ཨེ་པི།
སྤྱི་ཟླ་ ༣ པའི་ཚེས་ ༡ ལུ་ ཡུ་ཨེཛ་དང་ ཨིཛ་རེལ་གྱིས་ ཨི་རཱན་གྱི་ མི་ཛ་ཡེལ་ཚུ་ཡོད་མི་ ས་ཁོངས་ཚུ་ནང་ རྫས་བམ་བཀོག་ཐོག་ལས་ དམག་གྲུ་ཚུ་ རྩ་མེད་བཏང་ཡོདཔ་མ་ཚད་ ཨི་རཱན་གྱི་ མངོན་མཐོ་དབུ་ཁྲིད་ ཨ་ཡ་ཏོ་ལ་ ཨ་ལི་ ཁ་མ་ནེ་ཡང་ དམར་བསད་འབད་ནུག།
དེ་ཡང་ ཨི་རཱན་གྱི་ འགོ་དཔོན་ཚུ་གིས་ བཤད་དོ་བཟུམ་འབད་བ་ཅིན་ རྫས་བམ་ཚུ་འགས་པའི་ དུ་པ་གིས་ ཨི་རཱན་གྱི་རྒྱལ་ས་ ཏཱེ་རཱན་གྱི་ གནམ་ཁ་ལུ་ གང་སྟེ་ཡོད་པའི་ཁར་ དྲག་བཅོམ་དེ་ལུ་བརྟེན་ཏེ་ མི་གྲངས་ ༢༠༠ ལྷགཔ་ཅིག་ལུ་ཡང་ ཤི་རྐྱེན་བྱུང་ཡི་ཟེར་ཨིན་པས།
དེ་བཟུམ་མའི་ རྫས་བམ་ཚུ་ བཀོག་ཐོག་ལས་ དམག་འཁྲུག་ལངས་མི་དེ་གིས་ རྒྱལ་ཁབ་གཞན་ཁར་ཡང་ ཡུ་ཨེཛ་དང་ ཨིཛ་རེལ་ ཨི་རཱན་ཚུ་ལས་ལྷག་སྟེ་ འཇིགས་སྐུལ་འབྱུང་ནི་གི་ ཉེན་ཁ་ཚུ་ཡོདཔ་སྦེ་བཀོད་ནུག།
ལེ་བ་ནཱོན་གྱི་ གཡིབ་དམག་སྡེ་ཚན་ ཧེཟ་བཱོལ་ལཱ་གིས་ ཨིཛ་རེལ་ལུ་ གནོད་འཚུབ་བཀལ་ཡོདཔ་སྦེ་ བཤད་ཡོད་རུང་ ཨིཛ་རེལ་གྱིས་ ལོག་སྟེ་ར་ ངན་ལན་འཇལ་ཡོདཔ་ད་ གནོད་འཚུབ་དེ་ནང་ ཞི་བའི་མི་སེར་ ༥ དེ་ཅིག་ལུ་ ཤི་རྐྱེན་བྱུང་ཡོདཔ་ལས་ མཚོ་ཁུག་རྒྱལ་ཁབ་ཚུ་གིས་ ཉེན་བརྡ་འབད་ཡོདཔ་ཨིན་པས།
ཨི་རཱན་གྱིས་ རྒྱལ་ཁབ་གཞན་ཚུ་ལུ་ གནོདཔ་བཀལ་ནི་ལས་ བཀག་ཐབས་ལུ་ ཡུ་རོབ་སྟོབས་ཤུགས་ཅན་གྱི་ རྒྱལ་ཁབ་ཚུ་གིས་ ཨ་མི་རི་ཀའི་ དམག་སྡེ་ཚུ་ལུ་ གྲོགས་རམ་འབད་ནི་གི་ གྲོས་འཆར་བཀོད་ནུག།
ཨི་རཱན་གྱིས་ དགྲ་ལན་འཇལ་ནི་གི་ ཁས་བླངས་འབད་དེ་ ཨིཛ་རེལ་དང་ ཨ་རབ་མངའ་སྡེ་ཚུ་ནང་ མི་ཛ་ཡེལ་ཚུ་ བཏང་ཡོདཔ་ལས་ ཡུ་ཨེཛ་གི་ ཞབས་ཏོག་འཐུས་མི་ ༣ ལུ་ ཤི་རྐྱེན་བྱུང་ཡོདཔ་མ་ཚད་ ཇེ་རུ་ས་ལམ་དང་ བེཊ་ཤེ་མེཤ་ལུ་ཡོད་པའི་ ཆོས་ཁང་ཚུ་རྩིས་ཏེ་ ས་གནས་ལེ་ཤ་ཅིག་གི་ནང་ར་ མི་གྲངས་ ༩ ལུ་ ཤི་རྐྱེན་དང་ ༢༨ ལུ་ རྨ་སྐྱོན་བྱུང་ཡོདཔ་ཨིན་པས།
ཡུ་ཨེཛ་དང་ ཨིཛ་རེལ་གྱིས་ དམག་གྲུ་དང་ མི་ཛ་ཡེལ་གྱི་ ས་ཁོངས་ཚུ་ནང་ དམིགས་གཏད་བསྐྱེད་དེ་ ཨི་རཱན་ལུ་ གནོད་འཚུབ་བཀལ་མི་དེ་ མར་ཕབ་འགྱོ་ནི་གི་ རྟགས་མཚན་ག་ནི་ཡང་མེདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།
