ཧཱཌ་སཱན་ཝེ་ལི་ རེ་ནེ་གེཌ་སྡེ་ཚན་གྱི་ འགོ་འདྲེན་ཐོག་ལུ་ འབྲུག་གི་བཱེཛ་བཱོལ་རྩེ་མི་ཚུ་ ཡུ་ཨེཛ་ལུ་འགྲུལ་བསྐྱོད།

ཡུ་ཨེཛ་ལུ་ཡོད་མི་ ཧཱཌ་སཱན་ཝེ་ལི་ རེ་ནེ་གེཌ་ཟེར་མི་ སྡེ་ཚན་གྱིས་ མགྲོན་བརྡ་འབདཝ་བཞིན་དུ་ འབྲུག་ལས་ བཱེཛ་བཱོལ་རྩེ་མི་ ན་གཞོན་ ༡༢ ཀྱིས་ ཡུ་ཨེཛ་ལུ་ འགོ་དང་པ་ དྲན་སེམས་ཅན་གྱི་ འགྲུལ་བསྐྱོད་འབད་ཡོདཔ་ཨིན་པས།
འབྲུག་གི་བཱེཛ་བཱོལ་དང་ སོཕ་བཱོལ་རྩེ་མི་ སྡེ་ཚན་དེ་ ཁྱད་ཆོས་ཅན་གྱི་ ལམ་སྲོལ་བརྗེ་སོར་གྱི་ ལས་རིམ་ཐོག་ལས་ ཨ་མི་རི་ཀའི་ དལ་ཉམས་ཀྱི་རྩེདམོ་ བཱེཛ་བོལ་དང་འབྲེལ་ཏེ་ གྲལ་གཏོགས་འབད་ནིའི་དོན་ལུ་ གདམ་ཁ་རྐྱབ་ནུག།
དེ་བཟུམ་མའི་ བལྟ་སྐོར་གྱི་ གོ་སྐབས་དེ་གིས་ ན་གཞོན་ཚུ་ལུ་ རེ་ནེ་གེཌ་གི་ རྩེད་ཐང་ནང་ བཱེཛ་བཱོལ་རྩེ་ནི་དང་འབྲེལ་ཏེ་ བལྟ་བྱ་མཐོང་བྱའི་ ཉམས་མྱོང་ཚུ་འཐོབ་ནི་ཨིན་པའི་ཁར་ འབྲུག་གི་སྔར་ཁྱུན་ལམ་སྲོལ་བཟང་པོ་ཚུ་ ཡུ་ཨེཛ་གི་ མི་སེར་ཚུ་ལུ་སྟོན་མི་ ངོ་ཚབ་སྦེ་ཡང་ཨིན་པས།
ན་གཞོན་ཚུ་ཡང་ ཐིམ་ཕུ་ལས་ཨིནམ་ད་ ཁོང་ག་ར་ དེ་བཟུམ་མའི་ གོ་སྐབས་ནམ་འཐོབ་འོང་ག་ཟེར་ རེ་བ་བསྐྱེད་དེ་ སྡོད་ཡོདཔ་ད་ ད་རེས་ ཁོང་ཆ་ཁྱབ་ ཡུ་ཨེཛ་ལུ་ འགྱོ་ནི་ཐོབ་མི་དེ་ རྒྱལ་ཁབ་ཀྱི་ ཕྱི་ཁར་འགྱོ་ནི་ འགོ་དང་པ་ཨིནམ་ལས་ སྤྲོ་བ་སྦོམ་སྦེ་ར་བྱུང་ནུག།
ཡུ་ཨེཛ་ལུ་ སྡོད་པའི་རིང་ལུ་ ཁོང་གིས་ འབྲུག་ལུ་ ཡོངས་གྲགས་ཐལ་དོ་ཡོད་མི་ བཱེཛ་བོལ་རྩེདམོ་ལུ་ བརྩོན་ཤུགས་བསྐྱེད་ནི་ཨིནམ་ད་ དེ་བསྒང་ ཁོང་ཆ་ཁྱབ་ཀྱིས་ བཱེཛ་བོལ་རྩེ་མི་ཚུ་དང་ འབྲེལ་བ་འཐབ་སྟེ་ རྩེདམོ་རྩེ་ཐངས་ཀྱི་སྐོར་ལས་ ཉམས་མྱོང་ཚུ་ འཐོབ་ནི་ཨིནམ་མ་ཚད་ ཨ་མི་རི་ཀའི་ བཱེཛ་བོལ་རྩེད་ཐང་ཡང་ དངོས་སུ་སྦེ་ མཐོང་ཚུགས་ནི་ཨིན་པས།
