པདྨ་དབང་འདུས། རྒྱལ་ཁབ་ནང་ ནུས་རྩལ་དང་ལྡན་པའི་ ཕུགས་མཐོང་ཅན་གྱི་ ཞི་གཡོག་གི་ དོན་གྱི་སྙིང་པོ་དེ་ར་ འགོ་ཁྲིད་དེ་ཨིནམ་ད་ དེ་ཡང་ གཙུག་སྡེ་ཚུ་གི་ བཙན་ཐབས་དང་ རྒྱལ་ཡོངས་ཀྱི་ དམིགས་དོན་བསྒྲུབ་ནི་ཚུ་ ལྕོགས་གྲུབ་དང་ རེ་འདུན་ དེ་ལས་ བརྩི་མཐོང་ཡོད་པའི་ འགོ་ཁྲིད་ལུ་ རག་ལསཔ་ཨིན་པས།
སྤྱི་ཟླ་ ༡༠ པའི་ཚེས་ ༡༣ ལུ་ རྩ་ཁྲིམས་ཅན་གྱི་ གོ་གནས་ཀྱི་ གནས་ཡུན་ཚང་མི་ འབྲུག་གི་བཙག་འཐུ་ལྷན་ཚོགས་ཀྱི་ བཙག་འཐུ་སྤྱི་ཁྱབ་ དྲགོས་བསོད་ནམས་སྟོབས་རྒྱས་དང་ ལྷན་འཛིན་ཨྱོན་ཚེ་དབང་ ལྷན་འཛིན་ཟླ་བ་བསྟན་འཛིན། རྒྱལ་གཞུང་རྩིས་ཞིབ་དབང་འཛིན་གྱི་ རྩིས་ཞིབ་ཡོངས་ཁྱབ་ བཀྲ་ཤིས། དེ་ལས་ ངན་ལྷད་བཀག་སྡོམ་ལྷན་ཚོགས་ཀྱི་ཁྲི་འཛིན་ བདེ་སྐྱིད་པདྨོ་དང་ ལྷན་འཛིན་རྒྱ་མཚོ་ ལྷན་འཛིན་ཀརྨ་རིག་འཛིན་ཚུ་ ཁ་བྲལ་སྨོན་འདུན་གྱི་དོན་ལས་ མི་རྗེ་བློན་ཆེན་གྱི་ སྐུ་མདུན་ལུ་བཅར་ནུག། རྒྱལ་ཁབ་ཕྱི་ནང་ ༢ ཀྱི་ གནས་ཚུལ་ཁ་གསལ་ཚུ་ གློག་རིག་སྒྲིག་བཀོད་ (PDF) ཐོག་ལུ་ རེས་གཟའ་ཟླ་བར་གཟིགས་གནང་།
པདྨ་དབང་འདུས།སྤྱི་ཟླ་ ༡༠ པའི་ཚེས་ ༡༣ ལུ་ སུའི་ཛར་ལེན་གྱི་འཐུས་དཔོན་ ཕེ་བི་ཡཱན་མོ་ལི་ན་གིས་ འགོ་ཁྲིད་ཐོག་ལུ་ སུའི་ཛར་ལེན་ སྤྱི་ཚོགས་ཀྱི་ འཐུས་མི་སྡེ་ཚན་ཅིག་ མི་རྗེ་བློན་ཆེན་གྱི་ སྐུ་མདུན་ལུ་ བཅར་ཡོདཔ་ཨིན་པས།དེ་བསྒང་ འབྲུག་དང་ སུའི་ཛར་ལེན་གྱི་བར་ན་ ལོ་ངོ་བཅུ་ཕྲག་ ༤ གི་རིང་ལུ་ཡོད་མི་ དོན་གཅོད་མཐུན་འབྲེལ་དང་ ཡུན་རིང་གི་མཐུན་ལམ་དང་ མཉམ་འབྲེལ་ཚུ་གི་སྐོར་ལས་ གསུང་གྲོས་ཚུ་ གནང་ཡོད་པའི་ནང་ལས་ གནད་དོན་གཙོ་བོ་ར་ ཟུང་ཕྱོགས་མཐུན་འབྲེལ་དང་ འབྲུག་གི་མཐའ་འཁོར་གནས་སྟངས་དང་ གནམ་གཤིས་འགྱུར་བའི་ ལག་ལེན་ཡར་འཕེལ་ དེ་ལས་ དམངས་གཙོའི་རིང་ལུགས་ཀྱི་ མདུན་བསྐྱོད་ཚུ་གི་སྐོར་ལས་གནང་ནུག།དེ་མ་ཚད་ རྒྱལ་ཁབ་གཉིས་ཆ་རའི་ཧོངས་ལས་ མ་འོངས་པའི་ལོ་ཚུ་ནང་ མཉམ་འབྲེལ་གཏིང་ཟབ་བཟོ་ནི་ལུ་ཡང་ ཁས་ལེན་ཡོད་ལུགས་ཚུ་ བསྐྱར་གསོ་གནང་ཡོད་པའི་ གནས་ཚུལ་མདོར་བསྡུས།
སྤྱི་ཟླ་ ༩ པའི་ཚེས་ ༢༦ ལུ་ ལྷན་རྒྱས་གཞུང་ཚོགས་ལས་ གསལ་བསྒྲགས་ཅིག་ གནང་པའི་ནང་གསལ་ སྤྱི་ཟླ་ ༣ པའི་ཚེས་ ༡ ལུ་ ཨ་ལོ་སྐྱེས་ལོ་ ༥ (ཟླ་ངོ་ ༦༠) ལང་མི་ཚུ་གིས་ རྒྱལ་ཁབ་ནང་འཁོད་ཀྱི་ སློབ་གྲྭ་ཁག་སོ་སོར་ འཛུལ་ཞུགས་འབད་ཆོག་ཟེར་ཨིན་པས། གནས་ཚུལ་ཁ་གསལ་ གློག་རིག་སྒྲིག་བཀོད་ (PDF) ཐོག་ལུ་ རེས་གཟའ་ཟླ་བའི་ ཐོན་རིམ་ནང་ གཟིགས་གནང་ལགས།
མགོན་པོ་རྡོ་རྗེ། དུས་ཅི་ རང་ཟླ་ ༡༠ པའི་ཚེས་ ༧ སྤྱི་ཟླ་ ༡༡ པའི་ཚེས་ ༢༧ ལུ་ འབྲུག་གི་སྤྱི་ཚོགས་བཞི་པའི་ རྒྱལ་ཡོངས་ཚོགས་ཐེངས་ ༤ པ་ འགོ་བཙུགས་གནང་ནི་སྦེ་ གཏན་འཁེལ་མཛད་གནང་ནུག། དེ་འབདཝ་ལས་ རྩ་ཁྲིམས་ཅན་གྱི་ འདུས་ཚོགས་དང་ གཙུག་སྡེ་ ལྷན་ཁག་དང་ ལས་སྡེ་ གནས་གཞུང་ཚུ་གིས་ གོང་འཕེལ་དང་འབྲེལ་བའི་ གནད་དོན་ཚུ་མིན་པར་ གཞན་གལ་གནད་ཆེ་བའི་ གནད་དོན་ཚུ་ གསུང་གྲོས་གནང་དགོཔ་ཡོད་པ་ཅིན་ གཤམ་འཁོད་ལམ་སྟོན་དང་འཁྲིལ་ཏེ་ སྤྱི་ཟླ་ ༡༠ པའི་ཚེས་ ༣༠ གི་ ནང་འཁོད་ལུ་ རྒྱལ་ཡོངས་ཚོགས་འདུའི་ ཡིག་ཚང་ནང་ ཕུལ་དགོ་ཟེར་ཨིན་པས། གནས་ཚུལ་ཁ་གསལ་ གློག་རིག་སྒྲིག་བཀོད་ (PDF) ཐོག་ལུ་ རེས་གཟའ་ཟླ་བའི་ ཐོན་རིམ་ནང་ གཟིགས་གནང་ལགས།
