རྒྱ་ནག་ལུ་ ཤ་སྲེག་བཟའ་ཁང་ཅིག་ནང་ སྲེག་ཐབ་གས་པའི་རྐྱེན་གྱིས་ མི་གྲངས་ ༣༡ ལུ་ཤི་རྐྱེན།

རོའི་ཊརཛ།
སྤྱི་ཟླ་ ༦ པའི་ཚེས་ ༢༢ ལུ་ རྒྱ་ནག་གི་ ནུབ་བྱང་ལུང་ཕྱོགས་ ནིང་ཤི་ཡ་ལུ་ ཤ་སྲེག་བཟའ་ཁང་ཅིག་ནང་ སྲེག་ཐབ་གས་པའི་རྐྱེན་གྱིས་ མི་གྲངས་ ༣༡ ལུ་ ཤི་རྐྱེན་བྱུང་ཡོདཔ་ལས་ རྒྱ་ནག་གི་སྲིད་འཛིན་ ཛི་ཇིན་པིང་གིས་ ཞིབ་དཔྱད་ཚུ་ དམ་ཟབ་འབད་དགོ་པའི་ བཀའ་རྒྱ་གནང་ནུག།
རྐྱེན་ངན་དེ་ཡང་ ཐབ་རླུང་བསགས་མཛོད་ལས་ ཐབ་རླུང་ཕྱི་ཁར་ ཐོན་པ་ལུ་བརྟེན་ཏེ་ བྱུང་ཡོདཔ་མ་ཚད་ ཆག་དཀྲུམ་ཤོར་མི་ཤེལ་དང་ མེ་རླབས་ལུ་བརྟེན་ཏེ་ རྨ་སྐྱོན་བྱུང་ཡོད་མི་ མི་ངོམ་ ༧ ཡང་ སྨན་ཁང་ནང་ སྨན་བཅོས་འབད་བའི་བསྒང་ཨིན་པས།
གནད་དོན་དེ་གི་སྐོར་ལས་ སྲིད་འཛིན་ཇིན་པིང་གིས་ འབྲེལ་ཡོད་དབང་འཛིན་ཚུ་ལུ་ བཟོ་གྲྭ་ཁང་དང་ ལས་སྡེ་གཙོ་བོ་ཚུ་ནང་ ཉེན་སྲུང་གི་ བལྟ་རྟོག་དང་ རྨ་སྐྱོན་བྱུང་ མི་ཚུ་ལུ་ སྨན་བཅོས་ག་དེ་དྲག་དྲག་འབད་དགོ་པའི་ བཀའ་རྒྱ་ཡང་གནང་ནུག།
རྒྱ་ནག་ལུ་ ཡུན་རིང་གི་བར་ན་ ཉེན་སྲུང་ལེགས་སྒྱུར་ལུ་ བརྩོན་ཤུགས་བསྐྱེད་དེ་འབད་རུང་ ཐབ་རླུང་དང་ རྫས་སྦྱོར་ཚུ་ལུ་བརྟེན་པའི་ རྐྱེན་ངན་ཚུ་ ཐོནམ་ཐོན་ས་ར་ཡོདཔ་ད་ དེ་ཡང་ སྤྱི་ལོ་ ༢༠༡༥ ལུ་ ཏི་ཡཱན་ཇིན་ཁྲོམ་སྡེའི་ བྱང་ཕྱོགས་ལུ་ དེ་བཟུམ་མའི་ རྐྱེན་ངན་གྱིས་ མི་གྲངས་ ༡༧༣ ལུ་ ཤི་རྐྱེན་བྱུང་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།