སྤྱི་ཚོགས་གསུམ་པའི་ རྒྱལ་ཡོངས་ཚོགས་འདུ་ཆེན་མོ་ ཚོགས་ཐེངས་ ༡༠ པ་ འཚོགས་གནང་ནི།

སྤྱི་ཚོགས་ ༣ པའི་ རྒྱལ་ཡོངས་ཚོགས་འདུ་ཆེན་མོ་ ཚོགས་ཐེངས་ ༡༠ པ་འདི་ སྤྱི་ཟླ་ ༡༠ པའི་ཚེས་ ༡ ལས་ འགོ་བཙུགས་ཏེ་ སྤྱི་ཟླ་ ༡༠ པའི་ཚེས་ ༢༠ ཚུན་ ཉིན་གྲངས་ ༢༠ གི་རིང་ལུ་ འཚོགས་གནང་ནི་ཨིན་པས།
དེ་ཡང་ སྤྱི་ཟླ་ ༩ པའི་ཚེས་ ༣༠ ལུ་ རྒྱལ་ཡོངས་ཚོགས་འདུའི་ ཡིག་ཚང་ནང་ལས་ གནས་ཚུལ་གསར་བཏོན་ཅིག་ནང་ བཀོད་དོ་བཟུམ་འབད་བ་ཅིན་ ཚོགས་བཞུགས་དེ་ནང་ འབྲུག་གི་རྒྱུ་དངོས་ཁྲལ་གྱི་ (འཕྲི་སྣོན་) དཔྱད་ཡིག་ ༢༠༢༣ ཅན་མ་དང་ བང་ལ་དེཤ་ མི་སེར་རྒྱལ་ཁབ་ཀྱི་གཞུང་དང་ འབྲུག་རྒྱལ་གཞུང་གི་བར་ན་ བརྒྱུད་འགྲུལ་སྐྱེལ་འདྲེན་གྱི་ གན་རྒྱ་དང་ དེའི་དཔྱད་གཞིའི་གན་འཛིན་ཚུ་ལུ་ གསུང་གྲོས་གནང་འོང་ཟེར་ཨིན་པས།
དེ་བཟུམ་སྦེ་ བེང་གཱལ་མཚོ་ཁུག་གི་ འཕྲུལ་རིག་དང་ དཔལ་འབྱོར་མཉམ་འབྲེལ་ཐབས་རིག་གི་ བཀོད་ཁྲིམས་དང་ དབང་པོ་སྐྱོན་ཅན་ཚུ་གི་ ཐོབ་དབང་གི་མཐུན་གྲོས་ དེ་ལས་ འབྲུག་གི་སྐྱེ་ལྡན་བར་ལམ་དགུ་པའི་ དཔྱད་ཡིག་ཚུ་ལུ་ཡང་ གསུང་གྲོས་གནང་ནི་ཨིནམ་སྦེ་ གནས་ཚུལ་གསར་བཏོན་ནང་བཀོད་ནུག།
དེ་ལས་ རྒྱལ་སྤྱིའི་མཐུན་གྲོས་དང་ འདས་པའི་ཚོགས་ཐེངས་ ༩ པའི་ གྲོས་ཆོད་དང་ལེན་ གནས་སྟངས་ཀྱིས་མ་ཚད་པར་ ངན་ལྷད་བཀག་སྡོམ་ལྷན་ཚོགས་ཀྱི་ ལོ་བསྟར་སྙན་ཞུ་ ༢༠༢༢-༢༠༢༣ ཅན་མ་དང་ དམངས་རྩིས་ཚོགས་ཆུང་གི་ ལས་འབྲེལ་རྩིས་ཞིབ་སྙན་ཞུ་ དེ་ལས་ མི་རྗེ་བློན་ཆེན་གྱིས་ གཞུང་གི་ཁྲིམས་བཟོ་དང་ ལོ་བསྟར་འཆར་གཞིའི་གུ་ གཞུང་གི་གཙོ་རིམ་དང་བཅས་པའི་ རྒྱལ་ཁབ་ཀྱི་ གནས་སྟངས་སྐོར་ལས་ སྙན་ཞུ་ཚུ་ ཕུལ་ནི་གི་ ལས་རིམ་ཡང་ཡོདཔ་ཨིན་པའི་གནས་ཚུལ།