མཐའ་ཡས་ལེན་ རྒྱལ་ཁབ་ནང་ འདས་པའི་ལོ་ངོ་ ༢ ཀྱི་ ནང་འཁོད་ལུ་ བློན་ཆེན་ཨང་གསུམ་པ་གདམ་འཐུ།

བི་བི་སི།
མཐའ་ཡས་ལེན་གྱིས་ འདས་པའི་ལོ་ངོ་ ༢ ཀྱི་ ནང་འཁོད་ལུ་ རྒྱལ་ཁབ་ཀྱི་ བློན་ཆེན་ ༢ ཕྱིར་དབྱུངས་འབད་བའི་ཤུལ་ལས་ ད་རེས་ ད་རུང་ཡང་ སྤྱི་ཚོགས་ནང་ལས་ ཚོང་པ་འབྱོར་ལྡན་ ཨ་ནུ་ཊིན་ ཅཱན་ཝི་ར་ཀུལ་དེ་ བློན་ཆེན་སྦེ་ གདམ་འཐུ་གྲུབ་ཡོདཔ་ཨིན་པས།
མཐའ་ཡས་ལེན་གྱི་ སྲིད་དོན་ནང་ དབང་ཤུགས་ཅན་གྱི་མི་བརྒྱུད་ པེ་ཏོང་ཏ་རཱན་ ཤི་ན་ཝ་ཏ་ར་དེ་ ཀམ་བོ་ཌི་ཡ་དང་གཅིག་ཁར་ ས་མཚམས་ཟིང་འཁྲུག་གི་སྐོར་ལས་ བཟང་སྤྱོད་ལས་འགལ་བའི་ ལཱ་བྱ་འཐབ་པ་ལུ་བརྟེན་ཏེ་ འདས་པའི་བདུན་ཕྲག་ནང་ རྩ་ཁྲིམས་ཅན་གྱི་ ཁྲིམས་འདུན་ལས་ ཕྱིར་དབྱུངས་འབད་ནུག།
ཨ་ནུ་ཊིན་གྱི་ བྷུམ་ཇའི་སྲིད་ཚོགས་དེ་ ཤི་ན་ཝ་ཏ་རའི་ ཕིའུ་མཐའ་ཡས་སྲིད་ཚོགས་དང་ མཉམ་བསྡོམས་འབད་དེ་ཡོད་ས་ལས་ ཕྱིར་ཐོན་འབད་དེ་ ཨ་ནུ་ཊིན་ ཅཱན་ཝི་ར་ཀུལ་གྱིས་ བློན་ཆེན་གྱི་ གོ་གནས་དོན་ལས་ སེམས་སྐུལ་འབད་བའི་ཤུལ་ལུ་ སྤྱི་ཚོགས་ནང་ལས་ རྒྱབ་སྐྱོར་ཐོབ་ཡོདཔ་ཨིན་པས།
ཨིན་རུང་ འཕྲལ་ཁམས་ཅིག་ཁར་ མཐའ་ཡས་ལེན་གྱི་ ཁྲིམས་འདུན་ལས་ གཞུང་སྐྱོང་ཆ་མེད་དང་ དམག་སྡེའི་གཞུང་སྐྱོང་དབང་བཟུང་ཚུ་ ཚར་ལེ་ཤ་ཅིག་ར་ ལག་ལེན་འཐབ་མི་དང་བསྟུནམ་ད་ མཐའ་ཡས་ལེན་གྱི་ གནས་སྟངས་དེ་ ངེས་མེད་ཅན་ཅིག་ལུ་ འགྱུར་ཡོདཔ་སྦེ་བཀོད་ནུག།
སྤྱི་ལོ་ ༢༠༠༡ ལུ་ པེ་ཏོང་ཏ་རཱན་གྱི་ཨ་པ་ ཐག་སིན་ཤི་ན་ཝ་ཏ་ར་དེ་ བློན་ཆེན་སྦེ་ བཙག་འཐུ་གྲུབ་ཞིནམ་ལས་ཚུར་ སྲིད་དོན་གྱི་ དབང་ཤུགས་ཡོད་མི་ བཟའ་ཚང་ཅིག་སྦེ་ གནས་ཡོད་རུང་ ད་རེས་ ཨ་ནུ་ཊིན་གྱིས་ བློན་ཆེན་ཐོབ་ཡོདཔ་ལས་ ཤི་ན་ཝ་ཏ་རའི་ བཟའ་ཚང་ལུ་ སེམས་ཕམ་འབྱུང་ནི་མས་ཟེར་ཨིན་པས།
ད་རེས་ བློན་ཆེན་སྦེ་ གདམ་འཐུ་གྲུབ་མི་ ཨ་ནུ་ཊིན་ ཅཱན་ཝི་ར་ཀུལ་ལུ་ སྤྱི་ཚོགས་ནང་ འཐུས་མི་གྲངས་མང་ཡོད་མི་ པི་པཱལཛ་པར་ཊི་གིས་ཡང་ རྒྱབ་སྐྱོར་ཡོདཔ་སྦེ་ཨིན་རུང་ པི་པཱལཛ་པར་ཊི་དེ་ གཞུང་སྐྱོང་འབད་ནི་ལས་ བཀག་དམ་འབད་ནུག་ཟེར་ བཀོད་འདུག་པའི་གནས་ཚུལ།