སི་པེན་རྒྱལ་ཁབ་ཀྱི་ ཤར་ཕྱོགས་ ས་ཁོངས་ཝེ་ལེན་ཤི་ཡ་ལུ་ གློ་བུར་གྱི་ ཆུ་རུད་ལུ་བརྟེན་ཏེ་ མི་གྲངས་ ༥༡ ལུ་ཤི་རྐྱེན།

རོའི་ཊརཛ།
སྤྱི་ཟླ་ ༡༠ པའི་ཚེས་ ༢༩ ལུ་ སི་པེན་རྒྱལ་ཁབ་ཀྱི་ ཤར་ཕྱོགས་ས་ཁོངས་ ཝེ་ལེན་ཤི་ཡ་ཟེར་སར་ ཆར་ཤུགས་ལུ་བརྟེན་ཏེ་ འཁོར་ལམ་དང་ ཁྲོམ་དེ་ཚུ་ ཆུ་འོག་ལུ་ཚུད་དེ་ མི་གྲངས་ ༥༡ དེ་ཅིག་ལུ་ ཤི་རྐྱེན་བྱུང་ནུག།
མི་སྡེ་བརྡ་བརྒྱུད་ཚུ་གི་ བརྙན་ཐུང་ཚུ་ནང་ གསལ་བཀོད་འབད་བའི་ནང་གསལ་ མི་སེར་ལེ་ཤ་ཅིག་ ཆུ་རུད་ལས་ བྱོག་མ་ཐལ་བའི་ མཐོང་སྣང་དང་ ལ་ལོ་ཅིག་ ཆུ་རུད་ཀྱིས་ འཕྱགས་མི་བདའ་ནིའི་ ཐབས་ཤེས་ལུ་ ཤིང་གུ་འཛེགས་ཏེ་ཡོད་སར་ མཐོངམ་ཨིན་པས།
གནད་དོན་དེ་གི་སྐོར་ལས་ ཝེ་ལེན་ཤི་ཡའི་ ལུང་ཕྱོགས་འགོ་ཁྲིདཔ་ ལོཛ་མེ་ཛཱོན་གྱིས་ གནས་ཚུལ་ཞལ་འཛོམས་ཅིག་ནང་ རྒྱུན་ལམ་ཚུ་ མེདཔ་ཐལ་བའི་རྐྱེན་གྱིས་ འགྱོ་ས་མེད་པའི་ ས་ཁོངས་ཚུ་ནང་ མི་ལེ་ཤ་ཅིག་ ལུས་ཏེ་ཡོད་པའི་སྐོར་ལས་ གསལ་བཤད་འབད་ནུག།
ཁོ་གིས་འབད་བ་ཅིན་ ས་གནས་ག་རའི་ནང་ གློ་བུར་གྱི་ ཞབས་ཏོག་ཚུ་ ལྷོད་མ་ཚུགས་མི་དེ་ འཛུལ་ཞུགས་ཀྱི་ གོ་སྐབས་རྩ་ལས་ར་ མེད་ནི་དེ་གིས་ཨིནམ་མ་གཏོགས་ གྲ་སྒྲིག་མེདཔ་མིན་ཟེར་ཨིན་པས།
གློ་བུར་གྱི་ ཞབས་ཏོག་བྱིན་མི་ཚུ་གིས་ མི་སེར་ཚུ་ལུ་ ལམ་འགྲུལ་འབད་ནི་ལས་ འཛེམས་དགོ་པའི་ བསྐུལ་མ་དང་ གཞུང་འབྲེལ་འབྱུང་ཁུངས་ཚུ་ལས་ དུས་མཐུན་གྱི་ སྙན་ཞུ་ཚུ་ལུ་ ཉན་དགོ་པའི་ གསལ་བསྒྲགས་འབད་ནུག།
དམིགས་བསལ་གྱིས སྲོག་སྐྱབས་ཀྱི་ལཱ་ལུ་ སྦྱང་བ་ཡོད་མི་ དྲག་པོའི་དམག་མི་ཚུ་ཡང་ ས་གནས་དེ་གནས་དེ་ཁར་ སྲོག་སྐྱབས་ཀྱི་ ལཱ་འབད་མི་ཚུ་ལུ་ རྒྱབ་སྐྱོར་འབད་བར་ ལྷོད་ནུག་ཟེར་ བཀོད་འདུག་པའི་གནས་ཚུལ།