ཤྲཱི་ལངྐ་ལུ་ དཔལ་འབྱོར་གྱི་ དཀའ་ངལ་ལུ་བརྟེན་ཏེ་ བཞེས་སྒོ་གནང་དགོ་པའི་ ངོ་རྒོལ་འགྲེམ་སྟོན།

ཟི་ནི་འུཛ།
ཤྲཱི་ལངྐ་ལུ་ དཔལ་འབྱོར་གྱི་ དཀའ་ངལ་དེ་ ཉིནམ་གཅིག་བ་ཉིནམ་གཅིག་ སྐྱོ་དྲགས་སྦེ་ ཐལ་དོ་ཡོདཔ་ལས་ ལཱ་གཡོག་མེད་མི་ཚུ་རྩིས་ཏེ་ མི་སེར་ལེ་ཤ་ཅིག་གིས་ གཞུང་ལས་ ཉིན་རེར་བཞེས་སྒོ་དུས་ཕོག་ ༢ རེ་ གནང་དགོཔ་སྦེ་ ངོ་རྒོལ་འབདཝ་ཨིན་པས།
རྒྱལ་ཁབ་དེ་ནང་ ཉིན་བསྟར་གླ་ཆའི་གུ་ ལཱ་འབད་མི་དང་ ད་ལྟོ་འབྱུང་བཞིན་དུ་ཡོད་མི་ དཔལ་འབྱོར་གྱི་ དཀའ་ངལ་ལུ་བརྟེན་ཏེ་ ལཱ་གཡོག་བྱང་མི་ མི་སེར་བརྒྱ་ཕྲག་ལེ་ཤ་ཅིག་གིས་ རྒྱལ་ས་ཀོ་ལོམ་བོ་ལུ་ གཞི་རྟེན་བློ་གཏད་ཚོགས་པ་ལས་ བཞེས་སྒོ་འཐོབ་ཐབས་ལུ་ གྱལ་རིངམོ་སྦེ་སྒྲིག་སྟེ་ སྡོད་དོ་ཡོདཔ་ད་ གཞི་རྟེན་བློ་གཏད་ཚོགས་པ་གིས་ དེ་བཟུམ་མའི་ བཞེས་སྒོ་བཀྲམ་སྤེལ་ལས་རིམ་དེ་ སྤྱི་ཟླ་ ༤ པའི་ཚེས་ ༩ ལས་ འགོ་བཙུགས་ནུག།
དེ་མ་ཚད་ སྲིད་འཛིན་གྱིས་ མི་སེར་བདག་འཛིན་འཐབ་ནི་དང་ རྒྱལ་ཁབ་སྐྱོང་ནིའི་ནང་ འཐུས་ཤོར་བྱུང་ཡོདཔ་ལས་ དགོངས་ཞུ་འབད་དགོཔ་སྦེ་ཡང་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།