རོའི་ཊརཛ། སྤྱི་ཟླ་ ༧ པའི་ཚེས་ ༡༦ ལུ་ ཨི་རན་གྱིས་ ཧོར་མུཛ་མཚོ་གླིང་དེ་ འགྲུལ་སྐྱོད་འབད་མ་ཆོག་པའི་ ཉེན་ཁ་ཅན་གྱི་ ས་ཁོངས་ཅིག་ཨིནམ་སྦེ་ ངོས་འཛིན་འབད་ཡོད་པའི་སྐོར་ལས་ བཤད་ཡོདཔ་ཨིན་པས། དེ་ཡང་ ཡུ་ཨེཛ་གི་སྲིད་འཛིན་ ཌོ་ནཱལ་ཊཱམ་གྱིས་ ཨི་རཱན་གྱི་ གཞི་རྟེན་མཐུན་རྐྱེན་ཚུ་ལུ་ གནོདཔ་བཀལ་ནི་གི་ འཇིགས་སྐུལ་འབད་བ་ཅིན་ ཨི་རཱན་གྱིས་ཡང་ ག་ལཱཕ་ལུང་ཕྱོགས་ཀྱི་ གཞི་རྟེན་མཐུན་རྐྱེན་ག་ར་ལུ་ གནོདཔ་བཀལ་ནི་ཨིན་པའི་ ཉེན་བརྡ་འབད་ནུག།
བི་བི་སི། སྤྱི་ཟླ་ ༧ པའི་ཚེས་ ༡༥ ལུ་ ར་ཤི་ཡ་གིས་ ཡུ་ཀེ་རེན་ རྒྱལ་ཁབ་ནང་ ནུབ་ཅིག་གི་རིང་ལུ་ གནོད་འཚུབ་བཀལ་ཡོདཔ་ལས་ མི་གྲངས་ ༡༤ ལུ་ ཤི་རྐྱེན་བྱུང་ཡོདཔ་སྦེ་ ས་གནས་ཀྱི་ འགོ་དཔོན་ཚུ་གིས་ གསལ་བཤད་འབད་ནུག། དེ་ཡང་ ཨོ་དི་ས་ ལུང་ཕྱོགས་ཀྱི་ བེ་ལེག་སི་ཟེར་མི་ རྒྱ་མཚོའི་གྲུ་ཚུགས་ལུ་ མཁའ་དམག་འཕྲུལ་ཆས་ ཌཱོན་ཚུ་དང་ མི་ཛ་ཡེལ་ཚུ་གི་ཐོག་ལས་ གནོད་འཚུབ་བཀལ་ཡོདཔ་ལས་ མི་གྲངས་ ༣ ལུ་ ཤི་རྐྱེན་བྱུང་ཡོདཔ་ད་ ལུང་ཕྱོགས་དེ་ནང་ ར་ཤི་ཡ་གིས་ དེ་བཟུམ་མའི་ གནོདཔ་བཀལ་མི་དེ་ ཉིན་གྲངས་ ༥ པ་ཨིན་པས། དེ་ལས་ གཞན་ཡང་ བྱང་ཤར་སུ་མི་ཁྲོམ་སྡེའི་ནང་ མི་གྲངས་ ༣ དང་ ལྷོ་ཕྱོགས་ཟ་པོ་རི་ཟི་ཡ་ལུ་ མི་གྲངས་ ༣ དེ་ལས་ ཤར་ལྷོ་ལུང་ཕྱོགས་གཞན་ ༣ གྱི་ནང་ མི་གྲངས་ ༥ ལུ་ ཤི་རྐྱེན་བྱུང་ཡོདཔ་སྦེ་བཀོད་ནུག།
རོའི་ཊརཛ། སྤྱི་ཟླ་ ༧ པའི་ཚེས་ ༡༤ ལུ་ ར་ཤི་ཡ་གིས་ ཡུ་ཀེ་རེན་གྱི་རྒྱལ་ས་ ཀི་ཡིབ་ལུ་ མཁའ་དམག་འཕྲུལ་ཆས་ ཌཱོན་ཚུ་དང་ མི་ཛ་ཡེལ་ཚུ་ གཅིག་ཤུལ་གཉིས་ཤུལ་སྦེ་ བཏང་ཐོག་ལས་ གནོད་འཚུབ་བཀལ་མི་དེ་ སྤྱི་ཟླ་འདི་ནང་ ཐེངས་ ༥ པ་ཨིན་པས། དེ་ཡང་ རྒྱལ་ས་ཀི་ཡིབ་ལུ་ སློབ་གྲྭ་དང་ ཚོང་འབྲེལ་རྩིས་ཏེ་ ས་ཁོངས་ཁག་ ༡༦ དེ་ཅིག་ལུ་ གནོད་སྐྱོན་བྱུང་ཡོདཔ་སྦེ་ ཡུ་ཀེ་རེན་གྱི་སྲིད་འཛིན་ ཝོ་ལོ་ཌི་མིར་ ཟེ་ལེནཛ་ཀི་གིས་ གསུངས་ཡོདཔ་མ་ཚད་ ཁྲོམ་སྡེའི་འགོ་དཔོན་ཚུ་གིས་ཡང་ ཁྲོམ་སྡེ་ནང་འཁོད་ལུ་ མེ་རྐྱེན་ལེ་ཤ་ཅིག་ བྱུང་ཡོད་པའི་ སྙན་ཞུ་འབད་ནུག། གནོད་འཚུབ་དེ་གིས་ ཡུ་ཀེ་རེན་གྱི་ ཁར་ཀིབ་ལུང་ཕྱོགས་ནང་ མི་གྲངས་ ༧ དང་ ཅེར་ནི་ཧིབ་ལུང་ཕྱོགས་ནང་ མི་གྲངས་ ༣ ལུ་ རྨ་སྐྱོན་བྱུང་ཡོདཔ་སྦེ་ཡང་ སྲིད་འཛིན་ཟེ་ལེནཛ་ཀི་གིས་ གསུངས་ཡོདཔ་ཨིན་པས། དེ་མ་ཚད་ སྤྱི་ཟླ་ ༧ པའི་ཚེས་ ༡༣ གྱི་ཕྱི་རོ་ཡང་ […]
བི་བི་སི། ད་རེས་ནངས་པ་ བང་ལ་དེཤ་ལུ་ ཆརཔ་མ་ཆདཔ་སྦེ་ར་ རྐྱབ་པ་ལུ་བརྟེན་ཏེ་ རྒྱལ་ས་ཌ་ཀ་གིས་གཙོས་པའི་ བང་ལ་དེཤ་རྒྱལ་ཁབ་ནང་ ཆུ་རུད་དང་ ས་རུད་ཚུ་ལུ་བརྟེན་ཏེ་ མི་གྲངས་ ༥༡ དེ་ཅིག་ལུ་ ཤི་རྐྱེན་དང་ མི་སེར་སྟོང་ཕྲག་ལས་བཅད་མི་ཚུ་གི་ སྡོད་ཁྱིམ་ཚུ་ འཕྱགས་བདའ་ཡོདཔ་ཨིན་པས། དེ་ཡང་ མང་ཤོས་ཅིག་ར་ རོ་ཧིང་ཡའི་ སྐྱབས་བཅོལ་བ་ཚུ་སྡོད་མི་ ཀོགཛ་བ་ཛར་ལུ་ བྱུང་ཡོདཔ་ད་ དེ་བཟུམ་སྦེ་ བདུན་ཕྲག་ཧེ་མའི་ནང་ཡང་ ཆུ་རུད་ཀྱིས་ སློབ་གྲྭ་ཅིག་ འཕྱགས་བདའ་ཡོདཔ་ལས་ སློབ་དཔོན་ ༡ དང་ སློབ་ཕྲུག་ལེ་ཤ་ཅིག་ལུ་ ཤི་རྐྱེན་བྱུང་ནུག་ཟེར་ བཀོད་འདུག་པའི་གནས་ཚུལ།
བི་བི་སི། སྤྱི་ཟླ་ ༧ པའི་ཚེས་ ༡༢ ལུ་ མཐའ་ཡས་ལེན་གྱི་རྒྱལ་ས་ བེང་ཀོག་ལུ་ ཆང་ཁང་ཅིག་ནང་ མེ་རྐྱེན་བྱུང་ཡོདཔ་ལས་ མི་གྲངས་ ༢༧ ལུ་ ཤི་རྐྱེན་དང་ ༢༢ ལུ་ རྨ་སྐྱོན་སྦོམ་སྦེ་ར་ བྱུང་ཡོདཔ་ད་ དེ་ཡང་ ཅ་ཊུ་ཅག་རྫོང་ཁག་ལུ་ཡོད་མི་ ཡོངས་གྲགས་ཅན་གྱི་ ཆང་ཁང་གི་ འཁྲབ་སྟེགས་གུ་ལས་ འབར་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།
