པདྨ་དབང་འདུས།
སྤྱི་ཟླ་ ༡ པའི་ཚེས་ ༡ ལུ་ བློན་ཆེན་གྱི་ ཡིག་ཚང་ལས་ གསར་བཏོན་འབད་མི་ གནས་ཚུལ་ཅིག་ནང་ བཀོ་དོ་བཟུམ་འབད་བ་ཅིན་ འཕྲལ་ཁམས་ཀྱི་ བདུན་ཕྲག་ཚུ་ནང་ རྒྱལ་སྤྱིའི་གནས་རིམ་ལུ་ ས་སྣུམ་གྱི་ གོང་ཚད་ཚུ་ ཡར་སེང་སྦོམ་སྦེ་ར་ སོང་སྟེ་ཡོད་ཟེར་ཨིན་པས།
དེ་སྦེ་ ས་སྣུམ་གྱི་ གོང་ཚད་ཡར་སེང་འགྱོ་མི་ཚུ་ རྒྱལ་ཁབ་ནང་འཁོད་ལས་ དམ་འཛིན་འབད་མ་ཚུགས་པའི་ ཕྱི་ཁའི་བྱུང་རྐྱེན་ཚུ་ལུ་བརྟེན་ཏེ་ཨིནམ་ལས་ ང་བཅས་རའི་ ནང་འཁོད་ཀྱི་ ས་སྣུམ་གོང་ཚད་ལུ་ཡང་ ཡར་སེང་ཐོན་ཡོདཔ་སྦེ་བཀོད་ནུག།
དེ་བཟུམ་མའི་ ཡར་སེང་ཚུ་གིས་ ང་བཅས་རའི་ མི་སེར་ཚུ་གི་ ཉིན་བསྟར་འཚོ་སྐྱོང་ལུ་ ཐོ་ཕོག་དོ་ཡོད་མི་ལུ་ ངོས་ལེན་གྱི་སྒོ་ལས་ གཞུང་གིས་ སྡུག་སྦྱོང་མར་ཕབ་ཀྱི་དོན་ལུ་ འཕྲལ་མཁོའི་ཐབས་ལམ་ཚུ་ བཏོན་ཏེ་ཡོདཔ་ཨིན་པས།
དེ་ཡང་ རྒྱལ་ཡོངས་ས་སྣུམ་ སྟབས་བདེའི་སྒྲིག་བཀོད་བརྒྱུད་དེ་ སྤྱི་ཟླ་ ༣ པའི་ཚེས་ ༢༡ ལས་ བཟའ་ཚང་དང་ དཔལ་འབྱོར་ལུ་ རྒྱབ་སྐྱོར་གྱི་དོན་ལས་ ས་སྣུམ་གྱི་ གོང་ཚད་ལུ་ ལྷན་ཐབས་ཀྱི་ རྒྱབ་སྐྱོར་ཅིག་ འགོ་བཙུགས་ནུག།
ལྷན་ཐབས་དེ་ཡང་ བདུན་ཕྲག་གཉིས་རེའི་བར་ན་ རྒྱལ་སྤྱི་གོང་ཚད་དང་ མཐུན་སྒྲིག་འབད་ནིའི་དོན་ལུ་ བསྐྱར་ཞིབ་འབདཝ་ཨིན་པས།
ད་རེས་འབད་བ་ཅིན་ སྤྱི་ཟླ་ ༤ པའི་ཚེས་ ༡ གི་ ནུབ་ཕྱེད་ལས་ ཐིམ་ཕུ་ལུ་ པེ་ཊྲོལ་ལི་ཊར་རེ་ལུ་ དངུལ་ཀྲམ་ ༡༡༤.༣༡ རེ་དང་ ཌི་ཛིལ་ལི་ཊར་རེ་ལུ་ དངུལ་ཀྲམ་ ༡༧༤.༡༣ རེ་གུ་ ཡར་སེང་སོང་ཡོད་རུང་ ས་སྣུམ་གྱི་ གོང་ཚད་ལུ་ ལྷན་ཐབས་ཀྱི་སྒོ་ལས་ པེ་ཊྲོལ་ལི་ཊར་རེ་ལུ་ དངུལ་ཀྲམ་ ༩༨.༠༠ རེ་དང་ ཌི་ཛིལ་ལི་ཊར་རེ་ལུ་ དངུལ་ཀྲམ་ ༩༨.༣༡ རེ་སྦེ་ ཚད་སྒྲིག་མཛད་གནང་ནུག།
རྒྱལ་ཁབ་ཕྱི་ནང་ ༢ ཀྱི་ གནས་ཚུལ་ཁ་གསལ་དང་ ཤེས་ཡོན་ ལམ་སྲོལ་ སྤྲོ་བ་ལ་སོགས་པ་ཚུ་ གློག་རིག་སྒྲིག་བཀོད་ (PDF) ཐོག་ལུ་ གཟིགས་འདོད་ཡོད་མི་ཚུ་གིས་ ལོ་ངོ་ ༡ གི་དོན་ལས་ འབྲུག་གི་དངུལ་ཁང་ནང་ རྒྱལ་སྤྱི་གསར་ཤོག་གི་ རྩིས་ཁྲ་ཨང་ ༡༠༠༩༡༥༣༣༤ ཅན་མར་ དངུལ་ཀྲམ་ ༥༠༠ བཙུགས་ཐོག་ལས་ རྒྱུན་མངག་མཛད་གནང་ཟེར་ ཞུ་ནི་དང་། བརྡ་དོན་ཁ་གསལ་གྱི་དོན་ལས་ གློག་འཕྲིན་ཁ་བྱང་ gyalchi.cir@gmail.com དང་ འགྲུལ་འཕྲིན་ཨང་ ༡༧༡༡༡༡༠༧ ཐོག་ལུ་ འབྲེལ་བ་འཐབ་གནང་།
