མི་དབང་མངའ་བདག་རིན་པོ་ཆེ་མཆོག་གིས་ ལྷོ་མཚམས་རྫོང་ཁག་ཚུ་ནང་གཟིགས་སྐོར།
མི་དབང་མངའ་བདག་རིན་པོ་ཆེ་མཆོག་ ལྷོ་མཚམས་རྫོང་ཁག་ཚུ་ནང་ གཟིགས་སྐོར་ལུ་ ཆིབས་བསྐྱོད་གནང་ཡོདཔ་ད་ དེ་བསྒང་ མི་དབང་རྒྱལ་བཙུན་མཆོག་དང་ མི་དབང་རྒྱལ་སྲས་ འཇིགས་མེད་རྣམ་རྒྱལ་དབང་ཕྱུག་ མི་དབང་རྒྱལ་སྲས་ ཨྱོན་དབང་ཕྱུག་ཚུ་ཡང་ ཕྱག་ཞུ་སྟེ་ བྱོན་ཡོདཔ་བཞིན་དུ་ སྤྱི་ཟླ་ ༩ པའི་ཚེས་ ༧ ལུ་ ཕུན་ཚོགས་གླིང་ལུ་ ཕེབས་གནང་ནུག།དེ་ལས་ མི་དབང་མངའ་བདག་རིན་པོ་ཆེ་མཆོག་དང་ མི་དབང་སྐུ་འཁོར་ཚུ་ ཕུན་ཚོགས་གླིང་ལུ་ བྱོན་པའི་ལམ་ཁར་ དགེ་འདུ་ཚོང་རིག་ མཐོ་རིམ་སློབ་གྲྭའི་ནང་ གཟིགས་སྐོར་གནང་ཡོདཔ་མ་ཚད་ ཚན་རིག་དང་ འཕྲུལ་རིག་མཐོ་རིམ་སློབ་གྲྭའི་ནང་ཡང་ གཟིགས་སྐོར་གནང་ཡོདཔ་ཨིན་པས།མཐོ་རིམ་སློབ་གྲྭ་དེ་ཚུའི་ནང་ སློབ་ཚོགས་དང་ སློབ་ཕྲུག་ཚུ་དང་ མཇལ་ཕྲད་མཛད་གནང་པའི་སྐབས་ལུ་ མི་དབང་མངའ་ཞབས་མཆོག་གིས་ ང་བཅས་རའི་ མཐོ་རིམ་སློབ་གྲྭ་ཁག་གི་ མདུན་ལམ་དེ་ སློབ་ཕྲུག་ཚུ་ འཛམ་གླིང་ནང་ གྲ་སྒྲིགས་ཡོདཔ་ བཟོ་ནི་དང་ དེ་ཡང་ སློབ་ཕྲུག་ཚུ་ ལོངས་སྤྱོད་དང་ལྡནམ་ བཟོ་ཐབས་ལུ་ རྒྱལ་སྤྱིའི་ཚོང་ལམ་ནང་ དོ་འགྲན་འབད་ཚུགསཔ་ བཟོ་ནི་དེ་ཨིན་ཟེར་ གསུངས་གནང་ནུག།ང་བཅས་རའི་ སློབ་ཕྲུག་ཚུ་ ཁྱད་དུ་འཕགསཔ་ འགྱུར་ཚུགས་ནིའི་དོན་ལས་ གོ་སྐབས་དང་ གནས་སྟངས་ཚུ་ གསར་བཏོད་འབད་བའི་བསྒང་ཡོད་རུང་ གཙོ་བོ་ […]