རྒྱ་ནག་གི་སྲིད་འཛིན་ ཛི་ཇིན་པིང་གིས་ དྲག་པོའི་དམག་སྡེ་ཚུ་ ག་དེ་མགྱོགས་མགྱོགས་ ཡར་སེང་འབད་དགོ་པའི་དྲན་བསྐུལ།

ཨེ་བི་སི།
རྒྱ་ནག་གི་སྲིད་འཛིན་ ཛི་ཇིན་པིང་གིས་ ཡུ་ཨེཛ་གི་ འགོ་འདྲེན་ཐོག་ལུ་ རྒྱ་ནག་མཐའ་བསྐོར་ཏེ་ དམག་སྒར་ཆགས་ཞིནམ་ལས་ དྲག་གནོན་འབད་ནི་གི་ ཉེན་ཁ་ཡོད་པའི་ དྲན་བརྡ་འབད་བའི་ ཉིནམ་དག་པ་ཅིག་གི་ཤུལ་ལས་ དྲག་པོའི་དམག་སྡེ་ཚུ་ རྒྱལ་སྤྱིའི་གནས་ཚད་ཁར་ ཡར་སེང་འབད་དགོ་པའི་ དྲན་བསྐུལ་ཡང་འབད་ནུག།
སྲིད་འཛིན་ཇིན་པིང་གིས་ བཤད་དོ་བཟུམ་འབད་བ་ཅིན་ རྒྱ་ནག་གི་ ཁ་ཐུག་ལས་ ཐབས་བྱུས་ཅན་གྱི་ ཉེན་ཁའི་གདོང་ལེན་དང་ སྲུང་སྐྱོབ་འབད་ནི་ དེ་ལས་ ཐབས་བྱུས་ཅན་གྱི་ དམིགས་གཏད་ཚུ་ སྒྲུབ་ཐབས་ལུ་ རྒྱ་ཁམས་ཀྱི་ སྤྱིར་བཏང་སྟོབས་ཤུགས་དེ་ ག་དེ་དྲག་དྲག་ ཡར་སེང་འབད་དེ་ ལྕོགས་གྲུབ་ཚུ་ ཡར་དྲག་གཏང་དགོ་ཟེར་ཨིན་པས།
དེ་མ་ཚད་ ཚན་རིག་དང་ འཕྲུལ་རིག་ཚུ་ རང་མགོ་རང་འདྲོངས་སྦེ་ བཟོ་ནི་དང་ གློ་བུར་གྱི་ གནས་སྟངས་ལུ་ ཐབས་བྱུས་ཅན་གྱི་ ལྕོགས་གྲུབ་ཚུ་ ཡར་དྲག་གཏང་ནི་ དེ་ལས་ བཟོ་གྲྭ་དང་ བཀྲམ་སྤེལ་གྱི་ བརྒྱུད་ལམ་ཚུ་ ཡུན་ཐུབ་ཅན་ བཟོ་ནི་དང་ ཕྱི་དངུལ་གསོག་འཇོག་གི་སྒོ་ལས་ རྒྱལ་ཡོངས་ཉེན་སྲུང་གི་ ལྕོགས་གྲུབ་ཡར་དྲག་གཏང་དགོ་པའི་ དྲན་བསྐུལ་ཡང་འབད་ནུག།
རྒྱལ་ཡོངས་ཀྱི་ ཐབས་བྱུས་ལས་རིམ་ནང་ གློག་འཕྲུལ་གཅིག་བསྒྲིལ་ལས་ འགོ་བཟུང་སྟེ་ མཁའ་དབྱིངས་རིག་པའི་ གནད་དོན་གཙོ་བོ་ ༡༠ ཚུད་དེ་ཡོད་མི་ཚུ་ལུ་ རྒྱ་ནག་བཟོ་བསྐྲུན་ཟེར་མི་ འབྱུང་ཁུངས་ངོ་རྟགས་ཐོག་ལས་ འཛམ་གླིང་ནང་ མིང་གཏམ་སྟོན་ནི་དང་ དཔལ་འབྱོར་ནང་ ཞི་དྲག་གཅིག་བསྒྲིལ་འབད་དགོ་པའི་ བརྡ་བསྐུལ་ཚུ་ཡང་འབད་ནུག་ཟེར་ བཀོད་འདུག་པའི་གནས་ཚུལ།