རོའི་ཊརཛ།སྤྱི་ཟླ་ ༧ པའི་ཚེས་ ༡༡ ལུ་ ཝེཏ་ནམ་གྱི་ ལྷོ་ཕྱོགས་མཚོ་གླིང་ ཕུ་ཀུ་ཨོག་ལུ་ གྲུ་ཆུང་ཅིག་ མགོ་མཇུག་སློག་སྟེ་ ཡར་སོངཔ་ལས་ རྒྱ་གར་གྱི་ ལྟ་བཤལཔ་ ༡༥ དེ་ཅིག་ལུ་ ཤི་རྐྱེན་བྱུང་ནུག།དེ་ཡང་ སྙན་ཞུ་དང་འཁྲིལ་བ་ཅིན་ རྐྱེན་ངན་དེ་ནང་ལས་ མི་གྲངས་ ༢༡ སྲོག་སྐྱབས་འབད་ཚུགས་ཡོདཔ་ད་ དེ་བསྒང་ གྲུ་དེ་ནང་ རྒྱ་གར་གྱི་ ལྟ་བཤལཔ་ ༣༢ དང་ ལས་བྱེདཔ་ ༣ དེ་ལས་ ལས་རོགསཔ་ ༡ རྩིས་ཏེ་ མི་གྲངས་ ༣༦ སྡོད་ཡོདཔ་ཨིན་པས།ཝེཏ་ནམ་ལུ་ཡོད་མི་ རྒྱ་གར་གཞུང་ཚབ་ཡིག་ཚང་ལས་ བྱུང་རྐྱེན་དེ་ལུ་ ལྟ་རྟོག་འབད་དོ་ཟེར་ཨིནམ་ད་ གནོད་སྐྱོན་བྱུང་མི་ བཟའ་ཚང་ཚུ་ལུ་ གྲོགས་རམ་འབད་ནིའི་དོན་ལས་ ཧོ་ཅི་མིན་ཁྲོམ་སྡེ་དང་ ཧ་ནོའི་ལུ་ གློ་བུར་ངོས་ལེན་ལྟེ་བ་ཚུ་ཡང་ གཞི་བཙུགས་འབད་ཡོདཔ་སྦེ་བཤད་ནུག།ཝེཏ་ནམ་ལུ་ མཚོ་གླིང་སྦོམ་ཤོས་ཅིག་ཨིན་མི་ ཕུ་ཀུ་ཨོག་དེ་ ལྟ་བཤལཔ་ཚུ་གི་དོན་ལས་ ཡོངས་གྲགས་ཅན་ཅིག་ལུ་ གྱུར་ཡོདཔ་ལས་ འདས་པའི་ལོ་ཚུ་ལས་ རྒྱ་གར་གྱི་ ལྟ་བཤལཔ་ལེ་ཤ་ཅིག་ འོང་དོ་ཡོདཔ་སྦེ་ […]
ཨེན་ཌི་ཊི་ཝི།སྤྱི་ཟླ་ ༧ པའི་ཚེས་ ༡༠ ལུ་ པ་ཀིཛ་ཏཱན་གྱི་ འགོ་དཔོན་ཚུ་གིས་ བཤད་དོ་བཟུམ་འབད་བ་ཅིན་ བཱ་ལུ་ཅིཛ་ཏཱན་མངའ་སྡེའི་ནང་ དམག་སྡེའི་གནམ་གྲུ་ ཧེ་ལི་ཀོ་ཊར་གྱི་ རྒྱབ་སྐྱོར་ཐོག་ལུ་ ཉེན་སྲུང་དམག་མི་ཚུ་གིས་ ངོ་རྒོལ་སྡེ་ཚན་དང་གཅིག་ཁར་ དམག་རྐྱབ་སྟེ་ ངོ་རྒོལཔ་ ༧༥ དེ་ཅིག་ དམར་བསད་འབད་ཡི་ཟེར་ཨིན་པས།མ་གཞི་ བདུན་ཕྲག་འདི་ནང་ ངོ་རྒོལ་འབད་མི་ སྡེ་ཚན་དེ་ ཧེ་མ་ ངོ་རྒོལ་སྡེ་ཚན་ཆུང་ཀུ་སྦེ་ བརྩིསཝ་ཨིན་རུང་ ད་རེས་ནངས་པ་ རྒྱ་སྐྱེད་སྦེམ་སྦེ་ར་ འགྱོ་དོ་ཡོདཔ་ལས་ ཚ་གྱང་ལང་དགོ་པའི་ གཞི་ཅིག་ལུ་ གྱུར་ཏེ་ཡོདཔ་སྦེ་བཀོད་ནུག།
