རྩི་རང་རྫོང་ཁག་ སྤ་ཚར་གླིང་ རྒེད་འོག་ནང་ སོ་ནམ་གྱི་ མཐུན་རྐྱེན་ཚུ་ ཡར་དྲག་གཏང་ནི།

བདེ་སྐྱིད་ཆོས་སྒྲོན།
རྩི་རང་རྫོང་ཁག་ སྤ་ཚར་གླིང་རྒེད་འོག་གི་ མི་སེར་ཚུ་ འཚོ་བ་སོ་ནམ་ལུ་བརྟེན་ཏེ་སྡོད་པའི་ནང་ལས་ཡང་ རྒེད་འོག་དེ་ནང་ ཚོད་བསྲེ་ཚུ་ འབོར་ཆེ་ཏོག་ཏོ་སྦེ་ར་ འཚོ་སྐྱོང་འཐབ་སྲོལ་ཡོད་རུང་ ནད་ཡམས་ལུ་བརྟེན་ཏེ་ ཚོང་འབྲེལ་འཐབ་ནི་ལུ་ དཀའ་ངལ་བྱུང་ནུག།
དེ་ཡང་ སྤ་ཚར་གླིང་རྒཔོ་སྦེ་ བཙག་འཐུ་གྲུབ་མི་ སྐྱེས་ལོ་ ༣༦ འབད་མི་ ཆ་བི་ཀུ་མར་རའི་གིས་ བཤད་དོ་བཟུམ་འབད་བ་ཅིན་ རྒེད་འོག་དེ་ནང་གི་མི་སེར་ཚུ་གིས་ ནད་ཡམས་ཀོཝིཌ་-༡༩ མ་ཐོན་པའི་ཧེ་མར་ ཚོད་བསྲེ་ཚུ་མང་ཤོས་ཅིག་ར་ ཐིམ་ཕུ་ལུ་ཚོང་འབྲེལ་འཐབ་སྟེ་ སྡོད་ཡོདཔ་བཞིན་དུ་ ཚོད་བསྲེ་ཚུ་ཚོང་དུས་ལྟེ་བ་ཚུ་ནང་བསྐྱལ་དགོ་རུང་ རྒེད་འོག་གིས་ འགོ་འདྲེན་འཐབ་སྟེ་ བསྐྱལ་སྡོད་ཅི་ཟེར་ཨིན་པས།
མ་གཞི་ རྒེད་འོག་དེ་ནང་སོ་ནམ་ཞིང་ལམ་ཚུ་ཡང་ གཡུས་ཚན་གེ་རའི་ནང་ ཁྱབ་སྟེ་ཡོདཔ་ལས་ ལོ་བསྟར་བཞིན་དུ་ལེགས་སྤྱོད་འབད་ནི་མ་གཏོགས་ དཀའ་ངལ་སྦོམ་ཅིག་ ག་ནི་ཡང་མེད་རུང་ རི་དྭགས་སེམས་ཅན་ཚུ་གིས་ ལོ་ཐོག་ལུ་ གནོདཔ་བསྐྱལ་ཏེ་ བརྒྱ་ཆ་ ༢༥ དེ་རེ་ མེདཔ་གཏངམ་ལས་ དེ་བཟུམ་མའི་དཀའ་ངལ་ཚུ་བསལ་ཐབས་ལུ་ རྒེད་འོག་གི་ཁ་ཐུག་ལས་འཆར་གཞི་ཚུ་ བརྩམ་པའི་བསྒང་ཡོད་ཟེར་ བཤདཔ་ཨིན་པས།
ད་རུང་ ཐུང་ཆུ་གི་མཐུན་རྐྱེན་ཚུ་གུང་པ་རེ་རེ་བཞིན་དུ་ལུ་ཁྱབ་འདི་ཡོད་རུང་ ཞིང་ཆུ་གུ་ལྷོདཔ་ད་ མ་ལངམ་པའི་དཀའ་ངལ་ཡོད་མི་འདི་ཡང་ སྤྱི་ཟླ་ ༤ པའི་ཚེས་ ༤ ལུ་ སྡེ་སྲུང་ཡིག་ཚང་གི་ཁ་ཐུག་ལས་ ཙ་ཀ་གླིང་གི་གཡུས་ཚན་དང་ སྤ་ཚར་གླིང་སྨད་ཀྱི་གཡུས་གོ་ ༢ ལུ་ འཐུང་ཆུའི་ལས་འགུལ་མཇུག་བསྡུ་ཡོདཔ་ལས་ ཆུ་བཀྲམ་ཚུགས་ནི་དོན་ལུ་སྒོ་འབྱེད་རྟེན་འབྲེལ་ཡང་འབད་ཡོདཔ་ཨིན་པས།
རྒཔོ་དེ་གིས་ སློབ་རིམ་ ༡༢ པ་ མཇུག་བསྡུ་བའི་ཤུལ་ལུ་ བལྟ་བཤལ་ལས་སྡེ་ཅིག་ནང་ལཱ་འབད་དེ་ སྡོད་ཡོདཔ་མ་ཚད་ གཞི་རྟེན་ཤེས་ཡོན་གྱི་ སློབ་སྟོན་པ་སྦེ་ཡང་ཕྱག་ཞུ་ཡོདཔ་ད་ དེ་ལས་ རྒེད་འོག་དེ་ནང་ར་ རྒེད་དྲུང་སྦེ་ཕྱག་ཞུ་བའི་ཤུལ་ལུ་ ས་གནས་གཞུང་གི་ བཙག་འཐུ་ཐེངས་ ༢ དང་ ༣ པའི་ནང་ རྒ་པོའི་འདེམས་ངོ་སྦེ་ བཅའ་མར་གཏོགས་ཡོདཔ་བཞིན་དུ་ མི་སེར་ཚུ་གི་ཡང་རྒྱབ་སྐྱོར་འབད་དེ་ བཙག་འཐུ་གྲུབ་ཡོད་པའི་གནས་ཚུལ།