ལྷུན་རྩེ་རྫོང་ཁག་ རྒྱ་རས་རྒེད་འོག་གི་ མི་སེར་ཚུ་གི་དོན་ལས་ གོང་འཕེལ་གྱི་ འཆར་གཞི་སྣ་ཚོགས།

བདེ་སྐྱིད་ཆོས་སྒྲོན།
ལྷུན་རྩེ་རྫོང་ཁག་ རྒྱ་རས་རྒེད་འོག་གི་ མི་སེར་ཚུ་ འཚོ་བ་སོ་ནམ་ལུ་བརྟེན་ཏེ་ སྡོད་མི་ཅིག་ཨིན་རུང་ ས་གནས་དེ་ཁར་ ཆུ་རུད་འཐོན་ནི་གི་ ཉེན་ཁ་ཡོད་པའི་ཁར་ ཚལ་མ་སྟུག་དྲགས་ནང་ ཆགས་ཏེ་ཡོདཔ་ལས་ ཚོད་བསྲེ་ཚུ་ཡང་ ག་ཅི་ར་བཏབ་རུང་ རི་དྭགས་སེམས་ཅན་ཚུ་ལས་ ཉེན་སྲུང་འབད་ནི་ལུ་ གདོང་ལན་དང་ ཚོང་འབྲེལ་འཐབ་སའི་ ས་གོ་ཡང་མེད་པའི་ དཀའ་ངལ་ཡོད་ཟེར་ཨིན་པས།
དེ་ཡང་ སྐྱེས་ལོ་ ༤༧ འབད་མི་ རྒྱ་རས་རྒཔོ་ ཀུན་བཟང་མི་འགྱུར་གྱིས་ བཤད་ཡོདཔ་ད་ དེ་བཟུམ་སྦེ་ རྒེད་འོག་དེ་ནང་ ཞིང་ཆུ་དང་ འཐུང་ཆུའི་དཀའ་ངལ་ཚུ་ཡང་ཡོད་རུང་ རྒེད་འོག་འཆར་གཞིའི་ནང་ ཚུད་དེ་ཡོདཔ་ལས་ འཕྲལ་མགྱོགས་ར་ བསལ་ཚུགས་པའི་ རེ་བ་ཡོདཔ་མ་ཚད་ སྤྱི་འོག་ག་རའི་ནང་ སོ་ནམ་ཞིང་ལམ་གྱིས་ ཁྱབ་མ་ཚུགས་པར་ཡོད་མི་ཚུ་ཡང་ ལོ་ལྔའི་འཆར་གཞི་ ༡༣ པའི་ནང་ ཁྱབ་ཚུགས་བཟོ་ནི་གི་ འཆར་གཞི་ཡོད་ཟེར་ཨིན་པས།
དེ་ལས་ ལ་གྲོང་དང་ ཟངས་མཁར་སྤྱི་འོག་ནང་ གསོ་བའི་གཞི་རྟེན་སྨན་ཁང་ ༢ དང་ སློབ་གྲྭ་ཆུང་བ་ ༢ ཡོད་རུང་ ཡུམ་ཆེ་དང་ ངང་ངེས་ལྕ་ཀྲོང་ སྤམ་སྤྱི་འོག་ཚུ་གི་ནང་ལས་ སློབ་ཕྲུག་ཨ་ལོ་ཚུ་ ལ་གྲོང་སློབ་གྲྭའི་ནང་ དུས་ཡུན་ཆུ་ཚོད་ ༤ དེ་རེ་ འགྲོ་འགྲུལ་འབད་དགོ་པའི་ཁར་ གནམ་བྱཱར་གྱི་སྐབས་ལུ་ དཀའ་ངལ་དང་ ཉེན་ཁ་སྦོམ་ཡོདཔ་ལས་ ལ་གྲོང་སློབ་གྲྭ་དེ་ཡང་ ནང་སྡོད་སློབ་གྲྭ་ལུ་ བསྒྱུར་བཅོས་འབད་ཚུགས་པའི་ རེ་བ་ཡོདཔ་ཨིན་པས།
