནང་ནུག།
འགྲེམ་སྟོན་དེ་ནང་ མཐོ་རིམ་སློབ་གྲྭ་དེ་གིས་ གོང་འཕེལ་བཏང་ཡོད་མི་ བརྡ་དོན་འཕྲུལ་རིག་རིམ་ལུགས་དང་ ཞབས་ཏོག་ཚུ་ འགྲེམ་སྟོན་འབད་བའི་ནང་གསལ་ རིག་རྩལ་གསར་པའི་སྒོ་ལས་ བགོ་དང་དཀྱི་རའི་ རིས་མོ་བཀོད་ནི་དང་ རྫོང་ཁ་སླབ་ནི་ལུ་ ནུས་པ་ཡོད་པའི་ འཕྲུལ་རིག་ཐོག་གི་ མི་ལ་སོགས་པ་ཚུ་ཡོདཔ་ཨིན་པས།
ཁོང་གིས་ གོང་འཕེལ་བཏང་མི་ བློ་གླེང་རིམ་ལུགས་ཅིག་ རྒྱ་ཡོངས་ས་ཆ་ལྷན་ཚོགས་དང་ དངུལ་ཁང་ཅིག་གིས་ ཉོ་ཡོདཔ་ད་ དེ་བཟུམ་སྦེ་ སྣུམ་འཁོར་བདའ་བའི་སྐབས་སུ་ གཉིད་ལོག་ནི་བཟུམ་འབདཝ་ད་ དྲན་ཚོར་ཉེན་བརྡའི་ རིམ་ལུགས་ཅིག་ཡང་ གོང་འཕེལ་བཏང་ནུག།
འགྲེམ་སྟོན་སྐབས་ལུ་ རྒྱལ་པོའི་ཞིང་ བརྡ་དོན་འཕྲུལ་རིག་ མཐོ་རིམ་སློབ་གྲྭའི་ བཟོ་གྲྭ་དཔེར་འོས་ ལྕོགས་གྲུབ་ཀྱི་ རྩ་གཞུང་དེ་ཡང་ ལུགས་མཐུན་འགོ་འབྱེད་འབད་སར་ མི་རྗེ་བློན་ཆེན་དང་ ཤེས་རིག་ལས་སྡེའི་ འགོ་དཔོན་ཚུ་གིས་ཡང་ གྲལ་གཏོགས་འབད་ཡོདཔ་ཨིན་པས།
རྒྱལ་པོའི་ཞིང་ བརྡ་དོན་འཕྲུལ་རིག་ མཐོ་རིམ་སློབ་གྲྭ་དེ་ དུས་ཅི་ སྤྱི་ཟླ་ ༨ པའི་ནང་ མོང་སྒར་རྒྱལ་པོའི་ཞིང་ལས་ ཐིམ་ཕུ་དཀར་སྦིས་ས་ལུ་ སྤོ་བཤུད་འབད་ཡོད་པའི་གནས་ཚུལ།