པདྨ་དབང་འདུས། འབྲུག་དང་ ཕི་ལི་པིན་ རྒྱལ་ཁབ་དང་ མི་སེར་ཚུ་གི་བར་ན་ མཐུན་འབྲེལ་བཙན་ཐབས་དང་ ཕན་ཚུན་ཁེ་ཕན་ཅན་གྱི་ མཐུན་ལམ་གོང་འཕེལ་གྱི་ འདུན་པ་བསྐྱེད་དེ་ སྤྱི་ལོ་ ༢༠༢༥ སྤྱི་ཟླ་ ༡༠ པའི་ཚེས་ ༦ ལས་ འགོ་བཟུང་སྟེ་ ཕྱི་འབྲེལ་དོན་གཅོད་མཐུན་ལམ་ གཞི་བཙུགས་གནང་ཡོདཔ་ཨིན་པས། དེ་ཡང་ ཕྱི་འབྲེལ་མཐུན་ལམ་དང་འབྲེལ་བའི་ མཉམ་འབྲེལ་གསལ་བསྒྲགས་གུ་ རྒྱ་བཞུགས་འབྲུག་གི་གཞུང་ཚབ་ གུང་བློན་འོགམ་ ཝི་རྣམ་རྒྱལ་དང་ རྒྱ་བཞུགས་ཕི་ལི་པིན་གྱི་གཞུང་ཚབ་ ཡོ་སེལ་ཕ་རཱན་སིཛ་ཀོ་ ཨིབ་ནེ་ཤི་ཡོ་ ༢ ཀྱིས་ རྒྱ་གར་ནིའུ་དིལླི་ལུ་ཡོད་མི་ འབྲུག་གི་གཞུང་ཚབ་ཡིག་ཚང་ནང་སྦེ་ སྤྱི་ཟླ་ ༡༠ པའི་ཚེས་ ༦ ལུ་ རང་སོའི་གཞུང་གི་ཁྱད་ཚབ་སྦེ་ མཚན་རྟགས་བཀོད་ནུག། དེ་སྦེ་ མཚན་རྟགས་བཀོད་པའི་ནང་ལུ་ གཞུང་ཚབ་ ༢ ཀྱིས་ འདས་པའི་ལོ་ཚུ་གི་ནང་ཡང་ མཐུན་ལམ་དང་ མཉམ་འབྲེལ་ཡོད་མི་ རྒྱལ་ཁབ་ ༢ ཀྱི་བར་ན་ དེ་བཟུམ་མའི་ ཕྱི་འབྲེལ་དོན་གཅོད་མཐུན་ལམ་ གཞི་བཙུགས་མཛད་མི་ལུ་ ཐུགས་སྤྲོ་བྱུང་ཡོད་ལུགས་ བཤད་པའི་ཁར་ […]
སྤྱི་ཟླ་ ༩ པའི་ཚེས་ ༢༦ ལུ་ ལྷན་རྒྱས་གཞུང་ཚོགས་ལས་ གསལ་བསྒྲགས་ཅིག་ གནང་པའི་ནང་གསལ་ སྤྱི་ཟླ་ ༣ པའི་ཚེས་ ༡ ལུ་ ཨ་ལོ་སྐྱེས་ལོ་ ༥ (ཟླ་ངོ་ ༦༠) ལང་མི་ཚུ་གིས་ རྒྱལ་ཁབ་ནང་འཁོད་ཀྱི་ སློབ་གྲྭ་ཁག་སོ་སོར་ འཛུལ་ཞུགས་འབད་ཆོག་ཟེར་ཨིན་པས། དེ་མ་ཚད་ དེ་ཚེ་ སྤྱི་ཟླ་ ༨ པའི་ཚེས་ ༢༡ ལུ་ ཤེས་རིག་དང་ རིག་རྩལ་གོང་འཕེལ་ལྷན་ཁག་ སློབ་གྲྭའི་ཤེས་ཡོན་ལས་ཁུངས་ཀྱིས་ བཀྲམ་སྤེལ་འབད་མི་ གསལ་བསྒྲགས་དེ་ཡང་ ཆ་མེད་ཨིན་ཟེར་བཀོད་ནུག། དེ་འབདཝ་ལས་ ད་ལས་ཕར་ ལྷན་རྒྱས་གཞུང་ཚོགས་ལས་ གསལ་བསྒྲགས་ལོགས་སུ་སྦེ་ མ་གནང་ཚུན་གྱི་རིང་ལུ་ སློབ་གྲྭ་གེ་རའི་ནང་ གོང་གསལ་བསྒྲགས་དང་འཁྲིལ་ཏེ་ ལག་ལེན་འཐབ་དགོཔ་སྦེ་ བཀོད་གནང་འདུག་པའི་གནས་ཚུལ།