རྒཔོ་ཀུན་བཟང་མི་འགྱུར་དེ་ སྤྱི་ལོ་ ༢༠༠༧ ལས་ ད་ཚུན་གྱི་བར་ན་ རྒ་པོའི་གོ་གནས་ཁར་ གནས་ཡུན་ ༤ གི་རིང་ལུ་ བཙག་འཐུ་གྲུབ་སྟེ་ཡོདཔ་ད་ ཁོ་གིས་ སྐྱེས་ལོ་ ༡༡ ལས་ར་ ལོ་ངོ་ ༩ དེ་ཅིག་གི་རིང་ལུ་ སྤྱི་འབོད་དང་ ཡི་གུ་སྐྱེལ་འདྲེན་པ་སྦེ་ཡང་ སྡོད་པའི་ཁར་ ཐོབ་ཁུངས་ཚུ་ ག་ནི་ཡང་མེད་རུང་ སྤྱི་ལོ་ ༡༩༩༠ ལས་ ལོ་ངོ་ ༣ དེ་ཅིག་གི་རིང་ལུ་ རྒ་པོའི་དྲུང་ཡིག་དང་ དེ་ལས་ ལོ་ངོ་ ༡ དེ་ཅིག་ ཚོགས་པ་སྦེ་ ཕྱག་ཞུ་ནུག།
ད་ཚུན་གྱི་རིང་ལུ་ རྒེད་འོག་དེ་ ཡར་རྒྱས་འགྱོ་མ་ཚུགས་མི་དེ་ཡང་ རྒེད་འོག་དེ་ནང་ལས་ ཚོད་བསྲེ་དང་ ཤིང་འབྲས་ཚུ་ འཐོན་བཞིན་དུ་ཡོད་རུང་ ཚོང་འབྲེལ་འཐབ་སའི་ ས་གོ་མེད་པའི་ དཀའ་ངལ་ལུ་བརྟེན་ཏེ་ཨིནམ་ད་ ཧེ་མ་ལས་ ཤིང་མཁར་དང་ སྒོར་གཱན་གྱི་བར་ན་ འཁོར་ལམ་གཏོན་ནི་གི་ འཆར་གཞི་ཡོད་མི་དེ་ཡང་ དེ་འཚམས་ཅིག་སྦེ་ར་ ཐོགས་ལུས་སོང་ཡི་ཟེར་ཨིན་པས།
ཨིན་རུང་ བུམ་ཐང་དགེ་ཟམ་ཆུ་ལས་ གྲུམ་སྤང་ཡུམ་ཆེ་བརྒྱུད་དེ་ རྒྱ་རས་རྒེད་འོག་ལས་ ཨའུ་མཚོ་ཁྲོམ་ཁར་ཚུན་ ཞིང་ལམ་སེལ་ནི་གི་ བརྟག་ཞིབ་འབད་བའི་བསྒང་ཡོདཔ་ལས་ ག་དེམ་ཅིག་སྦེ་ ཞིང་ལམ་དེ་ བསལ་ཚུགས་པ་ཅིན་ རྒེད་འོག་དེ་གི་ མི་སེར་ག་ར་ལུ་ ཕན་ཐོགས་སྦོམ་སྦེ་ར་ འབྱུང་ཚུགས་ཟེར་ཨིན་པས།
