སིངྒ་པོར་གྱི་ མི་ངོམ་ཅིག་གིས་ མི་ལོ་ ༤༠༠ འབད་མི་ སྟོན་པའི་སྐུ་འདྲ་རྙིངམ་ཅིག་ འབྲུག་ལུ་རྩིས་སྤྲོད།

སིངྒ་པོར་གྱི་གསར་ཤོག་ སི་ཊེཊ་ཊ་ཡིམཛ་ཟེར་མིའི་ནང་ བཀོད་དོ་བཟུམ་འབད་བ་ཅིན་ འཕྲལ་ཁམས་ཅིག་ཁར་ མི་ལོ་ ༤༠༠ ལང་མི་ རྒྱུ་སྨན་འདམ་ལས་གྲུ་པའི་ སྟོན་པའི་སྐུ་འདྲ་ཅིག་ གནམ་གྲུའི་ཐོག་ལུ་སྦེ་ སྔར་གྱི་གདན་ས་ འབྲུག་རྒྱལ་ཁབ་ནང་ ལོག་བཏང་ཡི་ཟེར་ཨིན་པས།
དེ་ཡང་ ཌོག་ཊར་ཊོ་མི་ཨོང་དང་ ཁོ་གི་གནས་ཚང་ ཧེ་དི་ ༢ ཀྱིས་ ཁོང་གི་བུ་ སྐྱེས་ལོ་ ༡ འབད་མི་དེ་ སྤྱི་ལོ་ ༢༠༢༣ སྤྱི་ཟླ་ ༤ པའི་ནང་ གྱོངས་སོངཔ་ལས་ ཁོང་གི་སྒེར་དབང་ཐོག་ལུ་ཡོད་མི་ སྟོན་པའི་སྐུ་འདྲ་རྙིངམ་དེ་ ཚེ་འདས་བུ་གི་དོན་ལུ་སྦེ་ སྔར་ཤུལ་ལུ་ ལོག་བསྐྱལ་བཏང་ནུག།
སྟོན་པའི་སྐུ་འདྲ་དེ་ཡང་ ནང་པའི་ཆོས་ཚོགས་ཀྱི་ མཛད་སྒོའི་རྟེན་འབྲེལ་ཅིག་གི་སྐབས་ལུ་ ཟས་བཅུད་ལྷན་ཐབས་ལས་སྡེའི་ བཀོད་ཁྱབ་གཙོ་འཛིན་ ཌོག་ཊར་ཨོང་གིས་ སིངྒ་པོར་ལུ་ འབྲུག་གི་གཞུང་ཚབ་ ཀུན་བཟང་རྡོ་རྗེ་ལུ་ རྩིས་སྤྲོད་འབད་ཡོདཔ་ཨིན་པས།
རིང་ཚད་སེན་ཊི་མི་ཊར་ ༣༤ དང་ དཀྱུས་སེན་ཊི་མི་ཊར་ ༢༧ འབད་མི་ སྟོན་པའི་སྐུ་འདྲ་དེ་ བཞེངས་དུས་བརྟག་དཔྱད་སྐབས་ལུ་ སྤྱི་ལོ་ ༡༦༢༠ ཉེར་གྲངས་ནང་ བཞེངས་ཡོད་པའི་ མངོན་གསལ་བྱུང་ནུག།
སྐྱེས་ལོ་ ༤༤ འབད་མི་ ཌོག་ཊར་ཨོང་གིས་ རྒྱུ་སྨན་འདམ་ མཉེན་ཏོག་ཏོ་ལས་གྲུབ་པའི་ སྐུ་འདྲ་རྙིངམ་དེ་ གནོད་སྐྱོན་ཞུགས་མ་བཅུག་པར་ བདག་འཛིན་འཐབ་ཚུགས་མི་དེ་ གནམ་མེད་ས་མེད་་ དཀོན་དྲགས་ཅིག་ཨིན་ཟེར་ བཤད་ཡོདཔ་ཨིན་པས།
དེ་མ་ཚད་ སྐུ་འདྲ་དེ་ ནང་པ་སངས་རྒྱས་པའི་ཆོས་ལྡན་གྱི་ འབྲུག་རྒྱལ་ཁབ་ནང་ ག་ནི་བ་ཡང་ བྱིན་རླབས་ཅན་སྦེ་ བརྩི་སྲོལ་ཡོདཔ་ལས་ ད་རེས་ ལོག་སྟེ་ར་ རྩིས་སྤྲོད་འབདཝ་ཨིནམ་སྦེ་ བཤདཔ་ཨིན་པས་ཟེར་ སི་ཊེཊ་ཊ་ཡིམཛ་ གསར་ཤོག་ཅིག་ནང་ བཀོད་འདུག་པའི་གནས་ཚུལ།