སྤྱི་ཟླ་ ༨ པའི་ཚེས་ ༢༢ ལས་ ༢༤ ཚུན་ ཉིན་གྲངས་ ༣ གྱི་རིང་ལུ་ འབྲུག་གི་ཕྱི་འབྲེལ་དྲུང་ཆེན་ པདྨ་ཆོས་སྒྲོན་དེ་ རྒྱ་གར་གྱི་རྒྱལ་ས་ ནིའུ་དྷི་ལི་ལུ་ གཞུང་འབྲེལ་ལྟ་སྐོར་ལུ་སོང་ནུག།
དེ་ཡང་ རྒྱ་གར་གྱི་ ཕྱི་འབྲེལ་དྲུང་ཆེན་ ཝི་ནེ་མོ་ཧཱན་ ཀའུ་ཏ་ར་གིས་ མགྲོན་བརྡ་འབད་མི་དང་འཁྲིལ་ཏེ་ སོང་ཡོདཔ་ད་ པདྨ་ཆོས་སྒྲོན་དེ་ སྤྱི་ལོ་ ༢༠༢༡ སྤྱི་ཟླ་ ༡༡ པའི་ཚེས་ ༦ ལུ་ ཕྱི་འབྲེལ་དྲུང་ཆེན་སྦེ་ བསྐོ་བཞག་གནང་པའི་ཤུལ་ལས་ དེ་སྦེ་ གཞུང་འབྲེལ་ལྟ་སྐོར་ལུ་ འགྱོ་མི་དེ་ འགོ་དང་པ་ཨིན་པས།
དེ་བསྒང་ ཕྱི་འབྲེལ་དྲུང་ཆེན་ པདྨ་ཆོས་སྒྲོན་གྱིས་ རྒྱ་གར་གྱི་ ཕྱི་འབྲེལ་དྲུང་ཆེན་དང་ཕྱད་དེ་ རྒྱལ་ཁབ་ཕན་ཚུན་ ༢ ཀྱི་ གནད་དོན་ཚུ་གི་སྐོར་ལས་ གྲོས་བསྟུན་འབད་ནུག།
ལྟ་སྐོར་དེ་ཡང་ རྒྱ་འབྲུག་རྒྱལ་ཁབ་ ༢ ཀྱི་བར་ན་ ཆེ་མཐོའི་གནས་རིམ་ནང་ དུས་རྒྱུན་ལྟ་སྐོར་བརྗེ་སོར་གྱི་ ལམ་ལུགས་དང་འཁྲིལ་ཏེ་ཨིན་པའི་གནས་ཚུལ།
