མི་དབང་མཆོག་གིས་ ཧིན་དུའི་མི་སྡེ་དང་གཅིག་ཁར་ ད་ས་ཡེན་དུས་སྟོན་བརྩི་སྲུང་།
སྤྱི་ཟླ་ ༡༠ པའི་ཚེས་ ༥ ལུ་ མི་དབང་མངའ་བདག་རིན་པོ་ཆེ་དང་ མི་དབང་རྒྱལ་བཙུན་ དེ་ལས་ མི་དབང་རྒྱལ་སྲས་ འཇིགས་མེད་རྣམ་རྒྱལ་དང་ མི་དབང་རྒྱལ་སྲས་ ཨྱོན་དབང་ཕྱུག་མཆོག་གིས་ གླིང་ཀ་ནང་ ཕོ་བྲང་ལུ་སྦེ་ ཧིན་དུའི་མི་སྡེ་དང་གཅིག་ཁར་ ད་ས་ཡེན་དུས་སྟོན་ བརྩི་སྲུང་མཛད་གནང་ནུག། དེ་བསྒང་ མི་དབང་མངའ་ཞབས་མཆོག་གིས་ མི་རྗེ་བློན་ཆེན་དང་ ནང་སྲིད་བློན་པོ་ གྲྭ་ཚང་ལྷན་ཚོགས་དང་ གཞུང་གི་དཔོན་ཁག་ཚུ་ གླིང་ཀ་ནང་ ཕོ་བྲང་ལུ་ མགྲོན་འབོད་ཐོག་ལས་ མི་སྡེ་མ་འདྲཝ་ཚུ་གི་ ངོ་ཚབ་ཚུ་ལུ་ ད་ས་ཡེན་གྱི་ ཀྲི་ཀ་གནང་ཡོདཔ་ཨིན་པས། དེ་ཡང་ གླིང་ཀ་ནང་ ཕོ་བྲང་ལུ་སྦེ་ ཉིན་གྲངས་ ༣ གྱི་རིང་ལུ་ ལྷ་མོ་རྗོང་གཉེར་མའི་ སྐུ་རིམ་བསྒྲུབས་ཏེ་ བྱིན་རླབས་ཅན་གྱི་ ཀྲི་ཀ་དེ་ མི་སེར་ཚུ་ལུ་ཡང་ བཀྲམ་སྤེལ་གྱི་དོན་ལས་ རྫོང་ཁག་ཚུ་ལུ་ཡང་ བསྐྱལ་གནང་བཏང་ནུག། སྔར་འཁྱུན་གྱི་ ལམ་སྲོལ་ལྟར་དུ་འབད་བ་ཅིན་ ད་ས་ཡེན་ ཀྲི་ཀ་དེ་ བཟའ་ཚང་ནང་མི་ གཙོ་ཅན་གྱིས་ བཟའ་ཚང་ནང་མི་ གཞན་ཚུ་གི་དཔྱལཝ་གུ་ བཀལ་ནི་ཡོདཔ་ད་ དེ་ཡང་ བཟའ་ཚང་ནང་མི་ཚུ་ […]
