མི་དབང་མངའ་བདག་རིན་པོ་ཆེ་མཆོག་ ཀུར་སྟོད་ཨུང་སྒར་ལུ་ ཆུ་རུད་ཐོན་སའི་ ས་ཁོངས་ནང་ཆིབས་བསྐྱོད།

པདྨ་དབང་འདུས།
སྤྱི་ཟླ་ ༧ པའི་ཚེས་ ༢༨ ལུ་ མི་དབང་མངའ་བདག་རིན་པོ་ཆེ་མཆོག་ འཕྲལ་ཁམས་ཅིག་ཁར་ ལྷུན་རྩེ་ཨུང་སྒར་ལུ་ ཆུ་རུད་ཐོན་ཏེ་ མི་གྲངས་ ༢༣ ཕྱགས་བདའ་བའི་ ས་ཁོངས་ནང་ ད་རེས་ཡང་ ཕུངམོ་ཚུ་ འཚོལ་ཞིབ་འབད་བའི་བསྒང་ཡོད་སར་ ཆིབས་བསྐྱོད་གནང་ཡོདཔ་ཨིན་པས།
དེ་ཡང་ མི་དབང་མངའ་ཞབས་མཆོག་ ཕྱི་རྒྱལ་ལས་ སྤྱི་ཟླ་ ༧ པའི་ཚེས་ ༢༣ ལུ་ རྒྱལ་ཁབ་ནང་ ལོག་ཕེབས་པའི་ཤུལ་ལས་ རྒྱལ་ཁབ་ཀྱི་ ཤར་ཕྱོགས་ཁ་ཐུག་ལུ་ ཆིབས་བསྐྱོད་གནང་ནུག།
ཆུ་རུད་ཀྱིས་ རྐྱེན་ངན་བྱུང་མི་ ཉམས་རྒུདཔ་ཚུ་ཡང་ ཡུང་གི་ཆུ་ གློག་མེ་ལས་འགུལ་ བཟོ་བསྐྲུན་གྱི་ ལས་བྱེདཔ་ཚུ་ཨིནམ་ད་ ལ་ལོ་ཅིག་ ཁོང་ཕྱད་པར་འོང་མི་ ནང་ཚན་ཚུ་ཨིན་པས།
རྐྱེན་ངན་དེ་ སྤྱི་ཟླ་ ༧ པའི་ཚེས་ ༢༠ གི་ཕྱི་རོ་ ཧང་སྟོང་མར་ ཆུ་རུད་དང་ ས་རུད་ཐོན་མི་ལུ་བརྟེན་ཏེ་ བྱུང་ཡོདཔ་ད་ མི་གྲངས་ ༢༣ ལུ་ ཤི་རྐྱེན་བྱུང་མིའི་གྲས་ལས་ ད་ཚུན་གྱི་བར་ན་ ཕུངམོ་ ༨ འཚོལ་ཐོབ་ནུག།
ད་རེས་ཡང་ རྒྱལ་པོའི་གཟིམ་དཔོན་ ཡིག་ཚང་གིས་ འགོ་འདྲེན་ཐོག་ལུ་ ཕུངམོ་འཚོལ་ཞིབ་དང་ རྒུད་སྐྱོབ་ཀྱི་ལཱ་ཚུ་ འཕྲོ་མཐུད་དེ་ར་འབདཝ་ཨིན་པས།
དེ་བསྒང་ འབྲུག་ཤར་ཕྱོགས་ལུ་ མི་དབང་མཆོག་གི་སྐུ་ཚབ་ མི་དབང་རྒྱལ་སྲས་ འཇིགས་མེད་རྡོ་རྗེ་དབང་ཕྱུག་མཆོག་ཡང་ རྐྱེན་ངན་བྱུང་སའི་ ས་ཁོངས་ནང་ མི་དབང་ཞབས་ཀྱི་ ཕྱག་ཞུ་སྟེ་ བྱོན་ཡོདཔ་ཨིན་པས།
མི་དབང་མཆོག་གིས་ ཨའུ་མཚོ་ལུ་སྦེ་ ཉམས་རྒུད་པ་ཚུ་གི་ བཟའ་ཚང་ཚུ་དང་ མཇལ་ཕྲད་མཛད་གནང་ཡོདཔ་མ་ཚད་ ལྷུན་རྩེ་རྫོང་ཁག་གི་ འགོ་དཔོན་ཚུ་དང་ཡང་ མཇལ་ཕྲད་མཛད་གནང་ནུག།
ད་ཚུན་གྱི་རིང་ལུ་ འཚོལ་ཐོབ་མི་ ཕུངམོ་དེ་ཚུ་ རང་སོའི་བཟའ་ཚང་ལུ་ རྩིས་སྤྲོད་འབད་ཡོདཔ་ད་ རྐྱེན་ངན་དེ་ བྱུང་པའི་ཉིན་མ་ལས་ རྒྱལ་ཡོངས་ཀྱི་ གནས་ཚད་ཁར་ བསྔོ་བ་དང་ སྨོན་ལམ་ཚུ་ འཕྲོ་མཐུད་དེ་ར་ གནང་དོ་ཡོདཔ་ཨིན་པའི་གནས་ཚུལ།.