རྒྱ་གར་གྱིས་ འབྲུག་ལུ་ བཱཛ་མ་ཏི་མིན་པའི་ ཆུམ་གྱི་རིགས་ ཕྱིར་ཚོང་འཐབ་ནི།

པདྨ་དབང་འདུས།
རྒྱ་གར་གཞུང་གིས་ དམིགས་བསལ་སྒྲིག་ཆའི་ཐོག་ལས་ བཱཛ་མ་ཏི་མིན་པའི་ ཆུམ་དཀརཔོ་གི་རིགས་ ཕྱིར་ཚོང་བཀག་དམ་ལས་ ཡངས་ཆག་གནང་ནུག།
དེ་ཡང་ དོན་གཅོད་ཀྱི་ མཉམ་རོགས་རྒྱལ་ཁབ་ གཙོ་བོ་ཚུ་ལུ་ ཆུམ་ཕྱིར་ཚོང་བཀག་དམ་ ཡངས་ཆག་བཏང་ནི་དང་འབྲེལ་ཏེ་ འབྲུག་ལུ་ བཱཛ་མ་ཏི་མིན་པའི་ ཆུམ་ ཊཱོན་ ༧༩,༠༠༠ མཁོ་སྤྲོད་འབད་ནི་ཨིནམ་ད་ དེ་བཟུམ་སྦེ་ མའུ་རི་ཤི་ཡཱཛ་ལུ་ཡང་ བཱཛ་མ་ཏི་མིན་པའི་ ཆུམ་ཊཱོན་ ༡༤,༠༠༠ མཁོ་སྤྲོད་འབད་ནི་ཨིན་པས།
རྒྱ་གར་གཞུང་གིས་ དེ་སྦེ་ གྲོས་ཐག་བཅད་མི་དེ་ཡང་ བཱཛ་མ་ཏི་མིན་པའི་ ཆུམ་གྱི་རིགས་ཚུ་ ཕྱིར་ཚོང་འཐབ་མ་ཆོགཔ་སྦེ་ བཟོ་བའི་ཤུལ་ལས་ འབྲུག་དང་ མའུ་རི་ཤི་ཡཱཛ་ རྒྱལ་ཁབ་ ༢ ལས་ བཀག་དམ་ཡངས་ཆག་གཏང་དགོ་པའི་ ཞུ་བ་འབད་ནུག།
འབྲུག་གཞུང་གི་ ཁ་ཐུག་ལས་ སྤྱི་ཟླ་ ༨ པའི་ བདུན་ཕྲག་དང་པའི་ནང་ བཀག་དམ་ཡངས་ཆག་གི་དོན་ལས་ རྒྱ་གར་གཞུང་ལུ་ ལོ་བསྟར་བཞིན་དུ་ ཆུམ་ཊཱོན་ ༧༧,༠༠༠ རེ་ ནང་འདྲེན་འབད་ཆོག་པའི་ གནང་བ་ཞུ་ཡོདཔ་ལས་ གཞུང་འབྲེལ་ཐོག་ལུ་ གནང་བ་གྲུབ་པའི་ གསལ་བསྒྲགས་དེ་ མགྱོགས་པ་ར་འཐོབ་པའི་ རེ་བ་ཡོདཔ་ཨིན་པས།
དེ་སྦེ་ བཀག་དམ་འབད་མི་དེ་ཡང་ རྒྱ་གར་རྒྱལ་ཁབ་ནང་ གོང་ཚད་ཡར་འཕར་འགྱོཝ་ལས་ ཁོང་རའི་རྒྱལ་ཁབ་ལུ་ ཆུམ་ལངམ་སྦེ་ཡོདཔ་ ངེས་གཏན་བཟོ་ཐབས་ལུ་ དུས་ཅི་ སྤྱི་ཟླ་ ༦ པའི་ཚེས་ ༢༠ ལས་ ཕྱིར་ཚོང་བཀག་དམ་འབད་ཡོདཔ་ད་ ནམ་རྒྱུན་འབད་བ་ཅིན་ རྒྱ་གར་གྱི་ རྒྱལ་ཁབ་ ༡༢༥ ལུ་ ཆུམ་ཕྱིར་ཚོང་འཐབ་དོ་ཡོདཔ་ལས་ རྒྱ་གར་དེ་ འཛམ་གླིང་ནང་ ཆུམ་ཕྱིར་ཚོང་འཐབ་མི་ རྒྱལ་ཁབ་སྦོམ་ཤོས་ཅིག་ཨིན་པས།
ང་བཅས་རའི་ འབྲུག་ལུ་འབད་བ་ཅིན་ མང་ཤོས་ར་ ཆུམ་གྱི་རིགས་ ཨེཛ་ཀེ་གཱོལ་དང་ རཱཇ་བྷོག་ཀུ་མར་ དུ་བར་ ཀུ་ཨམ་བྷོག་ཚུ་ བཟའ་སྤྱོད་འབད་ཡོདཔ་ད་ འབྲུག་བཟའ་སྤྱོད་ལས་འཛིན་གྱིས་ཡང་ བཱཛ་མ་ཏི་མིན་པའི་ ཆུམ་གྱི་རིགས་ཚུ་ ནང་འདྲེན་འཐབ་སྟེ་ རྒྱལ་ཁབ་ནང་གི་ སློབ་གྲྭ་ཁག་ ༤༩༠ དེ་ཅིག་དང་ ངོ་ཚབ་ལས་སྡེ་ཚུ་ལུ་ བཀྲམ་སྤེལ་འབདཝ་ཨིན་པའི་གནས་ཚུལ།