ཤྲཱི་ལངྐ་ལུ་ ངོ་རྒོལ་འབད་མི་ཚུ་གིས་ སྲིད་འཛིན་གྱི་ གཟིམ་ཅུང་སྟོར་བཏང་ཡོདཔ།

བི་བི་སི།
སྤྱི་ཟླ་ ༧ པའི་ཚེས་ ༩ ལུ་ ངོ་རྒོལ་འབད་མི་ སྟོང་ཕྲག་ལེ་ཤ་ཅིག་གིས་ ཤྲཱི་ལངྐའི་རྒྱལ་ས་ལུ་ སྲིད་འཛིན་གོ་ཏ་བཱ་ཡ་ ར་ཇ་པག་སའི་གཟིམ་ཅུང་ སྟོར་བཏང་ཡོདཔ་ཨིན་པས།
དེ་ཡང་ སྲིད་འཛིན་གྱིས་ ཚུལ་མིན་འཛིན་སྐྱོང་ལུ་བརྟེན་ཏེ་ རྒྱལ་ཁབ་ནང་ དཔལ་འབྱོར་གྱི་ གནས་སྟངས་དེ་ ཚབས་ཆེན་ཅིག་ལུ་ གྱུར་ཏེ་ཡོདཔ་ལས་ སྲིད་འཛིན་དགོངསམ་ཞུ་དགོཔ་སྦེ་ རྒྱལ་ས་ཀོ་ལོམ་བོ་ལུ་ རུ་སྒྲིག་ཐོག་ལས་ ངོ་རྒོལ་འབད་དེ་ ཟླཝ་ཡང་ལང་ནུག།
སྙན་ཞུ་ཅིག་ནང་ བཀོད་དོ་བཟུམ་འབད་བ་ཅིན་ སྲིད་འཛིན་ར་ཇ་པག་ས་དེ་ སྔ་གོང་ལས་ར་ ཉེན་སྲུང་ཅན་གྱི་ ས་ཁོངས་ཅིག་ནང་ སྤོ་བྱོན་སོང་ཡི་ཟེར་ཨིན་པས།
ཤྲཱི་ལངྐའི་ རྒྱལ་ཁབ་དེ་ནང་ དཔལ་འབྱོར་གྱི་ དཀའ་ངལ་ལུ་བརྟེན་ཏེ་ བཟའ་འཐུང་དང་ ས་སྣུམ་ སྨན་རིགས་ཚུ་ ནང་འདྲེན་འབད་ནི་ལུ་ དོ་འགྲན་བྱུང་སྟེ་ཡོདཔ་ཨིན་པས།
དེ་མ་ཚད་ གཞུང་ལུ་ ངོ་རྒོལ་འབད་མི་ སྟོང་ཕྲག་ལེ་ཤ་ཅིག་ རྒྱལ་ས་ཀོ་ལོམ་བོ་ལུ་ སྣུམ་འཁོར་ཐོག་ལུ་ འགྲུལ་སྐྱོད་འབད་དེ་ གཞུང་གི་ཡིག་ཚང་ཚུ་ནང་ རུ་ཁག་སྦེ་འཛུལ་ཏེ་ གོ་ཏ་བཱ་ཡ་ ཁྱིམ་ནང་འགྱོ་ཟེར་ སྐད་ཤུགས་སྦེ་རྐྱབ་སྟེ་ སྲིད་འཛིན་གྱི་ གཟིམ་ཅུང་ནང་ ལྷོད་ནིའི་དོན་ལུ་ ཁྲིམས་སྲུང་འགག་སྡེའི་ བཀག་ར་ཚུ་ཡང་ བཅག་དཀྲུམ་འབད་དེ་ འཛུལ་ཡོདཔ་ཨིན་པས།
དེ་བསྒང་ ཁྲིམས་སྲུང་འགག་སྡེ་གིས་ ཁོང་ཁྲོ་ལང་མི་ཚུ་ གཟིམ་ཅུང་ནང་ འཛུལ་ནི་ལས་ བཀག་ཐབས་ལུ་ ཀྲོབ་མདའ་གནམ་སྟོང་ནང་ རྐྱབ་ཡོད་རུང་ བཀག་མ་ཚུགས་པར་ ངོ་རྒོལཔ་ལ་ལོ་ཅིག་ གཟིམ་ཅུང་ནང་ འཛུལ་སོང་ནུག་ཟེར་ བཀོད་འདུག་པའི་གནས་ཚུལ།