ཡུ་ཀེའི་བློན་ཆེན་ རི་ཤི་སུ་ནག་གིས་ རྒྱ་གར་གྱི་ མི་སེར་ཚུ་ ཡུ་ཀེ་ལུ་ འཛུལ་ཞུགས་ཆོག་ཐམ་ ༣,༠༠༠ རེ་ བྱིན་ནི་ཨིན་པའི་ཁས་ལེན།

ཨེན་ཌི་ཊི་ཝི།
ཡུ་ཀེའི་བློན་ཆེན་ རི་ཤི་སུ་ནག་དང་ རྒྱ་གར་གྱི་བློན་ཆེན་ ན་རེན་ད་ར་ མོ་དི་ ༢ མཇལ་ཕྲད་མཛད་པའི་སྐབས་ལུ་ ཡུ་ཀེའི་བློན་ཆེན་གྱིས་ རྒྱ་གར་ལས་ ཁྱད་ལཱ་འབད་མི་ཚུ་ ཡུ་ཀེ་ལུ་ ལཱ་འབད་བར་ འགྱོ་ནིའི་དོན་ལས་ ལོ་བསྟར་བཞིན་དུ་ འཛུལ་ཞུགས་ཆོག་ཐམ་ ༣,༠༠༠ རེ་ བྱིན་ནི་སྦེ་ ཁ་བཟེད་ནུག།
དེ་ཡང་ ན་ཧིང་ ཡུ་ཀེ་དང་ རྒྱ་གར་ ༢ ཀྱི་བར་ན་ མི་སེར་ཚུ་ གནས་སྤོ་དང་ སྒུལ་བསྐྱོད་ཀྱི་ མཉམ་འབྲེལ་ལས་འཆར་ཅིག་ བརྩམས་མི་དེ་ ཏན་ཏན་ཨིན་པའི་སྐོར་ལས་ གཙོ་རིམ་བཀོད་མི་ ལས་འཆར་དེ་ལུ་བརྟེན་ཏེ་ ཡུ་ཀེ་ལུ་ འཛུལ་ཞུགས་ཆོག་ཐམ་གྱི་ ཁེ་ཕན་ཐོབ་མི་ རྒྱལ་ཁབ་དང་པ་དེ་ རྒྱ་གར་ཨིན་ཟེར་ བི་རི་ཊིཤ་གཞུང་གིས་ བཤད་ཡོདཔ་ཨིན་པས།
ད་རེས་ ཡུ་ཀེ་དང་ རྒྱ་གར་ ༢ ཀྱི་བར་ན་ཡོད་མི་ ན་གཞོན་ཁྱད་ལཱའི་ ལས་འཆར་དེ་ གཏན་འཁེལ་སོང་ཡོདཔ་ལས་ རྒྱ་གར་གྱི་ ཁྱད་ལཱ་འབད་མི་ མཐོ་རིམ་ཤེས་ཚད་ཅན་ སྐྱེས་ལོ་ ༡༨ ལས་ ༣༠ ཚུན་གྱི་བར་ན་འབད་མི་ཚུ་ ཡུ་ཀེ་ལུ་ དུས་ཡུན་ལོ་ངོ་ ༢ རེ་ ལཱ་འབད་བར་ འགྱོ་ཆོག་ནི་ཨིནམ་ད་ དེ་བཟུམ་སྦེ་ ལས་འཆར་དེ་གི་ཐོག་ལས་ ཡུ་ཀེའི་མི་སེར་ཚུ་ཡང་ རྒྱ་གར་ལུ་ འོང་ཆོག་ནི་ཨིན་པས།
ལས་འཆར་དེ་ རྒྱ་གར་དང་ ཡུ་ཀེའི་བར་ན་ ཟུང་ཕྱོགས་ཀྱི་ མཐུན་ལམ་གལ་ཅན་ཅིག་ཨིནམ་ད་ དེ་ཡང་ ཡུ་ཀེའི་ཁ་ཐུག་ལས་ རྒྱ་གར་དང་ པེ་སི་ཕིག་ ལུང་ཕྱོགས་ནང་ དཔལ་འབྱོར་བཙན་ཐབས་ལུ་ མཐུན་འབྲེལ་སྒྲིང་སྒྲིང་ བཟོ་ནི་གི་ ཁས་ལེན་ཅིག་ཨིན་ཟེར་བཀོད་ནུག།
ད་རེས་ རྒྱལ་སྤྱིའི་སློབ་ཕྲུག་ཚུ་གི་གྲས་ལས་ བཞི་དཔྱ་གཅིག་གི་རྩིས་ རྒྱ་གར་ལས་ཨིནམ་ད་ རྒྱ་གར་གྱི་ མ་རྩ་གཞི་བཙུགས་དེ་གིས་ ཡུ་ཀེའི་ས་ཁོངས་ཚུ་ནང་ ལཱ་གཡོག་འབད་མི་ ༩༥,༠༠༠ དེ་ཅིག་ལུ་ རྒྱབ་སྐྱོར་འབད་དེ་ཡོདཔ་ཨིན་པས།
དེ་མ་ཚད་ ཡུ་ཀེ་དང་ རྒྱ་གར་གྱི་བར་ན་ ཚོང་འབྲེལ་གྱི་ བསྟུན་གྲོས་ཚུ་ཡང་ འབད་བའི་བསྒང་ཡོདཔ་ལས་ ཁ་འཆམ་འབྱུང་པ་ཅིན་ རྒྱ་གར་གྱིས་ ཡུ་རོབ་ཀྱི་ རྒྱལ་ཁབ་དང་གཅིག་ཁར་ དེ་བཟུམ་མའི་ འབྲེལ་བ་འཐབ་ནི་དེ་ འགོ་དང་པ་ འོང་ནི་ཨིན་པས།
ཚོང་འབྲེལ་སྒྲིག་ཆ་དེ་གིས་ ད་རེས་ཡོད་མི་ པ་འཱུན་ཐེར་འབུམ་ ༢༤ ཀྱི་ ཚོང་འབྲེལ་གུ་ ཡུ་ཀེ་ལུ་ རྒྱ་གར་གྱི་ ཡར་འཕར་ཅན་གྱི་ དཔལ་འབྱོར་ལས་ གོ་སྐབས་ འཐོབ་ནི་ཨིན་པས་ཟེར་ བཀོད་འདུག་པའི་གནས་ཚུལ།