འབྲུག་མཁའ་འགྲུལ་ལས་འཛིན་གྱིས་ གནམ་གྲུ་ཧེ་ལི་ཀོབ་ཊར་གསརཔ་ ཨེཆ་༡༣༠ཊི་༢ ཟེར་མི་མཁོ་སྒྲུབ།

འབྲུག་མཁའ་འགྲུལ་ལས་འཛིན་གྱིས་ ཨེ་༥བི་ཨེཆ་ཝི་ཟེར་ ཐོ་བཀོད་གྲུབ་སྟེ་ ད་ལྟོ་ཡོད་མི་ ཧེ་ལི་ཀོབ་ཊར་སྡེ་ཚན་གུ་ དེང་དུས་དང་བསྟུན་པའི་ གནམ་གྲུ་ཧེ་ལི་ཀོབ་ཊར་གསརཔ་ ཨེཆ་༡༣༠ཊི་༢ ཟེར་མི་ཅིག་ལྷོད་ནུག།
དེ་ཡང་ མདང་ཞག་ སྤྱི་ཟླ་ ༧ པའི་ཚེས་ ༡ ལུ་ ད་རེས་ལྷོད་མི་ ཧེ་ལི་ཀོབ་ཊར་དང་ ཅོག་འཐདཔ་འབད་མི་ཅིག་ ནང་འདྲེན་འབད་ཡོདཔ་ལས་ ད་རེས་ ནངས་པར་ རྒྱལ་ཁབ་ནང་ གནམ་གྲུ་ཧེ་ལི་ཀོབ་ཊར་ ༣ ཡོདཔ་ལས་ ཞབས་ཏོག་མ་འདྲཝ་ཚུ་ བྱིན་ནི་གི་ ལྕོགས་གྲུབ་ཚུ་ ཡར་སེང་སོང་ཡོདཔ་ཨིན་པས།
གནམ་གྲུ་ཧེ་ལི་ཀོབ་ཊར་གྱི་ འགོ་འབྱེད་དེ་ཡང་ སྤྱི་ཟླ་ ༡༠ པའི་ཚེས་ ༢༣ ལུ་ ལྷ་བསངས་ཁྲུས་གསོལ་གྱི་ཐོག་ལས་ འབྲུག་མཁའ་འགྲུལ་ལས་འཛིན་གྱི་ བཀོད་ཁྱབ་གཙོ་འཛིན་འགོ་དཔོན་དང་ འཛིན་སྐྱོང་སྡེ་ཚན་གྱིས་འབད་ནུག།
གནང་གྲུ་ཧེ་ལི་ཀོབ་ཊར་ ཨེཆ་༡༣༠ཊི་༢ཟེར་མི་དེ་ནང་ བྱ་སྟབས་བདེ་བའི་ བསྒྱུར་བཅོས་ཚུ་ཡོད་པའི་གྲས་ལས་ དེད་དཔོན་གྱི་ ལཱ་ཉུང་སུ་བཟོ་ཚུགས་པའི་ ཨང་གནས་འཕྲུལ་ཆས་དང་ དེང་དུས་དང་བསྟུན་པའི་ ཁྱད་ཆོས་ཚུ་ཡོདཔ་མ་ཚད་ ལག་ལེན་གྱི་ འཇོན་ཚད་ཡང་ ལེགས་ཤོམ་ཡོདཔ་ཨིན་པས།
གནམ་གྲུ་དེ་ འགྲུལ་པ་སྐྱེལ་འདྲེན་དང་ གློ་བུར་སྨན་བཅོས་ཀྱི་དོན་ལུ་ ནདཔ་སྐྱེལ་འདྲེན་ དེ་ལས་ ས་ཆ་གླིང་སྐོར་དང་ བལྟ་ཞིབ་ཚུ་ ཉེན་སྲུང་གི་སྒོ་ལས་ ལག་ལེན་འཐབ་ཚུགས་ནི་ཨིན་པའི་ཁར་ གནམ་གྲུ་དེ་གི་ སྒྲ་སྐད་ཡང་ཆུང་ཀུ་འབདཝ་ལས་ དྲན་ཚོར་ཅན་གྱིས་ མཐའ་འཁོར་ལུ་ཡང་ གནོད་ཉེན་མི་འོང་ནི་ཨིན་པས།
འབྲུག་མཁའ་འགྲུལ་གྱི་ གནམ་གྲུ་ཧེ་ལི་ཀོབ་ཊར་སྡེ་ཚན་ནང་ ད་རེས་ ཧེ་ལི་ཀོབ་ཊར་ ༣ ཡོདཔ་ལས་ རྒྱལ་ཁབ་ཕྱི་ནང་ ༢ ཀྱི་ནང་ གློ་བུར་གྱི་ ནདཔ་སྐྱེལ་འདྲེན་དང་ ས་ཆ་གླིང་སྐོར་ འཚོལ་ཞིབ་དང་ སྲོག་སྐྱབས་ལ་སོགས་པའི་ དགོས་མཁོ་ཡར་སེང་ཅན་སྦེ་ ཐོན་མི་ཚུ་ སྔར་བ་ལྷག་པའི་ ལྕོགས་གྲུབ་ཀྱི་ཐོག་ལས་ འགྲུབ་ནི་གི་དོན་ལུ་ ཉེན་སྲུང་དང་ འཇོན་ཚད་ཅན་གྱི་ ཞབས་ཏོག་ཚུ་ བྱིན་ཚུགས་ནི་ཨིན་པའི་གནས་ཚུལ།