རྡོ་རྗེ་དབང་ཕྱུག།
སྤྱི་ཟླ་ ༡༡ པའི་ཚེས་ ༦ ལུ་ མི་དབང་མངའ་བདག་རིན་པོ་མཆོག་གིས་ སྤ་རོ་ལུ་སྦེ་ ཚེ་དབང་ཆོས་འཕེལ་རྡོ་རྗེ་ལུ་ དྲག་པོའི་རིན་ཆེན་གཙུག་གཏོར་གི་ གཟེངས་བསྟོད་རྟགས་མ་གནང་ཡོདཔ་ད་ ཁོ་ལུ་ དེ་བཟུམ་མའི་ རྟགས་མ་གནང་མི་དེ་ཡང་་ ང་བཅས་རའི་ འབྲུག་མི་ཚུ་ འཛམ་གླིང་སྤྱི་ཚོགས་ཀྱི་ ཞི་བདེ་ཉེན་སྲུང་ལས་རིམ་ནང་ བཅའ་མར་གཏོགས་ནིའི་དོན་ལས་ ལེགས་ཤོམ་སྦེ་ འགོ་འདྲེན་འཐབ་སྟེ་ ཕྱག་ཞུ་ཡོད་པའི་ ངོས་འཛིན་ལུ་ཨིན་པས།
ཚེ་དབང་ཆོས་འཕེལ་རྡོ་རྗེ་དེ་ ཕྱི་འབྲེལ་ལྷན་ཁག་ནང་ ཕྱག་ཞུ་སྡོད་པའི་རིང་ལུ་ སྤྱི་ལོ་ ༢༠༡༤ ལས་ འགོ་བཙུགས་ཏེ་ འབྲུག་མི་ཚུ་ འཛམ་གླིང་སྤྱི་ཚོགས་ཀྱི་ ཞི་བདེ་ཉེན་སྲུང་ལས་རིམ་ནང་ བཅའ་མར་གཏོགས་ནིའི་ ལས་རིམ་འགོ་འདྲེན་པ་སྦེ་ ཕྱག་ཞུ་ཡོདཔ་ད་ འཕྲལ་ཁམས་ཅིག་ཁར་ ཤེས་རིག་ལྷན་ཁག་གི་ དྲུ་ཆེན་ངོ་ཚབ་སྦེ་ བསྐོ་བཞག་གནང་ནུག།
དྲག་པོའི་རིན་ཆེན་གཙུག་གཏོར་གྱི་ གཟེངས་བསྟོད་རྟགས་མ་འདི་ འབྲུག་གི་དམག་སྡེའི་ རྟགས་མའི་གྲས་ལས་ དབུ་འཕང་མཐོ་ཤོས་ཅིག་ཨིནམ་མ་ཚད་ རྩ་བ་ ༣ ལུ་ ཉེན་སྲུང་དང་ ཕན་བདེ་ཚུ་ རྩ་བརྟན་འབྱུང་ནིའི་དོན་ལས་ ཁྱད་དུ་འཕགས་པའི་ ཞབས་ཏོག་ཞུ་མི་ཚུ་ལུ་ གནངམ་ཨིན་པའི་གནས་ཚུལ།