སྤྱི་ཟླ་ ༡༠ པའི་ཚེས་ ༡ ལུ་ རྒྱལ་གཞུང་དངུལ་ལས་དབང་འཛིན་གྱིས་ དངུལ་ཀྲམ་ཐེར་འབུམ་ ༣.༥༩ འབྲུག་གཞུང་ལུ་ རྩིས་སྤྲོད་ཞུ་བའི་ མཛད་སྒོ་རྟེན་འབྲེལ་ནང་ མི་རྗེ་བློན་ཆེན་མཆོག་གིས་ དབུ་བཞུགས་མཛད་ཡོདཔ་ད་ མ་དངུལ་དེ་ཡང་ དབང་འཛིན་གྱིས་ ཐབས་ལམ་མ་འདྲ་བའི་སྒོ་ལས་ ཕྱི་ཁར་མ་རྩ་གཞི་བཙུགས་འབད་མི་ལས་ཐོབ་པའི་ དངུལ་ལྷག་ཨིན་པས། དེ་བསྒང་ མི་རྗེ་བློན་ཆེན་གྱིས་ རྒྱལ་གཞུང་དངུལ་ལས་དབང་འཛིན་གྱིས་ འབྲུག་གཞུང་ལུ་ ཕན་ཐོགས་ཆེ་བའི་ མ་དངུལ་ཕུལ་མི་ལུ་ བཀྲིན་དགའ་ཚོར་ཡོད་ལུགས་དང་ ལྷག་པར་དུ་ཡང་ དབང་འཛིན་དང་ ལས་གཡོགཔ་ཚུ་གིས་ ནད་ཡམས་ཀོ་ཝིཌ་གི་ དུས་སྐབས་ནང་ བརྩོན་ཤུགས་བསྐྱེད་མི་ལུ་ཡང་ ངལ་རངས་ཡོད་ལུགས་ཚུ་ གསུངས་གནང་ནུག། དེ་མ་ཚད་ དོ་འགྲན་ཅན་གྱི་ དུས་སྐབས་ཚུ་ནང་ རྒྱལ་ཁབ་ཀྱི་ དཔལ་འབྱོར་ཡུན་བརྟན་གྱི་དོན་ལུ་ རྒྱལ་གཞུང་དངུལ་ལས་དབང་འཛིན་གྱིས་ གལ་གནད་ཆེ་བའི་ འགན་ཁུར་འབག་མི་ལུ་ཡང་ ངོས་ལེན་ཡོད་ཟེར་ གསུངས་ཡོད་པའི་གནས་ཚུལ།
སྤྱི་ཟླ་ ༡༠ པའི་ཚེས་ ༡ ལུ་ མི་རྗེ་བློན་ཆེན་མཆོག་ དབུ་བཞུགས་ཐོག་ལུ་ འབྲུག་བཞུགས་རྒྱ་གར་གཞུང་ཚབ་ སཱན་དིབ་ཨ་རི་ཡ་གིས་ འབྲུག་གི་དངུལ་རྩིས་བློན་པོ་ ལས་སྐྱིད་རྡོ་རྗེ་ལུ་ དཔལ་འབྱོར་ལྷན་ཐབས་ལས་རིམ་གྱི་དོན་ལས་ འཛིན་གྲོལ་ཐེངས་ ༤ པའི་ནང་ དངུལ་ཀྲམ་ཐེར་འབུམ་ ༢.༥ གི་ དངུལ་འཛིན་ཅེག་ ཕུལ་ཡོདཔ་ཨིན་པས། དེ་བསྒང་ མི་རྗེ་བློན་ཆེན་གྱིས་ རྒྱ་གར་གཞུང་ལས་ མ་དངུལ་འཛིན་གྲོལ་ དེ་འཕྲལ་ལས་ གནང་མི་དེ་ཡང་ འབྲུག་བཞུགས་རྒྱ་གར་གཞུང་ཚབ་ སཱན་དིབ་ཨ་རི་ཡ་གིས་ གྲོགས་རམ་ལུ་བརྟེན་ཏེ་ཨིནམ་ལས་ རྒྱ་གར་གཞུང་ཚབ་ལུ་ བཀའ་དྲིན་དགའ་ཚོར་ཡོད་ལུགས་དང་ དེ་བཟུམ་སྦེ་ རྒྱ་གར་གྱི་བློན་ཆེན་ ཤྲཱི་ན་རེན་ད་ར་ མོ་དི་དང་ རྒྱ་གར་གཞུང་ལུ་ཡང་ འབྲུག་གི་མི་སེར་ཚུ་གི་ཧོངས་ལས་ སེམས་ཀྱི་གདིང་ལས་ར་ བཀྲིན་དགའ་ཚོར་ཡོད་ལུགས་ཚུ་ཡང་ གསུངས་གནང་ནུག། ད་རེས་ འཛིན་གྲོལ་འབད་མི་ མ་དངུལ་དེ་རྩིསཝ་ད་ དཔལ་འབྱོར་ལྷན་ཐབས་ལས་རིམ་འོག་ལུ་ མ་རྩ་གཞི་བཙུགས་ གལ་ཅན་ཚུ་གི་ རྒྱབ་སྐྱོར་ལུ་ རྒྱ་གར་གཞུང་གིས་ ཁས་ལེན་གྲུབ་པའི་ དཔལ་འབྱོར་ལྷན་ཐབས་མ་དངུལ་ ཐེར་འབུམ་ ༡༥ གི་ཐོག་ལས་ ཐེར་འབུམ་ ༡༠ […]
སྤྱི་ཟླ་ ༡༠ པའི་ཚེས་ ༡ ལུ་ ཟླ་རིམ་གནས་ཚུལ་ཞལ་འཛོམས་ ཐེངས་ ༢༠ པ་ ཚོགས་གནང་ཡོདཔ་བཞིན་དུ་ མི་རྗེ་བློན་ཆེན་མཆོག་དང་ ལྷན་རྒྱས་གཞུང་ཚོགས་ཀྱི་ བློན་པོ་ཚུ་གིས་ བརྡ་བརྒྱུདཔ་ཚུ་ལུ་ རྒྱལ་ཡོངས་ཀྱི་ གནད་དོན་དང་ གཞུང་གི་གཙོ་རིམ་ཚུ་གི་ བརྡ་དོན་ཚུ་ སྦ་གསང་མེད་པར་ བརྗེ་སོར་མཛད་གནང་ནུག། དེ་ཡང་ གནས་ཚུལ་ཞལ་འཛོམས་ འགོ་བཙུགས་པའི་སྐབས་ལུ་ མི་རྗེ་བློན་ཆེན་མཆོག་གིས་ འཕྲལ་ཁམས་ཅིག་ཁར་ དཔལ་འབྱོར་ལྷན་ཐབས་ལས་རིམ་དང་འབྲེལ་བའི་ མི་མང་གིས་ གྲོས་བསྡུར་བྱུང་མི་ལུ་ གཞུང་གི་ཁ་ཐུག་ལས་ དྭངས་གསལ་དང་ འགན་འཁྲི་ དེ་ལས་ འགན་ཁུར་ཅན་གྱི་ བརྡ་དོན་སྤེལ་ནི་ཚུ་ལུ་ ཁས་ལེན་ཡོད་པའི་ཁར་ གནད་དོན་དེ་ཚུ་ལུ་ གཙོ་བོར་བཟུང་ཡོད་པའི་སྐོར་ལས་ཡང་ གསལ་བཤད་གནང་ཡོདཔ་ཨིན་པས། དེ་འབདཝ་ལས་ མི་རྗེ་བློན་ཆེན་གྱིས་ བདེན་ཁུངས་ལུ་ གཞི་བརྟེན་ཡོད་པའི་ གནས་ཚུལ་ཚུ་ བཀོད་དགོ་པའི་ ནན་སྐུལ་དང་ ར་ཁུངས་མེད་པའི་ ཚོར་སྣང་ཅན་གྱི་གནས་ཚུལ་ཚུ་གིས་ མི་མང་གི་ བློ་གཏད་ལུ་ གནོད་པ་འབྱུང་ནི་ཨིན་པའི་ དྲན་བརྡ་ཡང་མཛད་ནུག། གནས་ཚུལ་ཞལ་འཛོམས་དེ་ནང་ གཞན་ཡང་ དཔལ་འབྱོར་ཡར་འཕར་དང་ མི་སྡེའི་ཕན་བདེ་ […]
