གདན་ཅུང་ཁ་གང་གྲུ་བཞི། །སྡོད་ན་རང་ཡང་མ་ཤོང་། །དགའ་ན་ཁྱོད་ཡང་ལོག་ཤོག །ཁྱོད་དང་ང་སྦེ་སྡོད་གེ །
རྟ་གིས་ལྕང་མ་མནོཝ་དེས། །ལྕང་མས་རྟ་ལུ་མ་མནོ། །རྟ་དང་ལྕང་མའི་བར་ལས། །ཚལ་མའི་ར་བ་བསྒོར་ཆི། །
ལྕང་མ་ལྕང་ཤིང་མང་བ། །ནོར་བུ་གླིང་གི་ལྕང་ཤིང་། །དགའ་བའི་བསིལ་དྲོད་ལྡན་པ། །ལྕང་མ་གཅིག་ལས་མིན་འདུག །
སྐོར་ལམ་བྲག་གི་སྐེད་པར། །དཀོན་གཉེར་མེད་པའི་ལྷ་ཁང་། །མཆོད་དྲི་གསུང་སྐད་ཧན་རུང་། །གསིག་མི་མེད་པར་ལུས་དོ། །
ཁ་ལ་སྐོམ་པའི་དབང་གིས། །ཆུ་མོ་ཧུབ་གསུམ་འཐུངས་ཡི། །ཉ་མོ་ཁོང་ལ་ཚུད་དེ། །ལུས་སེམས་བདེ་བ་མ་བྱུང་། །
ཁང་པ་དུད་པ་ཚ་བ། །སྒོ་སྒྲིག་རླུང་མ་ཚ་བ། །ཁང་པ་དེ་ལས་མེད་ན། །འགྲུལ་པ་འཁོར་ས་མིན་འདུག །
སྟོད་པའི་རོང་ལས་གཤོང་ལས། །སྒ་མ་དར་གྱི་ལྕུ་གུ། །བཅག་ན་བཅག་དགོ་མ་བདེ། །བཞག་ན་སེམས་ཐག་མ་ཆོད། །
མཉམ་ཅིག་འགྱོ་བའི་ཤ་བ། །རྭ་བ་རིང་ཐུང་མེད་རུང་། །རྨིག་པ་རིང་ཐུང་ཞུགས་ཏེ། །འགྲན་པའི་སྐལ་བ་མ་བྱུང་། །
གངས་དཀར་རྩེ་ལས་འབབ་པའི། །ཆུ་མོ་སྐྱིད་ཆུ་སྔོན་མོ། །ལྷ་ས་ཇོ་བོའེ་སྐུ་མདུན། །ཡོན་ཆབ་ལན་ཅིག་ཕུལ་གེ །
གངས་ཀྱི་ཆུ་དཀར་མེ་ཏོག །ལྡུམ་རའི་སེར་ཤོག་མེ་ཏོག །མཆོད་བཤམས་ཁྲ་མོའི་ནང་ལུ། །ལན་ཅིག་རང་གིས་ཕུལ་གེ །
ཏམ་ཁུ་ཨ་མས་བསྒྲལ་བ། །ཆུ་དྲིལ་དཔྱལ་བར་བཅིངས་ནུག །བཟོ་རྣམ་ཕུ་ཀྲེ་འཇའ་རུང་། །འཛོམས་སར་ཨོ་ལ་འགྱོ་དགོ །
པད་ཀར་སེར་པོའི་མེ་ཏོག །སེར་བཀྱག་དེ་རང་མ་དྭངས། །གནག་པོའི་ཕྱོགས་སུ་གཡོཝ་ད། །ཏོག་ཏོག་ཧི་བར་བརྡུང་འོང་། །
ལམ་མའི་མཇུག་གི་ཨོམ་ཆུ། །དུག་ཆུ་ཨིན་པར་མ་ཤེས། །ཧུབ་ཅིག་འཐུངས་པ་འགྱོདཔ་ལས། །འཇའ་འཇའ་འདྲཝ་རང་མིན་འདུག །
ཕུ་ཡི་ཤེལ་རྔ་རོབ་འབྱེལ། །སྦོམ་སྟེ་མགུ་ལས་མ་ཐལ། །ཤིང་ཆེན་རྩ་ལས་བརྡབ་ན། །རོབ་འབྱེལ་སྐེད་ལས་མི་གཏང་། །
ནོར་བུའི་རི་ལས་ཐོན་པའི། །ཤིང་ཆེན་སྤོས་དཀར་བསང་ཤིང་། །དྲོ་པ་བསང་ཤིང་བཏུབ་པས། །ཕྱི་རུ་ལྷ་ཤིང་བཏུབ་པས། །
དཀར་ཡོལ་ཆག་རུང་ཆག་གེ །འབྲུག་རིས་ཡལ་རུང་ཡལ་གེ། །རྫབ་ཆེན་ཕོར་པའི་རྟིང་མ། །དངུལ་ཤན་ལས་ཀྱིས་འཁོར་འོང་། །
ཕ་རི་སྤང་གི་ལོགས་ལས། །ཤྭ་བ་ཡར་འགྲོ་མར་འགྲོ། །ཡར་འགྲོ་རྩྭ་ཡང་མི་ཟ། །མར་འགྲོ་ཆུ་ཡང་མི་འཐུང་། །
