ཨི་རཱན་དེ་ ར་ཤི་ཡ་ལུ་ དྲག་དམག་གི་ རྒྱབ་སྐྱོར་འབད་མི་ རྒྱལ་ཁབ་དང་པ་ཨིན་པའི་ངོས་འཛིན།

བི་བི་སི།
ཡུ་ཨེཛ་གིས་ བཤད་དོ་བཟུམ་འབད་བ་ཅིན་ ར་ཤི་ཡ་དང་ ཨི་རཱན་རྒྱལ་ཁབ་ ༢ ཀྱི་བར་ན་ སྲུང་སྐྱོབ་ཀྱི་ མཉམ་འབྲེལ་དམ་ཟབ་ཅིག་ལུ་ གྱུར་སོང་ནུག་ཟེར་ཨིན་པས།
དེ་ཡང་ ཡུ་ཨེཛ་རྒྱལ་ཡོངས་སྲུང་སྐྱོབ་ལྷན་ཚོགས་ཀྱི་མགྲིན་ཚབ་ ཇཱོན་ཀར་བི་གིས་ བཤད་ཡོདཔ་ད་ ད་རུང་ ཁོ་གིས་འབད་བ་ཅིན་ ཨི་རཱན་གྱིས་ ར་ཤི་ཡ་ལུ་ སྔོན་ཆད་མ་བྱུང་པའི་ ཚད་གཞི་ཁར་ དྲག་དམག་གི་ རྒྱབ་སྐྱོར་བྱིན་དོ་ཟེར་ཨིན་པས།.
ཡུ་ཨེཛ་གིས་ཐོབ་མི་ སྙན་ཞུ་ཚུ་དང་འཁྲིལཝ་ད་ རྒྱལ་ཁབ་དེ་ ༢ ཀྱི་བར་ན་ སྲོག་ཉེན་ཅན་གྱི་ གོ་མཚོན་མི་ཛ་ཡེལ་གྱི་ གནམ་གྲུ་ཆུང་བ་ བཟོ་བསྐྲུན་འབད་ནིའི་སྐོར་ལས་ཡང་ བསམ་ཞིབ་ཚུ་ བརྗེ་སོར་འབད་བའི་བསྒང་ཡོདཔ་སྦེ་ཨིན་པས།
ར་ཤི་ཡ་དང་ ཨི་རཱན་གྱི་ མཉམ་འབྲེལ་སྐོར་ལས་ འཕྲལ་ཁམས་ཅིག་ཁར་ ར་ཤི་ཡ་གིས་ ཨི་རཱན་ལུ་ བཟོ་ཡོད་མི་ གོ་མཚོན་མི་ཡེལ་གྱི་ གནམ་གྲུ་ཆུང་བ་ཚུ་ ལག་ལེན་འཐབ་མས་ཟེར་ ཡུ་ཀེ་རེན་གིས་ ཉེན་ཁ་བཀལ་བའི་སྐབས་ལུ་ ཐོན་ཡོདཔ་ཨིན་པས།
ཨི་རཱན་གྱིས་འབད་བ་ཅིན་ ར་ཤི་ཡ་ལུ་ དེ་བཟུམ་མའི་ གོ་མཚོན་གྱི་ གནམ་གྲུ་ཆུང་བ་ཚུ་ བྱིན་བྱིནམ་མེད་ཟེར་ ཁ་བཟེད་མ་བཏུབ་རུང་ ཤུལ་ལས་འབདཝ་ད་ ར་ཤི་ཡ་གིས་ ཡུ་ཀེ་རེན་ལུ་ བཙན་འཛུལ་མ་འབད་བའི་ཧེ་མར་ བཀྲམ་སྤེལ་འབད་ཡོདཔ་སྦེ་ ཁ་བཟེད་ནུག།
ཨི་རཱན་དང་ ར་ཤི་ཡ་གིས་ གོ་མཚོན་མི་ཛ་ཡེལ་གྱི་ གནམ་གྲུ་ཆུང་བ་ བཟོ་བསྐྲུན་འབད་ནི་ལུ་ མཉམ་འབྲེལ་འཐབ་མི་དེ་གིས་ ཡུ་ཀེ་རེན་དང་ ཨི་རཱན་གྱི་ ཁྱིམ་མཚེས་རྒྱལ་ཁབ་ཚུ་གིས་མ་ཚད་པར་ རྒྱལ་སྤྱིའི་མི་སྡེ་ནང་ཡང་ གནོད་པ་འབྱུང་སྲིད་ནི་ཨིནམ་སྦེ་ ཇཱོན་ཀར་བི་གིས་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།