རྒྱལ་གཞུང་འགག་སྡེ་གིས་ གནམ་གྲུ་ནང་ གསེར་ཀེ་ཇི་ ༡ བསྐྱལ་བཞག་མི་ལུ་ཞིབ་དཔྱད།

སྤ་རོའི་རྒྱལ་གཞུང་འགག་སྡེ་གིས་ གསེར་ནག་ཚོང་གི་ གནད་དོན་ཅིག་ ཞིབ་དཔྱད་འབད་བའི་བསྒང་ཨིནམ་ད་ དེ་ཡང་ སྤ་རོའི་གནམ་ཐང་ནང་ བྷུ་ཊཱན་ཨེ་ཡར་ལེནཛ་གི་ ཆབ་གསང་ནང་ལས་ གསེར་ཀེ་ཇི་ ༡ ལྷགཔ་ཅིག་ ཐོབ་ཡོདཔ་ཨིན་པས།
གསེར་དེ་ཡང་ གསེར་ཕྱེའི་རྣམ་པ་སྦེ་ ཟླཝ་ ༢ དེ་ཅིག་གི་ཧེ་མར་ གནམ་ཐང་ནང་ ལཱ་འབད་མི་ ལས་གཡོགཔ་ ༣ གྱིས་ ཐོབ་པའི་ཤུལ་ལས་ ཐིམ་ཕུར་བསྐྱལ་ཏེ་ བཞུ་ཞིནམ་ལས་ གསེར་སྤག་ཅུང་དང་ ཏིག་ཅུང་ལུ་ བསྒྱུར་བཅོས་འབད་ནུག།
གནད་དོན་དེ་གི་སྐོར་ལས་ རྒྱལ་གཞུང་འགག་སྡེ་གིས་ ཧ༌གོ་བའི་ཤུལ་ལུ་ ཁོང་ ༣ འཚོལ་ཏེ་ གསེར་དེ་ཚུ༌ ལེན་བཞག་ཡོད་རུང་ ཁོང་ ༣ གྱིས་ རྒྱལ་གཞུང་འགག་སྡེ་དང་ མཉམ་འབྲེལ་ལེགས་ཤོམ་སྦེ་ འཐབ་པ་ལུ་བརྟེན་ཏེ་ ད་ལྟོ་ ཁོང་ ༣ ལུ་ ཉེས་འཛུགས་མ་འབད་བར་ བཞག་ཡོདཔ་ད་ བྷུ་ཊཱན་ཨེ་ཡར་ལེནཛ་ ཡིག་ཚང་གི་ ཁ་ཐུག་ལས་ཡང་ ནང་འཁོད་དྲི་དཔྱད་ཚུ་ འགོ་འདྲེན་འཐབ་དོ་ཡོདཔ་ཨིན་པའི་གནས་ཚུལ།