འཇམ་དཔལ་ཞི་བའི་བློ་གྲོས།
དར་དཀར་རྫོང་ཁག་ རྡོ་ག་གཡུས་ཚན་ནང་ སྤྱི་ཟླ་ ༧ པའི་ཚེས་ ༤ ལུ་ སྐྱེས་ལོ་ ༤༨ འབད་མི་ ཕོ་སྐྱེས་ ༡ གིས་ རང་སྲོག་བཅད་ནུག།
དེ་ཡང་ གནས་ཚུལ་འབྱུང་ཁུངས་ཅིག་དང་འཁྲིལ་བ་ཅིན་ དེ་ཚེ་ ཕོ་སྐྱེས་ཁོ་ར་ ཨ་ལོ་ ༢ དང་གཅིག་ཁར་ སྡོད་དེ་ཡོད་རུང་ དྲོ་པ་ཁམས་ཅིག་ཁ་ལས་ གར་སོང་མེད་པར་ ཡར་སོངཔ་ཨིན་པས།
དེ་འབདཝ་ལས་ ཁོ་རའི་སྤུན་ཆ་ཚུ་ ཚ་གྱང་ལང་སྟེ་ གཡུས་ཁའི་མི་ཚུ་ལས་ རྒྱབ་སྐྱོར་ལེན་ཏེ་ ཕྱི་རོའི་ཆུ་ཚོད་ ༩ ལས་ འཚོལ་ཞིབ་འབད་ནི་ འགོ་བཙུགས་ཡོདཔ་ད་ ཕྱི་རོའི་ཆུ་ཚོད་ཕྱེད་དང་ ༡༠ དེ་ཅིག་ཁར་ ཕོ་སྐྱེས་དེ་ ཁོ་རའི་སྡོད་ཁྱིམ་ལས་ མི་ཊར་ ༢༠ དེ་ཅིག་གི་ས་ཁར་ ཤི་སྟེ་ཡོདཔ་སྦེ་མཐོང་ནུག།
ཨ་ལོ་ ༣ གྱི་ ཨ་པ་ཨིན་མི་ ཚེ་འདས་དེ་གི་ཕུངམོ་ལུ་ ཁྲིམས་སྲུང་འགག་སྡེ་གིས་ དབྱེ་ཞིབ་འབད་བའི་སྐབས་ལུ་ རྨ་སྐྱོན་ཚུ་ ག་ནི་ཡང་མིན་འདུག་ཟེར་ཨིནམ་ད་ ཕོ་སྐྱེས་དེ་ སེམས་ཁམས་ཀྱི་ ནད་གཞི་ཡོད་མི་ཅིག་ཡང་ཨིན་པས།
ཁྲིམས་སྲུང་འགག་སྡེའི་ ཐོ་བཀོད་ནང་གསལ་ སྤྱི་ལོ་ ༢༠༢༢ ལུ་ རང་སྲོག་བཅད་མི་ མི་གྲངས་ ༡༢༢ ཐོན་མིའི་གྲས་ལས་ དར་དཀར་རྫོང་ཁག་ནང་ མི་གྲངས་ ༡༢ ཀྱིས་ རང་སྲོག་བཅད་ཡོདཔ་སྦེ་ཨིན་པའི་གནས་ཚུལ།
