རྒྱ་གར་ཀེ་ར་ལ་ལུ་ ས་རུད་ཆད་དེ་ མི་གྲངས་ ༡༦༧ ལུ་ཤི་རྐྱེན།

སི་ཨེན་ཨེན།
རྒྱ་གར་གྱི་ ལྷོ་ཕྱོགས་མངའ་སྡེ་ ཀེ་ར་ལའི་ བྱང་ཤར་ས་ཁོངས་ ཝ་ཡ་ན་དི་ཟེར་སར་ སྤྱི་ཟླ་ ༧ པའི་ཚེས་ ༣༠ གི་དྲོ་པར་ ཆརཔ་ཤུགས་སྦེ་ རྐྱབ་ཡོདཔ་ལས་ ས་རུད་སྦོམ་སྦེ་ཆད་པའི་ རྐྱེན་ངན་ཁག་ ༢ ཀྱི་ནང་ མི་གྲངས་ ༡༦༧ དེ་ཅིག་ལུ་ ཤི་རྐྱེན་བྱུང་ནུག།
དེ་མ་ཚད་ ཆརཔ་རྒྱུན་ཆད་མེད་པར་ རྐྱབ་ནི་དེ་གིས་ གློག་མེ་དང་ འཁོར་ལམ་ ཟམ་ལ་སོགས་པའི་ མཐུན་རྐྱེན་ཚུ་ཡང་ མེདཔ་བཏང་པའི་ཁར་ ཤིང་ཆེན་ཚུ་ཡང་ ས་ཁར་གྱེལ་ཡོདཔ་ལས་ སྲོག་སྐྱབས་ཀྱི་ ལཱ་འབད་མི་ཚུ་ རྐྱེན་ངན་བྱུང་སའི་ ས་ཁོངས་ནང་ འགྱོ་ནི་དེ་ ག་ནི་བ་ཡང་ ལཱ་ཁག་ཅིག་ལུ་ གྱུར་ཏེ་ཡོདཔ་ཨིན་པས།
རྒྱ་གར་གྱི་ རྒྱལ་ཡོངས་རྐྱེན་ངན་གདོང་ལེན་སྡེ་ཚན་གྱིས་ མི་སྡེ་བརྡ་བརྒྱུད་ནང་བཀོད་མི་ གནས་སྟངས་བརྙན་ཐུང་ནང་ སྲོག་སྐྱབས་འབད་མི་ཚུ་གིས་ གྱིབ་ཀྱི་གྲུ་ཆུང་ཚུ་གི་ཐོག་ལས་ སྲོག་སྐྱབས་ཀྱི་ ལཱ་ཚུ་འབད་སར་ མཐོང་དོ་ཡོད་པའི་ཁར་ གནམ་གྲུ་ཧེ་ལི་ཀོབ་ཊར་ཚུ་ཡང་ ལག་ལེན་འཐབ་སྟེ་འབད་རུང་ སྲོག་སྐྱབས་ཀྱི་ ལཱ་འབད་ནི་ལུ་ དོ་འགྲན་ལེ་ཤ་ཅིག་ཡོདཔ་ལས་ ལཱ་ཁག་གཏང་དོ་ཡོདཔ་ཨིན་པས།
ཨིན་རུང་ སྤྱི་ཟླ་ ༧ པའི་ཚེས་ ༣༡ ཚུན་ལུ་ མི་གྲངས་ ༡,༠༠༠ དེ་ཅིག་ རྒྱ་གར་གྱི་ ལྷོ་ཕྱོགས་དམག་སྡེ་གིས་ ཉེན་སྲུང་དང་ལྡན་པའི་ ས་ཁོངས་ནང་ བསྐྱལ་ཚུགས་ཡོདཔ་ད་ ས་ཁོངས་དེ་ནང་སྡོད་མི་ ཇ་ན་ཀི་ཟེར་མི་གིས་ གནམ་ནུབ་མོར་ མོ་གི་བཟའ་ཚང་ཚུ་ གཉིད་ལོག་སྡོདཔ་ད་ གཙང་ཆུའི་ནང་ལས་ སྐད་ཤུགས་མ་འདྲཝ་ཅིག་གོ་སྟེ་ ཡར་ལོང་བལྟ་བའི་བསྒང་ལས་ ཁོང་གི་སྡོད་ཁྱིམ་གྱི་ མཐའ་སྐོར་ལུ་ ཆུ་འཁྱིལ་ཏེ་ཡོདཔ་ལས་ ཁྱིམ་ཚང་ཅིག་གི་ཁྱིམ་ནང་ གནསཔོ་གཉའ་སྡོད་ཅི་ཟེར་ཨིན་པས།
ཁོང་ཆ་ཁྱབ་ ཁྱིམ་ཚང་གི་ ཁང་མིག་ཅིག་ནང་ ཚ་གྱང་ལང་སྟེ་ སྡོད་པའི་བར་ན་ར་ རྡོ་དང་ཤིང་ཚུ་ རྦོབ་རིལ་འོངམ་ལས་ མོ་གི་རྨགཔ་དང་ བུམོ་ ༢ ལུ་ གནོད་སྐྱོན་མ་བྱུང་རུང་ ཇ་ན་ཀི་མོ་ར་ལུ་ རྨ་སྐྱོན་བྱུང་ཡོདཔ་ད་ ཁྱིམ་ཚང་གཞན་ཚུ་གི་ བཟའ་ཚང་ཚུ་ མིག་གིས་མཐོང་སར་མིན་འདུག་ཟེར་ཨིན་པས།
དེ་བསྒང་ རྨ་སྐྱོན་བྱུང་མི་ཚུ་ དྲོ་པ་ཁམས་ཅིག་ཁར་ ས་ཁོངས་ནང་ལྷོད་མི་ སྲོག་སྐྱབས་ཀྱི་ ལཱ་འབད་མི་ཚུ་གིས་ སྨན་ཁང་ཚུ་ནང་ བསྐྱལ་ནུག་ཟེར་ བཀོད་འདུག་པའི་གནས་ཚུལ།