ཡུ་ཨེཛ་གི་ གནམ་གྲུ་ཐང་ཚུ་ནང་ གནམ་གྲུ་ ༡༠,༠༠༠ དེ་ཅིག་ ནང་བསྐྱོད་དང་ ཕྱིར་ཐོན་འབད་ནི་ ཆ་མེད་བཏང་ཡོདཔ།

བི་བི་སི།
སྤྱི་ཟླ་ ༡༡ པའི་ཚེས་ ༡༣ ལུ་ ཡུ་ཨེཛ་གི་ གནམ་གྲུ་ཐང་ཚུ་ནང་ གནམ་གྲུ་ ༡༠,༠༠༠ དེ་ཅིག་ ནང་བསྐྱོད་དང་ ཕྱིར་ཐོན་ཆ་མེད་བཏང་ཡོདཔ་ད་ དེ་ཡང་ ཌེལ་ཊ་མཁའ་འགྲུལ་དང་ ཨ་མི་རི་ཀཱན་ མཁའ་འགྲུལ་གྱིས་ གནམ་གྲུ་ ༢,༢༠༠ ལྷགཔ་ཅིག་དང་ ཡུ་ནའི་ཊེཌ་ མཁའ་འགྲུལ་གྱིས་ གནམ་གྲུ་ ༡,༨༠༠ དེ་ལས་ ས་འུཐ་ཝེཛ་གིས་གནམ་གྲུ་ ༡,༤༠༠ ཆ་མེད་བཏང་ནུག།
ཡུ་ཨེཛ་གི་ སྐྱེལ་འདྲེན་དྲུང་ཆེན་ སི་ཨཱན་ཌ་ཕི་དང་ ནང་འཁོད་ཉེན་སྲུང་དྲུང་ཆེན་ མཱག་ཝེན་མུ་ལིན་ ༢ ཀྱིས་ གནམ་གྲུ་ཚུ་ དེ་སྦེ་ འཕུར་འགྲུལ་ཆ་མེད་བཏང་མི་དེ་ འཕྲུལ་ཆས་ཚུ་གི་ གནད་སྡུད་ཚུ་ ཐང་ཐིགས་གཅིག་སྦེ་ མེད་ནི་དེ་གིས་ཨིན་ཟེར་ བཤད་ཡོདཔ་ཨིན་པས།
ཨིན་རུང་ གནམ་གྲུ་ཆ་མེད་ འགོ་བཙུགས་ཏེ་ དུས་ཡུན་ཆུ་ཚོད་ ༥ གི་རྒྱབ་ལས་ རྒྱལ་ཡོངས་ཀྱི་ གནས་ཚད་ཁར་ ནང་འཁོད་འཕུར་འགྲུལ་ཚུ་ སླར་ལོག་འཕུར་ཆོགཔ་སྦེ་ བཟོ་ཡོད་རུང་ འགྲུལ་པ་ལེ་ཤ་ཅིག་ བསགས་ཏེ་ཡོདཔ་ལས་ དུས་ཡུན་རིངམོ་སྦེ་ར་ སྒུག་དགོ་པའི་ དཀའ་ངལ་བྱུང་ཡོདཔ་སྦེ་བཀོད་ནུག།
སྐྱེལ་འདྲེན་དྲུང་ཆེན་ སི་ཨཱན་ཌ་ཕི་གིས་ དེ་བཟུམ་མའི་ དཀའ་ངལ་ཅན་གྱི་ གནས་སྟངས་དེ་ གཞུང་ལས་ མ་དངུལ་མ་བྱིན་པར་ འཕྲུལ་ཆས་ཚུ་ དུས་མཐུན་བཟོ་མ་ཚུགས་པ་ལུ་བརྟེན་ཏེ་ཨིནམ་ད་ དེང་དུས་དང་བསྟུན་པའི་ འཕྲུལ་ཆའི་རིམ་ལུགས་གསརཔ་ བཙུགས་ནིའི་དོན་ལུ་ ཡུ་ཨེཛ་ཌོ་ལར་ ཐེར་འབུམ་ ༥༠ དགོས་མཁོ་ཡོདཔ་སྦེ་ བཤད་ཡོདཔ་ཨིན་པས།
གནད་དོན་དེ་ལུ་ གཞུང་སྐྱོང་དང་ ལྡོ་ཕྱོགས་གཉིས་ཆ་ར་གིས་ ཞིབ་དཔྱད་འབད་དགོ་པའི་ དགོས་མཁོ་བཀོད་ཡོདཔ་ད་ ནང་འཁོད་ཉེན་སྲུང་དྲུང་ཆེན་གྱིས་ རྒྱལ་སྤྱིའི་གནས་རིམ་ནང་ མའི་ཀོར་སོཕ་ལུ་ གནོད་པ་བྱུང་མི་དང་ འབྲེལ་བ་མེད་ཟེར་བཤད་ནུག།
སྐྱེལ་འདྲེན་ཉེན་སྲུང་གི་ བདག་སྐྱོང་འགོ་དཔོན་བགྲེསཔ་ ཇཱོན་པིཛ་ཊོལ་གྱིས་ རྒྱལ་ཁབ་ནང་གི་ གནམ་གྲུ་ཐང་ཚུ་ནང་ གནས་སྟངས་སྔར་བཞིན་དུ་ བཟོ་ནི་དེ་ གང་མགྱོགས་འབད་ཚུགས་པའི་ རེ་བ་མེད་ལུགས་ཚུ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།