སྐྱབས་རྗེ་མཆོག་གིས་ དགེ་སློང་ཚུ་གི་ ཟུར་ཕོགས་མ་དངུལ་ལུ་ ཞབ་འདེབས་སྦེ་ དངུལ་ཀྲམ་ས་ཡ་ ༡༠ གནང་ཡོདཔ།

རང་ཟླ་ ༧ པའི་ཚེས་ ༢༧ སྤྱི་ཟླ་ ༩ པའི་ཚེས་ ༡༡ ལུ་ སྐྱབས་རྗེ་རིན་པོ་ཆེ་མཆོག་གིས་ མི་དབང་རྒྱལ་སྲསམོ་མཆོག་ སྐུ་འཁྲུངས་པའི་ དགའ་སྟོན་རྟེན་འབྲེལ་ བརྩི་སྲུང་དང་འབྲེལ་ཏེ་ སངས་རྒྱས་བསྟན་པའི་གཞི་མ་ དགེ་འདུན་འདུས་པའི་སྡེ་ མི་ཉམས་གོང་འཕེལ་དང་ ཡུན་བརྟན་གནས་ཐབས་ལུ་ དངུལ་ཀྲམ་ས་ཡ་ ༡༠ གནང་ནུག།
དེ་ཡང་ འཕགས་པའི་དགེ་འདུནམ་ཚུ་ དགུང་ལོ་ ༦༥ བཞེས་ཏེ་ ཟུར་བཞུགས་མཛད་མི་ཚུ་གི་ མཐུན་རྐྱེན་གྱི་ དཀའ་ངལ་སེལ་ཐབས་ལུ་ ཟུར་ཕོགས་ཀྱི་ མ་དངུལ་རྒྱ་སྦོམ་སྦེ་ གཞི་བཙུགས་མཛད་གནང་མི་ལུ་ ཞལ་འདེབས་སྦེ་ གནང་ཡོདཔ་ཨིན་པས།
དེ་མ་ཚད་ སྐྱབས་རྗེ་རིན་པོ་ཆེ་མཆོག་གིས་ དགེ་ལེགས་ཕུག་ཁྲོམ་གྱི་ ཉེ་འདབས་ལུ་ ཀུར་སྟོད་རྣམ་གྲོལ་གླིང་གྲྭ་ཚང་གི་ མཚན་ཐོར་ཡོད་མི་ སྨན་ཤིང་སྐྱེད་ཚལ་དེ་ཡང་ ས་ཁྲམ་དང་བཅསཔ་སྦེ་ གཞུང་དང་ མི་སེར་ལུ་ ཕན་ཐོགས་ཆེ་བར་དགོངས་ཏེ་ དགེ་ལེགས་ཕུག་ཁྲོམ་སྡེ་ལུ་ བཀའ་ཤོག་གནང་ཐོག་ལས་ རྩིས་སྤྲོད་གནང་ནུག།
ས་ཆ་དེ་ཁར་ སྐྱབས་རྗེ་རིན་པོ་མཆོག་གིས་ སྨན་ཤིང་སྐྱེད་ཚལ་ བཟོ་གནང་ནི་གི་ ཐུགས་འདོད་ཡོདཔ་བཞིན་དུ་ གཞུང་གི་ཁ་ཐུག་ལས་ ཁྲི་ལོ་ཉེར་ལྔ་འཁོར་བའི་ དུས་སྟོན་གྱི་ དྲན་རྟེན་ལུ་དམིགས་ཏེ་ དངུལ་ཀྲམ་ས་ཡ་ ༡༦ དང་ འབུམ་ ༨ ཟད་འགྲོ་བཏང་སྟེ་ གཞི་རྟེན་མཁོ་ཆས་ག་ར་ གསར་བསྒྲུབས་ཐོག་ལས་ སྤྱི་ཟླ་ ༨ པའི་ཚེས་ ༢༡ ལུ་ རྩིས་འབུལ་ཞུ་ཡོདཔ་ཨིན་པས།
ས་གནས་དེ་ཁར་ གཞི་རྟེན་མཁོ་ཆས་ཚུ་ཡང་ སྨན་ཤི་ང་འཛུགས་སྐྱོང་དང་ འཁོར་ལམ་ གློག་མེ་ འཐུང་ཆུ་ ཆུ་གཡུར་ ལྕགས་རི་ སྲུང་རྒྱབ་ཀྱི་སྡོད་ཁྱིམ་ ངལ་གསོའི་སྤྲོ་ཁང་དང་བཅསཔ་སྦེ་ བཟོ་བསྐྲུན་འབད་ནུག།
ལེགས་ཕུག་ལུ་ ཨེ་ཀར་ ༥ འབད་མི་ ས་ཆ་དེ་ ཨབ་ཤེས་རབ་འོད་ཟེར་དང་ ཨམ་བྷ་ཁུམ་ ༢ ཀྱིས་ ཚེ་འདི་ཕྱི་ ༢ ཀྱི་ དགེ་རྩར་དམིགས་ཏེ་ སྐྱབས་རྗེ་རིན་པོ་ཆེ་མཆོག་ལུ་ ཕུལ་ཡོདཔ་ཨིན་པའི་གནས་ཚུལ།