ཞི་གཡོག་ཆོས་རྒྱུགས་ཀྱི་དོན་ལས་ མི་གྲངས་ ༤,༤༧༧ གྱིས༌ཐོ༌བཀོད།

དུས་ཅི་ རྒྱལ་གཞུང་ཞི་གཡོག་ལྷན་ཚོགས་ཀྱི་ ཞི་གཡོག་ཆོས་རྒྱུགས་ ཕུལ་ནིའི་དོན་ལས་ མཐོ་རིམ་ཤེས་ཡོན་ མཐར་འཁྱོལ་མི་ ༤,༤༧༧ དེ་ཅིག་གིས་ ཐོ་བཀོད་འབད་ནུག།
དེ་ཡང་ སྤྱི་ཟླ་ ༨ པའི་ཚེས་ ༥ ལུ་ ཐིམ་ཕུ་དང་ མོང་སྒར་ལུ་སྦེ་ ཕུལ་ནི་ཨིནམ་ད་ དེ་སྦེ་ ཐོ་བཀོད་འབད་མི་ཚུ་ཡང་ རྒྱལ་ཁབ་ནང་འཁོད་ཀྱི་ མཐོ་རིམ་སློབ་གྲྭ་ཚུ་ལས་ མཐར་འཁྱོལ་མི་ ༣,༨༢༢ དང་ ཕྱི་རྒྱལ་ཁག་གི་ མཐོ་རིམ་སློབ་གྲྭ་ཚུ་ལས་ མཐར་འཁྱོལ་མི་ ༦༥༥ ཡོདཔ་ཨིན་པས།
ད་རེས་ རྒྱལ་ཁབ་ནང་ མི་སྟོབས་མ་ལང་པའི་ དཀའ་ངལ་སེལ་ཐབས་ལུ་ རྒྱལ་གཞུང་ཞི་གཡོག་ལྷན་ཚོགས་ཀྱི་ བཅའ་ཁྲིམས་དང་ སྒྲིག་གཞི་ཚུ་ བསྒྱུར་བཅོས་འབད་ཡོདཔ་ལས་ སྤྱི་ལོ་ ༢༠༢༢ དང་ཕྱདཔ་ད་ དུས་ཅི་ སྔོན་འགྲོའི་ཆོས་རྒྱུགས་ནང་ ཐོ་བཀོད་འབད་མི་ མི་གྲངས་ ༩༩༡ དེ་ཅིག་ ཡར་སེང་སོང་ནུག།
གཞུང་གཡོགཔ་ལེ་ཤ་ཅིག་གིས་ དགོངས་ཞུ་འབད་བ་ལུ་བརྟེན་ཏེ་ མི་མང་ལུ་ གཞི་རྟེན་གྱི་ ཞབས་ཏོག་ཚུ་ བྱིན་ནི་ལུ་ ཐོ་ཕོག་ཡོདཔ་ལས་ ཞི་གཡོག་ས་སྟོང་ ༡,༡༢༦ ལུ་ ཡར་སེང་འབད་མི་དེ་ འདས་པའི་ལོ་དང་ཕྱདཔ་ད་ ས་སྟོང་ ༤༦༠ ཡར་སེང་འབད་ཡོདཔ་ཨིན་པས།
ཞི་གཡོག་ལྷན་ཚོགས་ཀྱིས་ ཞི་གཡོག་ཆོས་རྒྱུགས་ངོ་མ་དེ་ སྤྱི་ཟླ་ ༡༠ པའི་ཚེས་ ༥ ལས་ འགོ་བཙུགས་ཏེ་ ཉིན་གྲངས་༣ གྱི་རིང་ལུ་ འགོ་འདྲེན་འཐབ་ནི་དང་ ཆོས་རྒྱུགས་ཀྱི་ གྲུབ་འབྲས་དེ་ཡང་ སྤྱི་ཟླ་ ༡༢ པའི་ཚེས་ ༧ ལུ་ གསལ་སྟོན་འབད་ནི་ཨིན་པའི་གནས་ཚུལ།