སྐྱབས་རྗེ་མཆོག་གིས་ རྒྱ་གར་རྒྱལ་པོའི་ཁབ་ལུ་ འབྲུག་དགོན་འོག་མིན་གཉིས་པའི་ གཙུག་ལག་ཁང་ལུ་ བཀྲ་ཤིས་རབ་གནས།

མགོན་པོ་རྡོ་རྗེ།
ཤིང་སྦྲུལ་ཟླཝ་ ༧ པའི་ཚེས་ ༡༢ སྤྱི་ཟླ་ ༩ པའི་ཚེས་ ༤ ལུ་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ རྒྱ་གར་བི་ཧར་མངའ་སྡེའི་ས་གནས་ རྒྱལ་པོའི་ཁབ་ལུ་ གསར་བཞེངས་གནང་མི་ འབྲུག་དགོན་འོག་མིན་གཉིས་པའི་ གཙུག་ལག་ཁང་ལུ་ བཀྲ་ཤིས་རབ་གནས་ མཛད་གནང་ཡོདཔ་ཨིན་པས།
བཀྲིས་རབ་གནས་ཀྱི་ མཛད་རིམ་རྟེན་འབྲེལ་དེ་ཁར་ མི་རྗེ་བློན་ཆེན་མཆོག་གིས་གཙོས་པའི་ ནང་སྲིད་བློན་པོ་དང་ གཞུང་གི་ཆེ་མཐོའི་འགོ་དཔོན་ཚུ་གིས་ གྲལ་གཏོགས་མཛད་ཡོདཔ་མ་ཚད་ རྒྱ་གར་གྱི་ ལས་འབྲེལ་ཚོགས་ཁང་དང་ སྡེ་ཆུང་ལས་འབྲེལ་གྱི་ སྤྱི་ཚོགས་བློན་པོ་ ཀི་རཱན་ རི་ཇི་ཇུ་དང་ བི་ཧར་མངའ་སྡེའི་ ཤེས་རིག་བློན་པོ་ དེ་ལས་ བི་ཧར་མངའ་སྡེ་གཞུང་གི་ འགོ་དཔོན་ཚུ་གིས་ གྲལ་གཏོགས་མཛད་ནུག།
འབྲུག་དགོན་འོག་མིན་གཉིས་པའི་ གཙུག་ལག་ཁང་དེ་ འབྲུག་གཞུང་གིས་ དངུལ་ཀྲམ་ས་ཡ་ ༡༩༧.༢༧ ཟད་འགྲོ་བཏང་ཐོག་ལས་ གསར་བཞེངས་གནང་ཡོདཔ་ཨིན་པས།
དེ་ཡང་ སྤྱི་ལོ་ ༢༠༡༨ སྤྱི་ཟླ་ ༡༡ པའི་ཚེས་ ༡༡ ལུ་ མི་དབང་འབྲུག་རྒྱལ་བཞི་པ་མཆོག་གི་ འཁྲུངས་སྐར་དུས་སྟོན་དང་ རྒྱ་འབྲུག་ ༢ ཀྱི་བར་ན་ མཐུན་འབྲེལ་འགོ་བཙུགས་ཏེ་ མི་ལོ་ ༥༠ འཁོར་བའི་ དུས་སྟོན་བརྩི་སྲུང་དང་འབྲེལ་ཏེ་ སྐྱབས་རྗེ་རིན་པོ་ཆེ་མཆོག་དང་ བི་ཧར་མངའ་སྡེའི་ གཙོ་འཛིན་བློན་པོ་ ནི་ཏིཤ་ཀུ་མར་མཆོག་གིས་ ས་བསླངས་རྟེན་འབྲེལ་ མཛད་གནང་ནུག།
བཀྲིས་རབ་གནས་ཀྱི་ མཛད་རིམ་རྟེན་འབྲེལ་དེ་ནང་ གཞུང་གྲྭ་ཚང་དང་ རྒྱལ་གཞུང་ཟློས་གར་སློབ་སྦྱོང་སྤེལ་ཁང་གི་ཧོང་ལས་ སྐུ་འཆམ་དང་ ཞབས་ཁྲའི་རིགས་ཚུ་སྤྱན་འབུལ་ཕུལ་ཡོདཔ་ཨིན་པས།
དེ་མ་ཚད་ གཙུག་ལག་ཁང་གི་ བཀྲ་ཤིས་རབ་གནས་དང་འབྲེལ་ཏེ་ སྐྱབས་རྗེ་རིན་པོ་ཆེ་མཆོག་གིས་ རང་རྣམ་དབྱིན་སྐད་ཐོག་ལུ་ སྐད་སྒྱུར་འབད་མི་དེ་ འགོ་འབྱེད་མཛད་གནང་ཡོདཔ་ད་ སྐད་སྒྱུར་དེ་ཡང་ སྐྱབས་རྗེ་རིན་པོ་ཆེའི་ གསུང་སྒྱུར་དང་ ཞིབ་འཚོལ་ཡིག་ཚང་ལས་ མཁན་པོ་བསོད་ནམས་འབུམ་ལྡན་གྱིས་ མཛད་གནང་ནུག།
རང་ཟླ་ ༧ པའི་ཚེས་ ༡༤ སྤྱི་ཟླ་ ༩ པའི་ཚེས་ ༦ ལས་ ཉིན་གྲངས་ ༣ གྱི་རིང་ལུ་ འབྲུག་དགོན་འོག་མིན་གཉིས་པའི་ གཙུག་ལག་ཁང་ནང་ སྐྱབས་རྗེ་རིན་པོ་ཆེ་མཆོག་ དབུ་བཞུགས་ཐོག་ལས་ འཛམ་གླིང་ཞི་བདེའི་ སྨོན་ལམ་ཆེན་མོ་ གནང་ནི་ཨིན་པས།
སྐྱབས་རྗེ་རིན་པོ་ཆེ་མཆོག་ རང་ཟླ་ ༧ པའི་ཚེས་ ༡༡ སྤྱི་ཟླ་ ༩ པའི་ཚེས་ ༣ ལུ་ མི་རྗེ་བློན་ཆེན་དང་ གཞུང་གྲྭ་ཚང་གི་ ལས་ཚོགས་སློབ་དཔོན་ ནང་སྲིད་བློན་པོ་ དེ་ལས་ གཞུང་གི་ཆེ་མཐོའི་འགོ་དཔོན་ཚུ་དང་ གཞུང་གྲྭ་ཚང་གི་ བླ་སློབ་ཚུ་གིས་ ཕྱག་ཞུ་སྟེ་ རྒྱ་གར་བི་ཧར་ལུ་ བྱོན་ཡོད་པའི་གནས་ཚུལ།