ཤྲཱི་ལངྐའི་ སྲིད་འཛིན་གསརཔ་ ཝིག་རེ་མེ་སིང་གེ་གིས་ ཁས་བླངས་དམ་བཅའ།

བི་བི་སི།
སྤྱི་ཟླ་ ༧ པའི་ཚེས་ ༢༡ ལུ་ ཤྲཱི་ལངྐའི་ ཚོགས་ཁང་གི་ ས་ཁོངས་ནང་ སྲུང་སྐྱོབ་སྒྲིང་སྒྲིང་སྦེ་ བཙུགས་ཐོག་ལས་ དགུང་ལོ་ ༧༣ བཞེས་མི་ ཧེ་མའི་བློན་ཆེན་ ར་ནིལ་ཝིག་རེ་མེ་སིང་གེ་གིས་ སྲིད་འཛིན་གསར་པའི་ གོ་གནས་ཐོག་ལུ་ ཁས་བླངས་དམ་བཅའ་ཞུ་ནུག།
དེ་ཡང་ ད་རེས་ནངས་པར་ ཤྲཱི་ལངྐའི་ རྒྱལ་ཁབ་ནང་ དཔལ་འབྱོར་གྱི་ གནས་སྟངས་སྐྱོ་དྲགས་ཅིག་སྦེ་ གནས་སྟེ་ཡོདཔ་ད་ དེ་བཟུམ་མའི་ གནས་སྟངས་ལུ་ ཐུག་སྟེ་ཡོད་མི་དེ་ གཙོ་བོ་ར་ སྲིད་འཛིན་བགྲེསཔ་ ར་ཇ་པག་ས་གིས་ བདག་སྐྱོང་ལེགས་ཤོམ་སྦེ་ མ་འཐབ་མི་ལུ་བརྟེན་ཏེ་ཨིནམ་སྦེ་ མི་སེར་མང་ཤོས་ཀྱིས་ར་ ཁ་ཉེས་བཀལཝ་ཨིན་པས།
འདས་པའི་བདུན་ཕྲག་ནང་ ངོ་རྒོལ་འབད་མི་ ཨམ་སྲུ་ཅིག་གིས་ ཝིག་རེ་མེ་སིང་གེ་དེ་ ད་ལྟོ་ རྒྱལ་ཁབ་ནང་ར་ བཞུགས་ཏེ་ཡོདཔ་ལས་ ཁོ་གིས་ ག་དེ་སྦེ་ར་ མཛད་འོང་ག་ བལྟ་ནི་ཨིན་ཟེར་ སླབ་ནུག།
ག་དེམ་ཅིག་སྦེ་ཨིན་རུང་ མི་སེར་ཚུ་ལུ་ བཟའ་འཐུང་དང་ སྨན་དེ་ཚུ་ མ་འཐོབ་པ་ཅིན་ ད་རུང་ཡང་ ཁྲོམ་ལམ་བདའ་སྟེ་ འཐོན་ཞིནམ་ལས་ ངོ་རྒོལ་འབད་ནི་ཨིན་ཟེར་ སླབ་ཡོདཔ་ཨིན་པས།
ངོ་རྒོལ་འགྲེམ་སྟོན་འབད་མི་ མང་ཤོས་ཅིག་གིས་ མ་གཞི་ སྲིད་འཛིན་གསརཔ་ ཝིག་རེ་མེ་སིང་གེ་དེ་ཡང་ སྲིད་འཛིན་བགྲེསཔ་ ར་ཇ་པག་སའི་གྲངས་སུ་ཨིན་རུང་ གནས་སྐབས་ཅིག་ གོ་སྐབས་བྱིན་གེ་ཟེར་ བཤད་ཡོད་པའི་སྐོར་ལས་ བཀོད་འདུག་པའི་གནས་ཚུལ།