པདྨ་དབང་འདུས།
སྤྱི་ཟླ་ ༦ པའི་ཚེས་ ༢༤ ལུ་ འབྲུག་སླར་བྱུང་གློག་མེ་ལས་འཛིན་གྱིས་ ཀཱར་བཱོན་ཐོན་ཁུངས་སྒེར་སྡེ་ཚད་འཛིན་དང་གཅིག་ཁར་ མེ་ག་ཝཊ་ ༡༠༤ འབད་མི་ དྭངས་ཆུ་གློག་མེ་ལས་འགུལ་དེ་ མཉམ་འབྲེལ་ཐོག་ལས་ གོང་འཕེལ་གཏང་ནིའི་དོན་ལུ་ བགོ་བཤའ་འཆང་དོན་གྱི་ ཆིངས་ཡིག་གུ་ མིང་རྟགས་བཀོད་ནུག།
དེ་ཡང་ མི་རྗེ་བློན་ཆེན་མཆོག་གི་ སྐུ་མདུན་ལུ་སྦེ་ འབྲུག་སླར་བྱུང་གློག་མེ་ལས་འཛིན་གྱི་ འཛིན་སྐྱོང་མདོ་ཆེན་ དྲག་ཤོས་ཚེ་དབང་རིག་འཛིན་དང་ ཀཱར་བོན་ཐོན་ཁུངས་སྒེར་སྡེ་ཚད་འཛིན་གྱི་ འཛིན་སྐྱོང་མདོ་ཆེན་ ཨ་བྷི་ནབ་ཀུ་མར་ཇ་ལཱན་གྱིས་ བཀོད་ཡོདཔ་ཨིན་པས།
བགོ་བཤའ་འཆང་དོན་གྱི་ ཆིངས་ཡིག་དེ་གིས་ འབྲུག་སླར་བྱུང་གློག་མེ་ལས་འཛིན་དང་ ཀཱར་བོན་ཐོན་ཁུངས་སྒེར་སྡེ་ཚད་འཛིན་གྱིས་ དྭངས་ཆུ་གློག་མེ་ལས་འགུལ་དེ་ དམིགས་བསལ་གྱི་ དགོས་དོན་ཐབས་ལམ་བརྒྱུད་དེ་ མཉམ་འབྲེལ་ཐོག་ལས་ ལག་ལེན་འཐབ་ནི་ལུ་ ཐབས་བྱུས་ཅན་གྱི་ མཉམ་འབྲེལ་གྱི་སྒྲིག་བཀོད་ ཚུལ་མཐུན་བཟོཝ་ཨིན་ཟེར་བཀོད་ནུག།