དེ་མ་ཚད་ ཧཱཌ་སཱན་ཝེ་ལི་ རེ་ནེ་གེཌ་སྡེ་ཚན་གྱིས་ ན་གཞོན་ཚུ་ ངལ་སངས་ཀྱི་དོན་ལུ་ ལས་རིམ་མ་འདྲཝ་ལེ་ཤ་ཅིག་ བརྩམས་ཏེ་ཡོདཔ་ལས་ ཁོང་ཆ་ཁྱབ་ཀྱིས་ ཧཱཌ་སཱན་ཆུ་གཞོང་གི་ མཛེས་བཀོད་བལྟ་ནི་དང་ ས་གནས་ཀྱི་ དུས་སྟོན་ཚུ་ནང་ གྲལ་གཏོགས་འབད་ནི་ དེ་ལས་ བཱེཛ་བོལ་རྩེ་མི་ཚུ་དང་ འབྲེལ་བ་འཐབ་སྟེ་ རང་སོའི་ལམ་སྲོལ་གྱི་སྐོར་ལས་ གོ་རྟོགས་ཡར་དྲག་གཏང་ནི་དང་ འབྲེལ་དོན་ཅན་གྱི་ འཚོལ་ཞིབ་ཚུ་ཡང་ འབད་ཚུགས་ནི་ཨིན་པས།
ཟག་བེཊ་ཀཝ་སི་ཀི་གིས་ ད་རེས་ འབྲུག་གི་དུས་སྟོན་འདི་ ག་ནི་བ་ཡང་ ཡ་མཚན་ཅན་སྦེ་ བརྩི་སྲུང་འབད་ནི་གི་ གོ་སྐབས་ཐོབ་ཡོདཔ་མ་ཚད་ འབྲུག་གི་སྒྱུ་རྩལཔ་དང་ འགོ་དཔོན་ཚུ་ཡང་ ཡུ་ཨེཛ་ལུ་ འོང་ནི་དེ་ ཚེ་ཐེངས་གཅིག་ནང་ གོ་སྐབས་ཐེངས་གཅིག་ར་ཨིན་ཟེར་བཤད་ནུག།
ད་རུང་ ཁོ་གིས་འབད་བ་ཅིན་ ཁོང་ག་ར་ མཉམ་འབྲེལ་ཐོག་ལས་ འབྲུག་མི་ཚུ་གི་དོན་ལུ་ ས་གནས་དང་ རྒྱལ་སྤྱིའི་བཱེཛ་བཱོལ་ མི་སྡེ་ཚུ་གི་སྐོར་ལས་ གོ་བ་ཁ་གསལ་སྦེ་ སྤྲོད་ཚུགས་ནི་དང་ ད་ཚུན་ བཱེཛ་བཱོལ་གྱི་རྩེདམོ་དེ་ ཡོངས་གྲགས་བཟོ་ནི་ལུ་ མཐར་འཁྱོལ་བྱུང་ཡོདཔ་ལས་ ད་ལས་ཕར་ཡང་ ཧཱཌ་སཱན་ཝེ་ལི་ རེ་ནེ་གེཌ་སྡེ་ཚན་དང་ འབྲུག་གི་བཱེཛ་བཱོལ་དང་ སོཕ་བཱོལ་ཚོགས་པའི་བར་ན་ དུས་རིང་མཉམ་འབྲེལ་གྱི་ རེ་བ་ཡོད་ཟེར་ཨིན་པས།
དེ་བཟུམ་མའི་ འབྱུང་རིམ་འདི་ འབྲུག་དང་ ཡུ་ཨེཛ་གི་བར་ན་ ཡར་འཕེལ་ཅན་གྱི་ མཐུན་ལམ་གྱི་ བརྡ་མཚོན་ཅིག་ཨིནམ་ད་ ན་གཞོན་ཚུ་ རྒྱལ་ཁབ་ནང་ ལོག་ལྷོདཔ་ད་ བཱེཛ་བཱོལ་ལུ་ དང་འདོད་འཐེབ་ བསྐྱེད་ནི་ཨིནམ་མ་ཚད་ དུས་ནམ་ཡང་ བརྗེད་པར་ཕངས་པའི་ དྲན་སེམས་དང་ རྒྱལ་སྤྱིའི་གནས་རིམ་ནང་ འབྲུག་གི་ངོ་ཚབ་འབད་ཡོད་པའི་ དཔའ་ཉམས་ཚུ་ཡང་ བསྐྱེད་ཚུགས་ནི་ཨིན་པས་ཟེར་ གནས་ཚུལ་གསར་བཏོན་ནང་བཀོད་ནུག།
འབྲུག་གི་ན་གཞོན་ཚུ་ ཡུ་ཨེཛ་ལུ་ འགྱོ་ཚུགས་མི་དེ་ ང་བཅས་རའི་ ས་མཚམས་ཀྱི་ཕྱི་ཁར་ ལམ་སྲོལ་གྱི་ འབྲེལ་བ་བཙན་ཐབས་དང་ རྩེད་འགྲན་གྱི་ སེམས་ཤུགས་གོང་འཕེལ་ནང་ གལ་གནད་ཆེ་བའི་ གོམ་པ་མདུན་སྤོའི་ འབྱུང་རིམ་ཅིག་ཡང་ཨིན་པའི་གནས་ཚུལ།