རྒྱ་གར་གྱི་རྒྱལ་ས་ དིལླི་ལུ་ཡོད་མི་ ཨཱཕ་གྷ་ནིཛ་ཏཱན་གྱི་ གཞུང་ཚབ་ཡིག་ཚང་ སྒོ་བསྡམས་ཡོདཔ།

ཨེན་ཌི་ཊི་ཝི།
སྤྱི་ཟླ་ ༡༡ པའི་ཚེས་ ༢༤ ལུ་ རྒྱ་གར་གྱི་རྒྱལ་ས་ ནིའུ་དིལླི་ལུ་ཡོད་མི་ ཨཱཕ་གྷ་ནིཛ་ཏཱན་གྱི་ གཞུང་ཚབ་ཡིག་ཚང་དེ་ སྒོ་བསྡམས་ཡོད་པའི་སྐོར་ལས་ གསལ་བསྒྲགས་འབད་ཡོདཔ་ད་ དེ་ཡང་ ཁོང་གི་དོན་ལུ་ རྒྱ་གར་གཞུང་གི་ཁ་ཐུག་ལས་ གནས་སྟངས་དོ་འགྲན་ཅན་ཅིག་ བཟོ་སྟེ་ཡོདཔ་ལས་ སྤྱི་ཟླ་ ༡༡ པའི་ཚེས་ ༢༣ ལས་ར་ སྒོ་བསྡམས་ཡི་ཟེར་ཨིན་པས།
མདང་ཞག་ སྤྱི་ཟླ་ ༩ པའི་ཚེས་ ༣༠ ལས་ ཨཱཕ་གྷན་གཞུང་ཚབ་ཡིག་ཚང་གི་ ལག་ལེན་ཚུ་ མཇུག་བསྡུ་བཏང་ནི་གི་ གྲོས་ཆོད་དེ་ཡང་ རྒྱ་གར་གཞུང་གིས་ ཁོང་གི་ཡིག་ཚང་ལུ་ དུས་རྒྱུན་གྱི་ལཱ་ཚུ་ བྱ་སྟབས་བདེ་ཏོག་ཏོ་སྦེ་ ལག་ལེན་འཐབ་བཅུག་པའི་ རེ་འདུན་ཐོག་ལུ་ བཏོན་ཡི་ཟེར་བཀོད་ནུག།
དེ་སྦེ་ སྒོ་བསྡམས་མི་དེ་ དོན་གཅོད་ལས་བྱེད་པ་ཚུ་གིས་ ཏ་ལི་བཱན་དང་ ཕྱོགས་གཏོགས་འབདཝ་ལས་ ནང་འཁོད་ལུ་ མ་འགྲིགསཔ་ཐོན་སོངཔ་སྥེ་ མནོ་སྲིད་ནི་ཨིན་རུང་ གནད་དོན་ངོ་མ་དེ་ སྲིད་བྱུས་དང་ མཐའ་དོན་གྱི་ འགྱུར་བ་ཚུ་ལུ་བརྟེན་ཏེ་ཨིན་པས།
འདས་པའི་ལོ་ངོ་ ༢ དང་ ཟླཝ་ ༣ གྱི་ནང་ རྒྱ་གར་ལུ་སྡོད་མི་ ཨཱཕ་གྷན་གྱི་ མི་རློབས་དེ་ཡང་ ཕྱེད་ཀ་དེ་ཅིག་ར་ མར་བབས་སོང་ཡོདཔ་ད་ དེ་ཡང་ ཨཱཕ་གྷན་གྱི་ སྐྱབས་བཅོལ་བ་དང་ སློབ་ཕྲུག་ དེ་ལས་ ཚོང་པ་ཚུ་ རྒྱ་གར་རྒྱལ་ཁབ་ནང་ལས་ ཐོན་འགྱོ་དོ་ཡོད་པའི་ཁར་ རྒྱ་གར་ལུ་འོང་ཆོག་པའི་ འཛུལ་ཞུགས་ཆོག་ཐམ་གསརཔ་ཡང་ ཚད་གཅིག་ལས་རྒལ་ཏེ་ མི་ཐོབ་དོ་ཡོདཔ་སྦེ་བཀོད་ནུག།
ཨཱཕ་གྷན་གཞུང་ཚབ་ཡིག་ཚང་ལས་ ཐོན་ཁུངས་ཚུ་མེད་པའི་ཁར་ ཏ་ལི་བཱན་གཞུང་གིས་ ཨཱཕ་གྷན་གྱི་ མཐའ་དོན་ཚུ་ འགྲུབ་མ་ཚུགས་པ་ལུ་བརྟེན་ཏེ་ སྤྱི་ཟླ་ ༡༡ པའི་ཚེས་ ༡ ལུ་ར་ ཁོང་གི་ལཱ་ཚུ་ མཇུག་བསྡུ་ནི་གི་ གསལ་བསྒྲགས་འབད་ནུག་ཟེར་ བཀོད་འདུག་པའི་གནས་ཚུལ།