རྒྱ་ནག་གིས་ ཏ་ཡེ་ཝཱན་དང་གཅིག་ཁར་ དྲན་ཚོར་ཅན་གྱི་ བཅད་མཚམས་བརྒལ་ཏེ་ མཁའ་དམག་གནམ་གྲུ་ ལག་ལེན་ཐོག་ལས་དམག་སྦྱོང་།

ཨཱལ་ཇ་ཟི་ར།
སྤྱི་ཟླ་ ༧ པའི་ཚེས་ ༡༡ ལུ་ ཏ་ཡེ་ཝཱན་གྱིས་ བཤད་དོ་བཟུམ་འབད་བ་ཅིན་ ཡུ་ཨེཛ་གི་རྒྱལ་ས་ ཝ་ཤིང་ཊཱོན་ཌི་སི་ལུ་ བྱང་ཨེཊ་ལེན་ཊིག་ཚོགས་པའི་ དབུ་ཁྲིད་ཞལ་འཛོམས་འཚོགས་པའི་སྐབས་ལུ་ རྒྱ་ནག་གིས་ མཁའ་དམག་གནམ་གྲུ་ཚུ་ ལག་ལེན་འཐབ་སྟེ་ དམག་སྦྱོང་འབདཝ་མས་ཟེར་ཨིན་པས།
དེ་ཡང་ རྒྱ་ནག་གི་ མཁའ་དམག་གནམ་གྲུ་ ༦༦ དང་ གནམ་གྲུ་ཆགས་སའི་ གྲུ་ཆེན་ ༧ དང་བཅསཔ་སྦེ་ ཏ་ཡེ་ཝཱན་མཐའ་བསྐོར་ཏེ་ ལག་ལེན་འཐབ་ཡོདཔ་ད་ གནམ་གྲུ་དེ་ཚུའི་གྲས་ལས་ གནམ་གྲུ་ ༥༦ གིས་ རྒྱལ་ཁབ་ ༢ ཀྱི་ དྲན་ཚོར་བཅད་མཚམས་བརྒལ་ཏེ་ འཕུར་འགྲུལ་འབད་ནུག།
གནད་དོན་དེ་གི་སྐོར་ལས་ ཏ་ཡེ་ཝཱན་གྱི་ སྲུང་སྐྱོབ་ལྷན་ཁག་ལས་ བཤད་དོ་བཟུམ་འབད་བ་ཅིན་ ཁོང་གི་དམག་མི་ཚུ་གིས་ ཏ་ཡེཝཱན་གྱི་ མཚོ་འགྲམ་བདའ་སྟེ་ རྒྱ་ནག་གི་ གནམ་གྲུ་དང་ གྲུ་ཚུ་ཡོངས་རྫོགས་སྦེ་ར་ གསང་ཞིབ་འབད་དོ་ཟེར་ཨིན་པས།
ཕི་ལི་པིན་ དྲག་པོའི་དམག་སྡེ་གིས་ཡང་ ཕི་ལི་པིན་གྱི་ རྒྱ་མཚོའི་ནང་ རྒྱ་ནག་དང་ ར་ཤི་ཡ་གིས་ དམག་སྦྱོང་ཚུ་འབད་དོ་ཡོད་པའི་ སྙན་ཞུ་ཚུ་ ལྷོད་ཅི་ཟེར་ བཤད་ཡོད་རུང་ གྲུ་ཆེན་ཤཱན་དོག་གི་སྐོར་ལས་ ག་ནི་ཡང་ མ་སླབ་ཨིན་པས།
རྒྱ་ནག་གིས་ ཏ་ཡེ་ཝཱན་དེ་ རྒྱ་ནག་གི་ ས་ཁོངས་ཨིནམ་སྦེ་ བརྩི་དོ་ཡོད་རུང་ འཕྲལ་ཁམས་ཀྱི་ ལོ་ཚུ་ནང་ ཏ་ཡེ་ཝཱན་གྱིས་ ཁོང་རའི་རང་དབང་ཅན་གྱི་ ངོ་རྟགས་ཐོག་ལས་ རྒྱལ་སྤྱི་དང་ མཐུན་ལམ་ཚུ་ རྒྱ་སྐྱེད་གཏང་དོ་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།