རོའི་ཊརཛ། སྤྱི་ཟླ་ ༧ པའི་ཚེས་ ༡༠ ལུ་ སི་པེན་རྒྱལ་ཁབ་ཀྱི་ ནགས་ཚལ་ནང་ མེ་རྐྱེན་སྦོམ་ཅིག་ བྱུང་ཡོདཔ་ལས་ མི་གྲངས་ ༡༡ དེ་ཅིག་ལུ་ ཤི་རྐྱེན་བྱུང་ཡོདཔ་མ་ཚད་ མི་གྲངས་ ༡༩ དེ་ཅིག་ཡང་ བྱང་སྟོར་ཤོར་ཡོདཔ་ཨིན་པས། མེ་རྐྱེན་དེ་ནང་ ཉམས་རྒུད་བྱུང་མི་ མང་ཤོས་ཅིག་ར་ ཕྱི་རྒྱལ་གྱི་ མི་ཁུངས་ཚུ་ཨིནམ་ད་ ཁོང་ཆ་ཁྱབ་ཀྱིས་ གཞུང་ལས་ སྡོད་སྒར་ཚུ་ནང་ སྡོད་དགོ་པའི་ བཀའ་རྒྱ་གནང་མི་ལུ་ གནས་མ་བཏུབ་པར་ སྣུམ་འཁོར་བདའ་སྟེ་ བྱོག་འགྱོ་མི་ཚུ་ཨིནམ་སྦེ་ གསལ་བཀོད་འབད་ནུག།
བི་བི་སི། སྤྱི་ཟླ་ ༧ པའི་ཚེས་ ༩ གི་ཕྱི་རོ་ ས་གནས་ཀྱི་ ཆུ་ཚོད་ ༥ དེ་ཅིག་ཁར་ རྒྱ་ནག་གི་ ཤར་ལྷོ་ཁྲོམ་སྡེ་ ཇིན་ཇི་ཡང་ལུ་ཡོད་མི་ ལྷམ་བཟོ་གྲྭ་ཁང་ཅིག་ལུ་ མེ་རྐྱེན་བྱུང་ཡོདཔ་ལས་ མི་གྲངས་ ༢༨ དེ་ཅིག་ལུ་ ཤི་རྐྱེན་བྱུང་ནུག། རྒྱ་ནག་གི་སྲིད་འཛིན་ ཛི་ཇིན་པིང་མཆོག་གིས་ མེ་རྐྱེན་དེ་ལུ་བརྟེན་ཏེ་ གནོད་སྐྱོན་སྦོམ་སྦེ་ར་ བྱུང་ཡོདཔ་ལས་ འགན་འཁྲི་དམ་དམ་སྦེ་ར་ བཀལ་དགོཔ་སྦེ་ གསུངས་ཡོདཔ་ད་ མེ་རྐྱེན་དེ་ནང་ལས་ མི་གྲངས་ ༢༠༠ ལྷགཔ་ཅིག་ སྲོག་སྐྱབས་འབད་ཡོདཔ་ཨིན་པས།
ཨཱལ་ཇ་ཟི་ར། སྤྱི་ཟླ་ ༧ པའི་ཚེས་ ༩ ལུ་ རྒྱ་ནག་གི་ ལྷོ་ཕྱོགས་ས་གནས་ཚུ་ནང་ ཆར་ཆུ་འབོལ་བའི་སྟབས་ཀྱིས་ ཆུ་རུད་ཐོན་ཡོདཔ་ལས་ མི་གྲངས་ ༣༩ དེ་ཅིག་ལུ་ ཤི་རྐྱེན་བྱུང་མིའི་གྲས་ལས་ མང་ཤོས་ཅིག་ར་ ནཱན་ནིང་ཁྲོམ་སྡེའི་ ཆུ་མཛོད་ཁང་ཅིག་ ཕྱགས་བདའ་སྟེ་ ཆུ་རུད་ཐོན་པ་ལུ་བརྟེན་ཏེ་ཨིན་པས། དེ་ཡང་ ཆུ་རུད་ཀྱིས་སྦེ་ ཆུ་མཛོད་ཁང་ཚུ་ བརྡབ་བཏང་པ་ལུ་བརྟེན་ཏེ་ ཆུ་རུད་སྦོམ་སྦེ་ར་ ཐོན་ཡོདཔ་སྦེ་ ནཱན་ནིང་ཁྲོམ་སྡེའི་ ནཱན་ནིང་ཁྲོམ་སྡེའི་ ཁྲོམ་དཔོན་འོགམ་ ཌིང་ཝེ་གིས་ གནས་ཚུལ་ཞལ་འཛོམས་ཅིག་ནང་ གསལ་བཤད་འབད་ནུག།