བི་བི་སི།
སྤྱི་ཟླ་ ༨ པའི་ཚེས་ ༧ ལུ་ ཡུ་ཨེཛ་གི་སྲིད་འཛིན་ ཌོ་ནཱལ་ཊཱམ་གྱིས་ བཀོད་ཁྱབ་བཀའ་རྒྱ་ཅིག་ བཏོན་པའི་ནང་གསལ་ རྒྱ་གར་གྱིས་ ར་ཤི་ཡའི་ མར་ཁུ་ཉོ་མི་ལུ་བརྟེན་ཏེ་ ཡུ་ཨེཛ་གིས་ རྒྱ་གར་ལས་ ཅ་ཆས་ནང་འདྲེན་འབད་མི་ཚུ་ལུ་ ཁྲལ་བརྒྱ་ཆ་ ༢༥ ཧེང་སྐལ་བཀལ་ནི་ཨིནམ་སྦེ་བཀོད་ནུག།
དེ་སྦེ་ ཁྲལ་ཡར་སེང་འབད་མི་དེ་གིས་ རྒྱ་གར་ལས་ ཡུ་ཨེཛ་གིས་ ནང་འདྲེན་འབད་བའི་ ཅ་ཆས་ཀྱི་ཁྲལ་བསྡོམས་ བརྒྱ་ཆ་ ༥༠ ལུ་ ཡར་སེང་འགྱོ་ནི་ཨིནམ་ལས་ ཡུ་ཨེཛ་གི་ ནང་འདྲེན་ཁྲལ་ མཐོ་ཤོས་ཀྱི་གྲས་ཁར་ཨིནམ་ད་ ཁྲལ་གསརཔ་དེ་ཡང་ ཉིན་གྲངས་ ༢༡ གི་རྒྱབ་ལས་ སྤྱི་ཟླ་ ༨ པའི་ཚེས་ ༢༧ ལུ་ འགོ་བཙུགས་ནི་ཨིན་པས།
གནད་དོན་དེ་ལུ་ རྒྱ་གར་གྱི་ ཕྱི་འབྲེལ་ལྷན་ཁག་གིས་ ར་ཤི་ཡ་ལས་ ནང་འདྲེན་འབད་མི་ཚུ་གི་ཐེད་ཁར་ ཁ་གསལ་སྦེ་ བཤད་ཡོད་རུང་ ཡུ་ཨེཛ་གིས་ ཁྲལ་ཡར་སེང་འབད་མི་དེ་ དྲང་བདེན་དང་ གཞི་ཁུངས་མེད་པའི་ ཁྲལ་ཚད་ཅིག་ཨིན་པས་ཟེར་བཀོད་ནུག།
རྒྱལ་ཁབ་གཞན་དག་པ་ཅིག་གིས་ར་ ཁོང་རའི་རྒྱལ་ཡོངས་ཀྱི་མཐའ་དོན་ལུ་ ཁྲལ་ཚད་ཡར་སེང་འབད་དོ་ཡོད་རུང་ ཡུ་ཨེཛ་གིས་ རྒྱ་གར་ལུ་ དེ་བཟུམ་མའི་ ཁྲལ་ ཧེང་སྐལ་བཀལ་ནི་གི་ གདམ་ཁ་རྐྱབ་མི་དེ་ སེམས་ཁར་མ་འཐད་པའི་ གཞི་ཅིག་ཨིནམ་སྦེ་ བཤདཔ་ཨིན་པས།
དེ་བཟུམ་སྦེ་ རྒྱ་གར་གྱི་ ཁ་ཐུག་ལས་ཡང་ རང་གི་རྒྱལ་ཡོངས་ཀྱི་མཐའ་དོན་ལུ་ དགོས་མཁོ་ཡོད་པའི་ ལག་ལེན་ཚུ་ འཐབ་ནི་ཨིན་པའི་ གསལ་བཤད་འབད་ནུག།
ཡུ་ཨེཛ་སྲིད་འཛིན་གྱིས་ ར་ཤི་ཡའི་ ཕྱད་མདའི་འཕྲུལ་ཆས་ཚུ་གིས་ ཡུ་ཀེ་རེན་གྱི་ མི་སེར་ལེ་ཤ་ཅིག་ དམར་བསད་འབད་མི་ལུ་ སྣང་དག་མེདཔ་ཨིནམ་སྦེ་ བཤདཔ་ཨིན་པས་ཟེར་ བཀོད་འདུག་ཡོད་པའི་གནས་ཚུལ།
