རྒྱལ་གཞུང་འབྲུག་གི་འགག་སྡེའི་ ཁྲིམས་འགལ་ལཱ་ངན་གྱི་ རྩིས་དཔྱད་དང་འཁྲིལཝ་ད་ སྤྱི་ལོ་ ༢༠༢༦ སྤྱི་ཟླ་ ༡ པ་ལས་ སྤྱི་ཟླ་ ༦ པ་ཚུན་ལུ་ ཨ་ལོའི་ཁྲིམས་འགལ་གྱི་ལཱ་དང་ འདོད་སྤྱོད་གནོད་འགེལ་ མཆོད་རྟེན་སློང་ནི་ ལྷ་ཁང་འཕྲོག་བཅོམ་ཚུ་གི་ བྱ་ངན་གྱི་ ཚད་གཞི་དེ་ ན་ཧིང་གི་ འགོ་ཐོག་ལོ་ཕྱེད་ཀྱི་ དུས་ཡུན་དང་ཕྱདཔ་ད་ ཡར་སེང་སོང་ཡོདཔ་ཨིན་པས།
དེ་གི་ནང་ལས་ ཨ་ལོའི་ཁྲིམས་འགལ་གྱི་ ལཱ་ངན་དེ་ ན་ཧིང་ གནད་དོན་ཁག་ ༦༤ ཐོན་ཡོད་མི་ལས་ དུས་ཅི་ སྤྱི་ལོ་ ༢༠༢༦ ལུ་ ༡༥༧ གུ་ ཡར་སེང་སོང་ཡོདཔ་ད་ དེ་ཡང་ མཐོ་ཤོས་ར་ སྨྱོ་རྫས་ལོག་སྤྱོད་དང་ དེ་གི་འོག་ལས་ར་ བརྡུང་རྫོབ་དང་ ཨར་རྐུན་དང་འབྲེལ་བའི་ ལཱ་ངན་ཚུ་ ཡར་སེང་སོང་ནུག།
རྒྱལ་གཞུང་འབྲུག་གི་འགག་སྡེའི་ གནད་སྡུད་ལྟར་དུ་འབད་བ་ཅིན་ སྤྱི་ལོ་ ༢༠༢༦ ལུ་ སྨྱོ་རྫས་ལོག་སྤྱོད་ ༦༡ དང་ བརྡུང་རྫོབ་ ༣༩ དེ་ལས་ སྡོད་ཁྱིམ་ཨར་རྐུན་ ༡༧ དང་ ཨར་རྐུན་གཞན་ ༡༤ ཐོན་ཡོདཔ་ད་ སྤྱི་ལོ་ ༢༠༢༥ ལུ་འབད་བ་ཅིན་ བརྡུང་རྫོབ་ ༢༢ དང་ སྨྱོ་རྫས་ལོག་སྤྱོད་ ༡༧ དེ་ལས་ སྡོད་ཁྱིམ་ཨར་རྐུན་ ༡༠ དང་ ཨར་རྐུན་གཞན་ ༤ གཡོ་སྒྱུའི་ལཱ་ངན་ ༣ ཐོན་ཡོདཔ་ཨིན་པས།
དེ་བཟུམ་མའི་ གནོད་འགེལ་དེ་ཡང་ ས་གནས་ནང་ མི་རློབས་ཡར་སེང་དང་ གཞིས་ཆགས་ཡར་སེང་ ཨ་ལོ་ཚུ་གི་ བཟའ་ཚང་ཏན་ཏན་མེད་མི་དང་ ཕམ་གིས་ བལྟ་རྟོག་དང་ རྒྱབ་སྐྱོར་ཚུ་གི་ ལྡང་ཚད་མེད་མི་ལུ་བརྟེན་ཏེ་ ཐོན་ཡོདཔ་སྦེ་བཀོད་ནུག།
