སྤྱི་ཟླ་ ༤ པའི་ཚེས་ ༡༩ ལུ་ མི་དབང་མངའ་བདག་རིན་པོ་ཆེ་མཆོག་གིས་ དགེ་ལེགས་ཕུག་ལུ་ གཟིགས་སྐོར་གནངམ་དང་འབྲེལ་ རྒྱ་གར་ཨ་སམ་གྱི་ ཇོ་གི་གྷོ་པ་ལུ་ བཟོ་བསྐྲུན་འབད་བའི་བསྒང་ཡོད་མི་ རྒྱལ་སྤྱི་ཐབས༌ལམ༌གྲ༌འགྲིག༌སྣ་མང་ གླིང༌ག༌ལུ༌ཡང༌ གཟིགས་སྐོར་གནང་ནུག།
དེ་བསྒང༌ ཨ་སམ་གྱི་བློན་པོ་ ཇ་ཡན་ཏ་ མཱལ་ལ་བ་རུ་དང་ ཨ་སམ་གྱི་ གཙོ་འཛིན་དྲུང་ཆེན་ ཌོག་ཊར་ར་ཝི་ ཀོ་ཊ་ ༢ ཀྱིས་ ཕྱག་ཞུ་སྟེ་ གཟིགས་སྐོར་གནང་ཡོདཔ་མ་ཚད་ ཉེ་འདབས་ལུ་ཡོད་མི་ ནང་འཁོད་ཆུ་ཐོག༌སྐྱེལ་འདྲེན་འབབ༌ཚུགས༌ལུ་ཡང་ གཟིགས་ཞིབ་གནང་ཡོདཔ་ཨིན་པས།
མི་དབང་མངའ་བདག་རིན་པོ་ཆེ་མཆོག་ དགེ་ལེགས་ཕུག་ལུ་ བཞུགས་པའི་སྐབས་ འབྲུག་དང་ རྒྱ་གར་གྱི་ ས་མཚམས་ཁར་ བཟོ་སྐྲུན་འབད་བའི་བསྒང་ཡོད་མི་ གཅིག་སྒྲིལ༌ཞིབ་དཔྱད་སྒོ་ར་ལུ་ཡང་ གཟིགས་ཞིབ་གནང་ནུག།
དེ་གི་ཧེ་མར་ མི་དབང་མངའ་བདག་རིན་པོ་ཆེ་མཆོག་གིས་ གསར་སྤང་དང་ གཞལ་སྒང་རྫོང་ཁག་གི་ འགོ་དཔོན་ཚུ་དང་ དགེ་ལེགས་ཕུག་ལུ་ཡོད་མི་ འགོ་དཔོན་ཚུ་དང་ ཚོང་པ་ཚུ་དང་ མཇལ་ཕྲད་མཛད་གནང་ཡོདཔ་ཨིན་པས།
དེ་མ་ཚད་ མི་དབང་མངའ་ཞབས་མཆོག་གིས་ ལུང་ཕྱོགས་ཀྱི་ མ་འོངས་པའི་འཆར་སྣང་ བསྐྱར་གསོའི་དོན་ལུ་ དགེ་ལེགས་ཕུག་གི་ མི་སེར་ཚུ་དང་ཡང་ མཇལ་ཕྲད་མཛད་གནང་ཐོག་ལས་ དགེ་ལེགས་ཕུག་གི་ རྒྱལ་སྤྱི་གནམ་ཐང་ལུ་བརྟེན་ཏེ་ མི་སྡེ་དང་ མ་འོངས་ལུང་ཕྱོགས་ཀྱི་དོན་ལས་ འགྱུར་བ་དེ་ ཐབས་མེདཔ་ཅིག་ཨིན་རུང་ མི་སེར་ཚུ་གི་མཐའ་དོན་ལུ་ གཙོ་རིམ་དང་པ་དེ་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་ གོང་འཕེལ་དེ་ མི་མང་ཡོངས་ལུ་ ཕན་ཐོགས་འོང་ནིའི་དོན་ལས་ རིག་གསར་གྱི་ ཐབས་ལམ་ཚུ་གུ་ གཞི་བརྟེན་ནི་ཨིན་ཟེར་ གསུངས་གནང་འདུག་པའི་གནས་ཚུལ།