དེ་ལས་ རྒཔོ་ཁོ་ར་རྩིས་ཏེ་ རྒཔོ་དེ་ལུ་ སྤུན་མཆེད་ ༤ ཡོད་རུང་ ཁོང་ཆ་ཁྱབ་ དང་པར་དུ་ ཕམ་ཉམ་ཆུང་དང་ གཉིས་པ་ སློབ་གྲྭ་ཚུ་ ས་ཐག་རིང་སར་འབདཝ་ལས་ ཤེས་ཡོན་སྦྱངས་ནི་གི་ གོ་སྐབས་དེ་ ཕོ་རྒནམ་སྦོམ་ཤོས་ལུ་མ་གཏོགས་ གཞན་མི་ཚུ་ལུ་ མ་ཐོབ་ཟེར་ཨིནམ་ད་ ཨིན་རུང་ རྒཔོ་དེ་གིས་ ཁོ་རའི་ཕོ་རྒནམ་ལས་ རྫོང་ཁའི་ཡི་གུ་འབྲི་ལྷག་ཚུ་ ལྷབ་ཅི་ཟེར་ བཤདཔ་ཨིན་པས།
དེ་གི་ཤུལ་ལས་ སྤྱི་ལོ་ ༢༠༠༠ ལས་ ༢༠༠༦ ཚུན་ གཡུས་གོ་དེ་ཁའི་ མི་སེར་ཚུ་ལུ་ དཔྱེ་ཆ་སྟོན་ཏེ་ སྡོད་པའི་སྐབས་ལུ་ སྤྲོ་བ་བསྐྱེད་མི་ མང་སུ་ཐོན་པའི་སྟབས་ཀྱིས་ གཞི་རྟེན་ཤེས་ཡོན་ལྷབ་ས་ཅིག་ སྒོ་ཕྱེ་དགོཔ་སྦེ་ རྒེད་འོག་ལུ་ ཞུ་བ་ཕུལཝ་བཞིན་དུ་ རྒེད་འོག་བརྒྱུད་དེ་ རྫོང་ཁག་ལས་ ངོས་ལེན་གྲུབ་པའི་ཤུལ་ལུ་ སློབ་དཔོན་ཡང་ ཁོ་རང་འབད་དགོ་པའི་ བཀའ་གནངམ་ལས་ ཞི་རྟེན་ཤེས་ཡོན་གྱི་ སློབ་དཔོན་སྦེ་ཡང་ སྡོད་ཅི་ཟེར་ཨིན་པས།
རྒེད་འོག་དེ་ ལྷུན་རྩེ་རྫོང་ལས་ ཀི་ལོ་མི་ཊར་ ༥༦ དང་ ཨའུ་མཚོ་ཁྲོམ་ཁ་ལས་ ཀི་ལོ་མི་ཊར་ ༦ གི་ ས་ཁོངས་ནང་ ཆགས་ཏེ་ཡོདཔ་ད་ རྒེད་འོག་དེ་ཁར་ སྤྱི་འོག་ ༥ གི་ནང་ གུང་གྲངས་ ༢༡༩ ལས་ གུང་སྟོང་ ༤༤ དང་ མི་རློབས་ ༢,༠༠༠ དེ་ཅིག་ལས་ གཡུས་ཁར་སྡོད་མི་ ༦༠༠ དང་ ༧༠༠ དེ་ཅིག་མ་གཏོགས་ མེད་ཟེར་ཨིན་པས།
རྒཔོ་ཀུན་བཟང་མི་འགྱུར་གྱིས་ རྒྱ་རས་རྒེད་འོག་གི་ མི་སེར་ཚུ་གིས་ ལོ་ངོ་མང་རབས་ཅིག་གི་རིང་ལུ་ ཕྱག་ཞུ་ནི་གི་ གོ་སྐབས་གནང་མི་དེ་ ཁོ་གི་མི་ཚེའི་ནང་ དུས་ནམ་ཡང་བརྗེད་མ་ཚུགས་པའི་ གོ་སྐབས་བཟང་པོ་ཅིག་ཨིནམ་ལས་ མི་སེར་ཚུ་ལུ་ སེམས་ཀྱི་གདིང་ལས་ར་ བཀའ་དྲིན་དགའ་ཚོར་ཡོད་ཟེར་ བཤདཔ་ཨིན་པའི་གནས་ཚུལ།