སོ་མ་ལི་ཡའི་ བཟའ་ཁང་ཅིག་ལུ་ དྲག་ཐོག་དབང་བཙོང་ཐོག་ལས་གནོད་འཚུབ།

སི་ཨེན་ཨེན།
སྤྱི་ཟླ་ ༣ པའི་ཚེས་ ༡༥ ལུ་ སོ་མ་ལི་ཡའི་ སྲིད་འཛིན་གྱི་ ཕོ་བྲང་ཉེ་འདབས་ལུ་ཡོད་མི་ བཟང་ཁང་ཅིག་ལུ་ དྲག་ཐོག་དབང་བཙོང་འབད་མི་ སྡེ་ཚན་ཅིག་གིས་ གནོད་འཚུབ་བཀལ་བའི་རྐྱེན་ངན་ནང་ མི་གྲངས་ ༣ ལུ་ ཤི་རྐྱེན་དང་ གཞན་མི་ ༢༧ ལུ་ རྨ་སྐྱོན་བྱུང་ནུག།
དེ་ཡང་ མཚོན་ཆ་འབག་མི་ ༥ གིས་ ཨེཛ་ཝའི་ཨེལ་ཟེར་མི་ བཟའ་ཁང་ནང་ བཙན་འཛུལ་འབད་དེ་ གནོད་འཚུབ་བཀལ་བའི་སྐབས་ལུ་ ས་མ་ལི་ཡའི་ སྲུང་སྐྱོབ་དམག་མི་ཚུ་ ལྷོད་ཡོདཔ་ལས་ དབང་བཙོང་འབད་མི་ཚུ་ཡང་ག་ར་ བསད་ཡོདཔ་ཨིན་པས།
ད་རེས་ནངས་པར་ སོ་མ་ལི་ཡའི་གཞུང་དང་ དྲག་ཐོག་དབང་བཙོངཔ་ ཨཱལ་ཤ་ཧབ་ཟེར་མི་ དམག་སྡེའི་བར་ན་ དམག་འཁྲུག་ལང་སྟེ་ཡོདཔ་ལས་ ཡུ་ཨེཛ་གི་ དམག་མི་ ༥༠༠ ལྷགཔ་ཅིག་ སོ་མ་ལི་ཡའི་གཞུང་ལུ་ རྒྱབ་སྐྱོར་སྦེ་ བཏང་སྟེ་ཡོདཔ་ཨིན་པས།
དེ་སྦེ་ བཏང་མི་དེ་ཡང་ ཨཱལ་ཤ་ཧབ་སྡེ་ཚན་དེ་ ཡུ་ཨེཛ་ལུ་ གནོད་འཚུབ་བཀལ་སྲིད་པའི་ ཨཱལ་ཀའི་ཌ་ དྲག་ཐོག་དབང་བཙོང་སྡེ་ཚན་གྱི་ ཡན་ལག་སྦོམ་ཤོས་ཅིག་ཨིནམ་སྦེ་ བརྩིཝ་ཨིན་པས་ཟེར་ བཀོད་འདུག་པའི་གནས་ཚུལ།